ޝިދާތާ ހާޒިރުކުރަން ބާއްވާ ކޮމިޓީ ސިއްރުކޮށްފި
29 ޖޫން 2019 | ހޮނިހިރު 16:15ސިއްރު ކުރީ މެމްބަރުންގެ އިއްތިފާގުން
ޖެންޑާ ކޮމިޓީގެ ބައްދަލުވުން ކުރިޔަށް ދަނީ - ކޮމިޓީ ވަނީ ސިއްރުކޮށްފައޮ
ދައުލަތުގެ ބެލުމުގެ ދަށުގައި ހުއްޓާ ގެއްލުނު ޝައިމް އަބްދުﷲ މައްސަލައިގައި ޖެންޑާ މިނިސްޓަރު ޝިދާތާ ޝަރީފު ހާޒިރުކުރަން ރައްޔިތުންގެ މަޖިލިހުގެ ހިއުމަން ރައިޓްސް އެންޑް ޖެންޑަރ ކޮމިޓީން ބާއްވާ ކޮމިޓީ ސިއްރުކޮށްފިއެވެ.
ޝައިމް ގެއްލިގެން ހޯދާތާ 12 ދުވަސް ވަނީ ވެފައެވެ. އޭނާ ހޯދުމުގެ މަސައްކަތް ފުލުހުން ކުރަމުންދާއިރު އަދިވެސް އޭނާ އެއް ނުފެނެއެވެ. އޭނާ ގެއްލުނީ ޖެންޑަރ މިނިސްޓްރީގެ އިހުމާލުކަމަށް ޝިދާތާ ވަނީ އެއްބަސްވެފައެވެ. އެ ކުއްޖާ ފިލީ ވިލިގިލީގައި ހުންނަ ކުޑަކުދިންގެ ހިޔާގައި ހުއްޓާއެވެ.
ކޮމިޓީ ފެށުމާއި އެކު އެ މައްސަލަ އަކީ ކުޑަކުދިންގެ ހައްގުތައް ރައްކާތެރި ކުރުމުގެ ގާނޫނުގެ ދަށުން އެ ކުއްޖާގެ ހައްގަށް އުނިކަމެއް ލިބިދާނެ ކަމަށް ލަފާކުރެވޭތީވެ ކޮމިޓީގެ އިއްތިފާގުން ނިންމީ ކޮމެޓީ ސިއްރުކުރާށެވެ.
ހިންނަވަރު ދާއިރާގެ މެމްބަރު ޖީހާން މަހުމޫދު މުގައްރިރުކަން ކުރައްވާ އެ ކޮމޓީ ސިއްރުކުރަން ނިންމި ޝިދާތާ ކޮމިޓީއަށް ވަޑައިނުގަންނަވަނިކޮށެވެ.
ކޮމިޓީ އަށް ޝިދާތާ ހާޒިރު ކުރަން ނިންމީ ޝައިމް ގެއްލުނު މައްސަލަ އާއި ގުޅޭ ގޮތުން މައުލޫމާތު ސާފުކުރުމަށެވެ.
