އައިފޯން ޑިޒައިން ކުރި ޖޯނީ އައިވް، އެޕަލް ދޫކޮށް އެހެން މިސްރާބަކަށް!
29 ޖޫން 2019 | ހޮނިހިރު 05:32ކުންފުނީގެ ސިގްނޭޗަރ ޑިޒައިނަށް އުފެއްދުންތައް ޑިޒައިން ކުރީ ޖޯނީ އައިވް
ޖޯނަތަން އައިވް
ދުނިޔޭގައި ނަން މަޝްހޫރު އެއް ބްރޭންޑް ކަމުގައިވާ އެޕަލްގެ އުފެއްދުންތަކުގެ ތެރޭގައި ހިމެނޭ އައިފޯން، އައިޕެޑް އަދި އައިމެކް ޑިޒައިން ކުރި، ޖޯނަތަން އައިވް (ޖޯނީ އައިވް) އެ ކުންފުނި ދޫކޮށް ދާން ތައްޔާރުވެއްޖެއެވެ.
އެޕަލް ކުންފުނީގެ ކޯ ފައުންޑަރ ސްޓީވް ޖޮބްސް އާއެކު ދާދި ކައިރީގައި މަސައްކަތް ކޮށް އެއް ޓްރިލިއަން ޑޮލަރަށް ވުރެ މައްޗަށް އެ ކުންފުނީގެ ފައިދާ ގެންގޮސްދިން އައިވް ނިންމާފައިވަނީ މިއަހަރު ތެރޭ އެޕަލް އިން ވަކިވެ އަމިއްލަ ކުންފުންޏެއް އުފެއްދުމަށެވެ.
އެޕަލް ކުންފުނިން ބުނެފައިވަނީ އައިވްގެ އާ ދަތުރުގައިވެސް އެ ކުންފުނީގެ އުފެއްދުންތަކުގެ މަސައްކަތް އޭނާ ކުރާނެ ކަމަށެވެ. އަދި އޭނާ ކުންފުނިން ވަކި ވަނީ ކޮން ތާރީހެއްގައި ކަމެއް އެ ކުންފުނިން އަދި ހާމަ ކޮށްފައެއް ނުވެއެވެ.
އެ ކުންފުނީގެ އުފެއްދުންތަކުގެ ތެރޭގައި އޭނާ ހަރަކާތްތެރިވާން ފެށީ 1990 ގެ އަހަރު ތަކުގައެވެ. އަދި އެ ކުންފުނީގެ ސިގްނޭޗަރ ޑިޒައިނަށް (ފޯނުގެ ކަންތައް ވައް ބައްޓަމަށް) އުފެއްދުންތައް ޑިޒައިން ކުރީވެސް އޭނާއެވެ.
ގިނަ މީހުން ގަބޫލު ކުރާ ގޮތުގައި އެޕަލް ބްރޭންޑްގެ އުފެއްދުންތައް ހަމައެކަނި ވަޔަރު ތަކަކާއި ފޮށިތަކެއް ހެން ފެންނަން ހުރުމަށްވުރެ، ފުރިހަމަ ކަމެއް އެ އުފެއްދުންތަކަށް ގެނުވައިދިނީވެސް އައިވް އެވެ.
އައިވް އެޕަލް ކުންފުންޏާ ގުޅުނީ 19992 ވަނަ އަހަރުއެވެ. އޭނާ އެ ކުންފުންޏާ އެންމެ ފުރަތަމަ ގުޅުނީވެސް ސީނިއަރ ޑިޒައިނަރެއްގެ ގޮތުގައެވެ. އަދި ޖޮބްސް އޭނާގެ މަގާމު ސީނިއަރ ވައިސް ޕްރެޒިޑެންޓް އޮފް އިންޑަސްޓްރިއަލް ޑިޒައިންސް އަށް މަތި ކޮށްދީފައިވެއެވެ.
