މި އަހަރުގެ ތެރޭގައި އަމަލީ މަސައްކަތް ފެށިގެންދާނެ ގިނަ އުމްރާނީ މަޝްރޫއުތަކަކާއި ގުޅޭ އެންމެ ފަހުގެ މައުލޫމާތު ރައީސުލްޖުމްހޫރިއްޔާ އިބްރާޙިމް މުހައްމަދު ސޯލިހު ހިއްސާކުރައްވައިފިއެވެ.
ބުރާސްފަތި ދުވަހު ބޭއްވި ހާއްސަ ނޫސްވެރިންގެ ބައްދަލުވުމެއްގައި ރައީސް ވަނީ ވެލާނާ އެއަރޕޯޓުގެ ޕެސެންޖަރ ޓަރމިނަލް ބިލްޑިންގެ މަސައްކަތް މި ޖުލައި 27 ގައި ފެށި، 2022 އަހަރުގެ މެދުތެރޭގައި ނިމޭނެކަމަށް ލަފާކުރެވޭ ކަމަށް ވިދާޅުވެފައެވެ.
އޭގެ އިތުރުން ރާއްޖޭގެ 5 ސަރަޙައްދެއްގެ ޞިއްހީ ޚިދުމަތްދޭ ތަންތަން ހޮސްޕިޓަލް ފެންވަރަށް ބަދަލުކޮށް އެ ސަރަޙައްދުތަކުގެ ރައްޔިތުންނަށް ބޭސްފަރުވާއަށް މާލެ ނައިސް، އެސަރަޙައްދަކުން އަވަސް، ފެންވަރު ރަނގަޅު ޚިދުމަތްތަކެއް ލިބޭނެ ކަމަށް ވެސް ރައީސް ވިދާޅުވިއެވެ.
އައްޑޫ ސިޓީ އާބަން ސެންޓަރއަކަށް ބަދަލުކުރުމަށް މި ސަރުކާރުން ގެންގުޅޭ ސިޔާސަތުގެ ދަށުން ހިންގާ މަޝްރޫއުގެ މައުލޫމާތު ދެއްވަމުން ރައީސް ވިދާޅުވީ، އައްޑޫ ސިޓީ ތަރައްޤީކުރުމަށް ބޭނުންވާ އިޤްތިޞާދީ، އިޖްތިމާޢީ އަދި ޢުމްރާނީ މަޝްރޫޢުތައް ފާހަގަކޮށް، ޕްރޮޕޯސަލް ތައްޔާރުކުރެވި، އިންޑިއާގެ ލައިން އޮފް ކްރެޑިޓް އެހީގެ ދަށުން ކުރުމަށް ހުށަހެޅި ހުށަހެޅުން އިންޑިއާ ސަރުކާރުން ފާސްކޮށްފައިވާ ކަމަށެވެ. އަދި މި މަޝްރޫއުތަކުގެ އަމަލީ މަސައްކަތް ވަރަށް އަވަހަށް ފެށިގެން ދާނެ ކަމަށް ވެސް ރައީސް ވިދާޅުވިއެވެ.
އިތުރު މަޝްރޫއުތަކާއި ގުޅޭ ފަހުގެ މައުލޫމާތު ހިއްސާކުރައްވަމުން ރައީސް ވިދާޅުވީ ފުވައްމުލަކުގެ ރިންގް ރޯޑް ހެދުމުގެ މަސައްކަތް މިހާރު އެމްޓީސީސީން ކުރަމުން އަންނަ ކަމަށެވެ. އެގޮތުން 13 ކިލޯމީޓަރުގެ މަގު ހެދުމުގެ މަސައްކަތް ކުރިޔަށް ދާއިރު، ފުވައްމުލަކުގެ ކުނީގެ މައްސަލައަށާއި ކަރަންޓު އަދި ފެންބޮޑުވުމުގެ މައްސަލައަށް ޙައްލު ހޯދުމަށް މިހާރު މަސައްކަތް ކުރަމުން އަންނަ ކަމަށް ވެސް ރައީސް ސޯލިހު ވިދާޅުވިއެވެ.
މިއަހަރުގެ ތެރޭގައި 29 ރަށެއްގައި ފެނާއި ނަރުދަމާގެ ނިޒާމު ޤާއިމުކުރުމުގެ މަސައްކަތް ފެށޭނެ ކަމަށް ވިދާޅުވަމުން ރައީސް ވަނީ މި ދައުރުގެ ފުރަތަމަ 3 އަހަރުގެ ތެރޭގައި ފެނާއި ނަރުދަމާގެ މަޝްރޫޢުތައް ފެށި، ދައުރު ނިމޭއިރު މި ޚިދުމަތް ހުރިހާ ރަށެއްގައިވެސް ލިބޭނެ ކަން ހާމަކުރައްވާފައެވެ.
ރައީސްގެ ވާހަކަފުޅުގައި އެމަނިކުފާނު ވަނީ ރައްޔިތުންނަށް ވެވަޑައިގެންނެވި ހުރިހާ ވައުދެއް ފުއްދަވައިދެއްވާނެ ކަމުގެ ފުރިހަމަ ޔަގީންކަން ހުރިހާ ރައްޔިތުންނަށް އަރުވާފައެވެ.
