އައިއޯއައިޖީ: ރާއްޖޭގެ ކޮންޓިޖެންޓްގެ ޓްރެވެލް ޕާޓްނަރ އަކަށް މޯލްޑިވިއަން
11 ޖުލައި 2019 | ބުރާސްފަތި 14:39މި އެގްރިމެންޓާއެކު ރާއްޖޭގެ ޓީމު މޮރިސިސް އަށް ދަތުރުކުރާނީ މޯލްޑިވިއަން އިން
އޮލިމްޕިކް ކޮމެޓީ އާއި އެކު މޯލްޑުވިއަނުން އެގްރިމެންޓްގައި ސޮއި ކުރަނީ
އިންޑިއަން އޯޝަން އައިލޭންޑް ގޭމްސްގައި ވާދަކުރާ ރާއްޖޭގެ ކޮންޓިޖެންޓްގެ ޓްރެވަލް ޕާޓްނަރ އަކަށް މޯލްޑިވިއަން ހަމަޖައްސައިފިއެވެ.
ބުރާސްފަތި ދުވަހު މޯލްޑިވްސް އޮލިމްޕިކް ކޮމެޓީ އޮފީހުގައި ވަނީ މޯލްޑިވިއަންއާއެކު މި އެގްރިމެންޓްގައި ސޮއި ކޮށްފައެވެ.
ސޮއިކުރުމަށްފަހު އޮލިމްޕިކް ކޮމެޓީގެ ސެކެޓްރީ ޖެނެރަލް އަހުމަދު މަރުޒޫގު ވިދާޅުވީ މޯލްޑިވިއަނާއެކު މިއެއްބަސްވުމުގައި ސޮއި ކުރެވުނީ ދިވެހިރާއްޖޭގެ ޓީމުތައް ބޭނުންވި ގޮތައް ބޭނުން ދުލެއް ދީގެން ގެންދާން އެ ފުރުސަތު މޯލްޑިވިއަން އިން ދިނީތީ ކަމަށެވެ. އެކަމަށް ދިވެހި ހުރިހާ އެތުލީޓުންގެ ފަރާތުން މޯލްޑިވިއަންއަށް ސުކުރުއަދާ ކުރާކަމަށް މަރުޒޫގު ވިދާޅުވި އެވެ.
މަރުޒޫގު އިތުރަށް ވިދާޅުވީ ގައުމީ އެއާލައިނުން ދިވެހި ޓީމުތައް ދަތުރު ކުރުމުގެ ފުރުސަތު ލިބުމަކީ ލިބުނު ސަރަފެއްކަމަށެވެ. މީގެކުރިން ވެސް ގައުމީ އެއާލައިން އަބަދުވެސް ވަރަށް ފުރިހަމަ އެއްބާރުލުމެއް ދެއްވާ ކަމަށާއި، އެތްލީޓުން ބޭނުންވި ވަގުތަށް ފުރުން ހަމަޖައްސަ ދިނީތީ ސުކުރުއަދާ ކުރާ ކަމަށެވެ.
މީގެއިތުރުން މަރުޒޫގު ވިދާޅުވީ މިކަމަށް ބޭނުންވި ހުރިހާ ހަރަދެއް ސަރުކާރު ފަރާތުން ހަމަޖައްސަ ދިނީތީ ސަރުކާރަށް ސުކުރު އަދާކުރާ ކަމަށެވެ.
މޯލްޑިވިއަންގެ މެނޭޖިންގް ޑިރެކްޓާރ ރިޒްވީ ވިދާޅުވީ އައިލޭންޑް އޭވިއޭޝަން އަކީ އަބަދުވެސް ނެޝެނެލް ޑިވެލޮޕްމެންޓްއަށް ވަރަށް ބޮޑު ކޮންޓިބިއުސަން އެއް ދެމުން އަންނަ ކުންފުންޏެއް ކަމަށާއި، އެގޮތުން ކުޅިވަރުގެ ރޮނގުން މިހާރު ވެސް ވަރަށް ބޮޑުތި އެހީތަކެއް ވަމުން އަންނަކަމަށެވެ.
މީގެ އިތުރުން އޭނާ ވިދާޅުވީ އައިލޭންޑް އޭވިއޭޝަންގެ މުވައްޒަފުންގެ ފަރާތުން އައިއޯއައިޖީގައި ވާދަ ކުރާ ޓީމަށް ކާމިޔާބީއަށް އެދޭ ކަމަށެވެ. އިންޑިއަން އޯޝަން އައިލޭންޑް ގޭމްސްގައި ވާދަ ކުރާ ކޮންޓިޖެންޓްގެ މިއަހަރުގެ ޓާގެޓަކީ 15 މެޑައްޔެވެ.
