ކްރިކެޓް ވޯލްޑް ކަޕް: 27 އަހަރަށް ފަހު އިންގްލޭންޑް ފައިނަލަށް

ކްރިކެޓް ވޯލްޑް ކަޕްގައި އޮސްޓްރޭލިއާ ބަލިކޮށް 27 އަހަރަށް ފަހު އިންގްލޭންޑް ފައިނަލަށް ދަތުރުކޮށްފިއެވެ.

ބުރާސްފަތި ދުވަހު ކުޅުނު ސެމީފައިނަލް މެޗުގައި ފުރަތަމަ ކުޅެން އެރީ އޮސްޓްރޭލިއާއިންނެވެ. އެޓީމުން ވަނީ ކުޅެން އަރައި 49 އޯވަރު ތެރޭގައި ހުރިހާ ކުޅުންތެރިން ނުބައިވެގެން 223 ލަނޑު ހަދައިފައެވެ.

ޖަވާބުގައި އިންގްލޭންޑުން ވަނީ ކުޅެން އަރައި 32.1 އޯވަރު ތެރޭގައި ދެ ކުޅުންތެރިން ނުބައިވެގެން 226 ލަނޑު ހަދައި މެޗު ކާމިޔާބުކޮށްފައެވެ.

މި މެޗުގައި އޮސްޓްރޭލިއާގެ ސްމިތު އަދި އިންގްލޭންޑްގެ ރޯއި ވަނީ 85 ލަނޑު ހަދައިފައެވެ. އަދި އިންގްލޭންޑްގެ ރޫޓް މެޗުގައި 49 ލަނޑު ހެދިއިރު، މޯގަން ވަނީ 45 ލަނޑު ހަދައިފައެވެ.

މެޗަށްފަހު އިންގްލޭންޑްގެ ކެޕްޓަން މޯގަން ބުނީ، މެޗުން މޮޅުވުމުގެ ހުރިހާ ކްރެޑިޓެއް ހައްގުވަނީ ކުޅުންތެރިންނަށް ކަމަށާއި، ފައިނަލް މެޗަކީ އިންގްލޭންޑަށް ލިބޭ ރަނގަޅު ފުރުސަތެއް ކަމަށެވެ. އަދި ފައިނަލުން ޖާގަ ހޯދުނީ އެންމެން ގުޅިގެން ކުރި މަސައްކަތުން ކަމަށް އޭނާ ވަނީ ބުނެފައެވެ.

އޮސްޓްރޭލިއާގެ ކެޕްޓަން ފިންޗް ބުނީ، މެޗުގައި އޮސްޓްރޭލިއާއަށް ރަނގަޅު ކުޅުމެއް ނުދެއްކުނު ކަމަށާއި، ބަލިވުމުގެ ނަތީޖާއަކީ އެއީ ކަމަށެވެ. އަދި އޭނާ ބުނީ، މުބާރާތަށް ނިކުތީ ތަށި ހޯދަން ކަމަށާއި، އެކަން ހާސިލުނުވުމުން މާޔޫސްވެފައި ހުރި ކަމަށެވެ.

މީގެއިތުރުން ފިންޗް ވަނީ މުޅި މުބާރާތުގައި އޮސްޓްރޭލިއާ ޓީމުން ދެއްކި އާދަޔާ ހިލާފު ކުޅުމަށް ތައުރީފްކޮށްފައެވެ. އޭނާ ބުނީ، ޓީމު ދެއްކީ މުބާރާތުގައި ފަހުރުވެރިވާ ކުޅުމެއް ކަމަށެވެ.