ސަން ރައިޒްގެ ނަމުގައި ސިޔާސީ ޕާޓީއެއް އުފެއްދުމުގެ ހުއްދަދީފި
15 ޖުލައި 2019 | ހޯމަ 04:11ހުއްދަ ދިނީ އާދިއްތަ ދުވަހު
ސަންރައިޒް ޕާޓީ އުފެއްދުމުގެ ހުއްދަދިނީ ސައީދާ ރަޝާދަށް
ސަން ރައިޒްގެ ނަމުގައި އާ ސިޔާސީ ޕާޓީއެއް އުފެއްދުމުގެ ހުއްދަ އިލެކްޝަން ކޮމިޝަނުން ދީފިއެވެ.
ޕާޓީ އުފެއްދުމުގެ ހުއްދަ ދީފައިވަނީ މ. މަލިކުވިޔު، ސައީދާ ރަޝާދަށެވެ. އާ ސިޔާސީ ޕާޓީއެއް އުފެއްދުމަށް ހުއްދަ ދިނުމާ އެކު، 3،000 މެމްބަރުން ހަމަކުރަން ޖެހެއެވެ. މިކަން ކުރުމަށް ތިން މަސް ދުވަސް ލިބެއެވެ.
އިލެކްޝަން ކޮމިޝަންގެ ރަސްމީ ވެބްސައިޓްގައިވާ ގޮތުން އެއް ޕާޓީއަކަށް އެންމެ ގިނަ މެމްބަރުން ރަޖިސްޓްރީ ވެފައިވަނީ ކޯލިޝަންގެ މައި ޕާޓީ އެމްޑީޕީގައެވެ. އެ ޕާޓީގައި 54،302 މެމްބަރަކު ވަނީ ރަޖިސްޓްރީ ވެފައެވެ.
އީސީގައި ނުވަ ޕާޓީއެއް ވަނީ ރަޖިސްޓްރީ ކޮށްފައެވެ. އެއީ، މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)، ދިވެހި ރައްޔިތުންގެ ޕާޓީ (ޑީއާރްޕީ)، އަދާލަތު ޕާޓީ، ޖުމްހޫރީ ޕާޓީ، މޯލްޑިވްސް ތާޑްވޭ ޑިމޮކްރަޓިކްސް (އެމްޓީޑީ) އާއި މޯލްޑިވްސް ލޭބާ އެންޑް ސޯޝަލް ޑިމޮކްރަޓިކް ޕާޓީ (އެމްއެލްއެސްޑީޕީ)، ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް)، އެމްޑީއޭގެ އިތުރުން ޕީޕަލްސް ކޮންގްރެސް ޕާޓީ (ޕީއެންސީ) އެވެ.
ގިނަ ދުވަސްތަކެއް ވެރިކަން ކުރެއްވި ކުރީގެ ރައީސް މައުމޫނު އަބްދުލްގައްޔޫމް ގެންދަވަނީ އެމްއާރްއެމްގެ ނަމުގައި ޕާޓީއެއް އުފެއްދުމުގެ މަސައްކަތް ކުރައްވަމުންނެވެ. ޕާޓީ އަށް މެމްބަރުން ހޯއްދެވުމުގެ ގޮތުން އެމަނިކުފާނު ވަނީ ދާދި ފަހުން އަވަށްޓެރި ސްރީލަންކާއަށް ދަތުރުފުޅެއް ކުރައްވާފައެވެ. އެމްއާރްއެމްގެ ނަމުގައި ޕާޓީއެއް އުފެއްދުމުގެ ހުއްދަ އީސީން ދީފައިވަނީ ފެބްރުއަރީ މަހުގެ 19 ވަނަ ދުވަހުއެވެ.
