ސަރުކާރުގެ ވިސްނުމަކީ ބައިނަލްއަޤުވާމީ ފެންވަރުގެ ޒަމާނީ ބަނދަރެއް ގުޅިފަޅުގައި ތަރައްޤީ ކުރުން: އިކޮނޮމިކް މިނިސްޓްރީ
މިހާރު ކުރިއަށްގެންދަނީ ކޮންސަލްޓެންޓެއް އައްޔަނު ކުރުމުގެ މަސައްކަތް
އިންވެސްޓް މޯލްޑިވްސްގެ ފަރާތުން އިކޮނޮމިކް މިނިސްޓްރީގެ ސްޓޭޓް މިނިސްޓަރ މުހައްމަދު އިޔާދު ހަމީދު ވާހަކަދައްކަވަނީ
ސަރުކާރުގެ ވިސްނުމަކީ ބައިނަލްއަޤުވާމީ ފެންވަރުގެ ޒަމާނީ ބަނދަރެއް ގުޅިފަޅުގައި ތަރައްޤީ ކުރުން ކަމަށް މިނިސްޓްރީ އޮފް އިކޮނޮމިކް ޑިވޮލޮޕްމަންޓުން ބުނެފިއެވެ.
ސަރުކާރުގެ އޮފީސް ތަކުގެ މަސައްކަތްތަކާ ގުޅޭގޮތުން "ނުވަގަޑި މީޑިއާ" ގެ ނަމުގައި މީޑިއާއަށް މައުލޫމާތު ދިނުމަށް ކުރިއަށްގެންދާ ސިލްސިލާ ބައްދަލުވުން ތަކުގެ ތެރެއިން، ބުދަ ދުވަހު މީޑިއާއާ ބައްދަލު ކުރައްވައި އިންވެސްޓް މޯލްޑިވްސްގެ ފަރާތުން އިކޮނޮމިކް މިނިސްޓްރީގެ ސްޓޭޓް މިނިސްޓަރ މުހައްމަދު އިޔާދު ހަމީދު ވިދާޅުވީ، މިނިސްޓްރީން އެންމެ އިސްކަމެއްދީގެން މިހާރު ކުރިއަށްގެންދާ އެއް މަސައްކަތަކީ ގުޅިފަޅުގައި ބައިނަލްއަޤުވާމީ ބަނދަރެއް ތަރައްޤީ ކުރުމުގެ މަސައްކަތް ކަމަށާއި، މި މަސައްކަތުގައި މިހާރު ކުރިއަށްގެންދަނީ މަސައްކަތަށް ބޭނުންވާ ކޮންސަލްޓެންޓެއް އައްޔަނު ކުރުމުގެ މަސައްކަތް ކަމަށެވެ.
އެގޮތުން ކޮންސަލްޓެންޓެއް އައްޔަނު ކުރުމަށްޓަކައި އިއުލާނުކޮށްގެން އެ މަސައްކަތް ކުރިއަށް ގެންދާ ކަމަށާއި، ޖުލައި މަހުގެ ތެރޭގައި ކޮންސަލްޓަންޓް އައްޔަނުކޮށް ކޮންސަލްޓަންޓުގެ މަސައްކަތް ފެށޭނެ ކަމަށް އުއްމީދު ކުރައްވާ ކަމަށް އިޔާދު ވިދާޅުވިއެވެ.
އޭގެ އިތުރުން، މާލޭގެ ވިޔަފާރި ބަނދަރުގެ ޖާގައިގެ ދަތިކަމުގެ ސަބަބުން ވަރަށް ގިނަ ދަތިތަކެއް ރާއްޖެއަށް މުދާ އެތެރެކުރާ ފަރާތްތަކުން އަދި ވިޔަފާރިވެރިން ކުރަމުންދާ ކަމަށާއި، ސަރުކާރުގެ ވިސްނުމަކީ މި ދަތިތަކަށް ލުއެއް ހޯދައިދީ ރާއްޖެއަށް ބޭނުންވާ ފެންވަރުގެ ޒަމާނީ ބަނދަރެއް ގުޅިފަޅުގައި ތަރައްޤީ ކުރުން ކަމަށް ވެސް އިޔާދު ވިދާޅުވިއެވެ.
ރާއްޖޭގެ ވިޔަފާރިވެރިންނަށް ފަސޭހަކޮށް އިޤްތިސާދު އިތުރަށް ފުޅާ ކުރުމަށްޓަކައި ގުޅިފަޅުގައި ވިޔަފާރި ބަނދަރެއް ތަރައްޤީ ކުރުމުގެ މަސައްކަތް މިނިސްޓްރީން ކުރަމުންދާއިރު، ދިވެހިރާއްޖޭގެ އުތުރާއި ދެކުނުގައި ބައިނަލްއަގްވާމީ ފެންވަރުގެ ވިޔަފާރި ބަނދަރެއް ގާއިމްކުރުމަށް ކޮންސަލްޓެންސީ މަސައްކަތް ކޮށްދޭނެ ފަރާތެއް ހޯދަން ދާދި ފަހުން ފިނޭންސް މިނިސްޓްރީން އިއުލާނު ކޮށްފައިވެއެވެ. އެގޮތުން ފިނޭންސް މިނިސްޓްރީން ގެޒެޓުގައި ކޮށްފައިވާ އިއުލާނެއްގައި ބުނެފައިވަނީ، ކޮންސަލްޓަންސީ މަސައްކަތުގައި ހިމެނެނީ ރާއްޖޭގެ އުތުރާއި ދެކުނުގައި ބައިނަލް އަޤްވާމީ ބަނަދަރެއް ތަރައްގީ ކުރުމަށްޓަކައި ސްކޯޕިންގ މަސައްކަތް ކުރުމާއި، ފީސިބިލިޓީ އެނަލިސިސް ހެދުމާއި ޕްރޮޖެކްޓު އެކުލަވައިލުމާއި، ޓްރާންސެކްޝަން އެޑްވައިޒަރީ މަސައްކަތް ކުރުން ކަމަށެވެ.
