ރަތަފަންދޫ އަންހެނެއްގެ މަރުގައި ޝައްކު ކުރެވޭ ކަންކަން ހުރުމުން ފުލުހުން އެ މައްސަލަ ބަލަން ފަށައިފި
3 ޖުލައި 2019 | ބުދަ 11:01އެއީ އުމުރުން 44 އަހަރު އަންހެނެއް
ގދ ރަތަފަންދޫ
އަންގާރަ ދުވަހުގެރޭ ދަންވަރު ގދ ރަތަފަންދޫގައި މަރުވި އަންހެނެއްގެ މަރުގައި ޝައްކު ކުރެވޭ ކަންކަން ހުރުމުން ފުލުހުން އެ މައްސަލަ ބަލަން ފަށައިފިއެވެ.
އެކަމާ ގުޅޭގޮތުން ފުލުހުންގެ މީޑިއާ އޮފިޝަލު ވިދާޅުވީ، އުމުރުން 44 އަހަރު އަންހެނަކު ރޭ ދަންވަރު ރަތަފަންދޫ ސިއްހީމަރުކަޒަށް ގެނެވުނު ކަމަށާއި، އޭނާ މަރުވެފައިވާކަމުގެ މައުލޫމާތު ރޭ ދަންވަރު 02:44 ހާއިރު ސިއްހީމަރުކަޒުގެ ފަރާތުން ފުލުހުންނަށް ލިބިފައިވާ ކަމަށެވެ. އެގޮތުން އަންހެން މީހާ ސިއްހީމަރުކަޒަަށް ގެނެވުނުއިރު ވެސް މަރުވެފައިވާ ކަމަށް ފުލުހުންނަށް މައުލޫމާތު ލިބިފައިވާ ކަމަށް އޭނާ ވިދާޅުވިއެވެ.
ފުލުހުން އިތުރަށް ބުނީ، މި މައްސަލާގައި ޝައްކު ކުރެވޭ ބައެއް ކަންކަން ހުރުމުން އެ މައްސަލަ ތަހުގީގު ކުރަން ފަށާފައިވާ ކަމަށެވެ. ނަމަވެސް އޭގެ އިތުރު ތަފްސީލެއް ފުލުހުން ނުދެއެވެ.
މިހާދިސާގައި މަރުވެފައިވަނީ އެ ރަށު ކައުންސިލް އިދާރާގެ އެޑްމިން ޑިވިޜަންގައި މަސައްކަތް ކުރާ އާމިނަތު އިބްރާހިމް ނަމަކަށް ކިޔާ މީހެއް ކަމަށާއި، ކައުންސިލް އިދާރާގައި އޭނާ މަސައްކަތް ކުރާތާ 27 ވަރަކަށް އަހަރުވެއްޖެ ކަމަށް ކައުންސިލާ ހަވާލާދީ ބައެއް ނޫސްތަކުގައި ބުނެފައިވެއެވެ.
