ނުކުޅެދުންތެރިކަން ހުންނަ ފަރާތްތަކަށް ވަޒީފާތަކަށް ހާއްސަ ކޯޓައެއް ހަމަޖެއްސުމުގެ މަސައްކަތް ދަނީ ކުރަމުން: ރައީސް
ކޮމިޔުނިޓީ ބޭސްޑް ރިހެބިލިޓޭޝަން ނިޒާމެއް ޤާއިމުކުރަން ވަނީ ނިންމާފައި
ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު
ނުކުޅެދުންތެރިކަން ހުންނަ މީހުންނަށް ވަޒީފާގެ ދާއިރާއިން ހާއްސަ ކޯޓައެއް ހަމަޖެއްސުމުގެ މަސައްކަތް ސަރުކާރުން ކުރަމުންދާ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ނުކުޅެދުންތެރިކަން ހުންނަ މީހުންގެ ޙައްގުތައް ހިމާޔަތްކުރާ ކައުންސިލުންދޭ 'ރިވެލި އެވޯޑް 2019' ދިނުމުގެ ޙަފްލާގައި ވާހަކަފުޅުދައްކަވަމުން ރައީސް ސޯލިހު ވިދާޅުވީ، ނުކުޅެދުންތެރިކަން ހުންނަ މީހުންނާއި ކުދިން ނިސްބަށްވާ ގިނަ އާއިލަތަކަކީ ދިރިއުޅުމުގެ އަސާސީ ކަންކަން ހަމަޖެއްސުމުގައި ވަރަށް ބޮޑެތި ގޮންޖެހުންތަކާއި ކުރިމަތިލާން ޖެހިފައިވާ ބައެއް ކަމަށެވެ. އަދި ދިރިއުޅުމުގެ ހަރަދުތައް ފުއްދުމާއި ބޯހިޔާވަހިކަން ފުއްދުމުގައި އެ ފަރާތްތަކަށް ގިނަ ހުރަސްތަކެއް ހުރިކަން ރައީސް ފާހަގަކުރެއްވިއެވެ.
ރައީސް ވިދަޅުވީ، އަމިއްލައަށް އާމްދަނީ އެއް ހޯދައިގެން ދިރިއުޅުމެއް ބިނާ ކުރުމަކީ ނުކުޅެދުންތެރިކަން ހުންނަ މީހުންނަށް ކުރިމަތިލާން ޖެހިފައިވާ ބޮޑު ގޮންޖެހުމެއް ކަމަށް ވިދާޅުވިއެވެ. އެ ފަރާތްތަކަށް ވަޒީފާދޭން ބައެއް ފަރާތްތަކުން ފަސްޖޭހޭކަން ހިތާމާއާއެކު ފާހަގަކުރާ ކަމަށް ރައީސް ވިދާޅުވިއެވެ.
ރައީސް ވިދާޅުވީ، ނުކުޅެދުންތެރިކަން ހުންނަ މީހުންނަށް ކުދި އަދި މެދު ފަންތީގެ ވިޔަފާރި ފެށުމަށް އިންޓްރެސްޓް ކުޑަ ލޯނު ސަރުކާރުން ދިނުމުގެ މަސައްކަތް ކުރަމުންދާ ކަމަށެވެ. މީހެއްގެ ކިބާގައި ނުކުޅެދުންތެރިކަން ހުރުމަކީ އެމީހެއްގެ ބަދު ނަސީބެއް ނޫން ކަމަށާއި، މުޖުތަމައު އަތު ގުޅާލައިގެން މަސައްކަތް ކުރަންވީ އެފަދަ މީހުންގެ ކިބާގައި ހުރި ހުނަރާ ގާބިލްކަން ބޭނުން ހިފޭނެކަމުގެ މަގު ފަހިކޮށްދީ އެމީހުންނަކީ ނަސީބުވެރި ބަޔަކަށް ހަދައިދޭނެ ކަމަށް ރައީސް ވިދާޅުވި އެވެ.
ނުކުޅެދުންތެރިކަން ހުންނަ މީހުންނަށް ބޭނުންވާ ޞިއްޙީ ޚިދުމަތްތަކާއި، ރިހެބިލިޓޭޓް ކުރުމުގެ ވަސީލަތްތަކާއި ޚިދުމަތްތައް ރާއްޖެއިން ލިބެން ހުރީ ވަރަށް މަދު މިންވަރަކަށް ކަމަށާއި އެހެންކަމުން އެކަމަށްވެސް، ޞިއްޙީ ދާއިރާގެ ތެރެއިން އަވަސް ޙައްލެއް ހޯދުމަށް މަސައްކަތް ކުރަމުންދާ ކަމަށް ރައީސް ވިދާޅުވިއެވެ. އަދި ސަރުކާރުން މިހާރު ނިންމާފައިވަނީ، ކޮމިޔުނިޓީ ބޭސްޑް ރިހެބިލިޓޭޝަން ނިޒާމެއް ޤާއިމުކުރަން ކަމަށް ރައީސް ވިދާޅުވި އެވެ.
އެމަނިކުފާނު ވިދާޅުވީ އޭގެ ބޭނުމަކީ، ނުކުޅެދުންތެރިކަން ހުންނަ މީހުންނާއި ކުދިންނަށް، އަމިއްލަ ރަށުގައި ތިބެގެން، ތަފާތު ތެރަޕީތަކާއި ތަޢުލީމާއި ތަމްރީނުތައް ފަސޭހަކަމާއެކު ހޯދޭނެ އިންތިޒާމެއް ހަމަޖެއްސުން ކަމަށެވެ.
