ޢިމާރާތްކުރުމަށް ބޭނުންކުރާ 6 ބާވަތެއްގެ ތަކެތި މިއަދުން ފެށިގެން ހުއްދައާ ނުލާ އެތެރެކުރުން މަނާކޮށްފި
28 ޖޫން 2019 | ހުކުރު 10:00މި މަސައްކަތަކީ މިނިސްޓްރީއާއި ކަސްޓަމްސް ސާރވިސްއާއި ގުޅިގެން ކުރާ މަސައްކަތެއް
މާލޭގެ ކޮންސްޓްރަކްޝަން ސައިޓެއް
ޢިމާރާތްކުރުމަށް ބޭނުންކުރާ 6 ބާވަތެއްގެ ތަކެތި މިއަދުން ފެށިގެން ހުއްދައާ ނުލާ އެތެރެކުރުން މަނާކޮށްފިއެވެ.
މިނިސްޓްރީ އޮފް ނޭޝަނަލް ޕްލޭނިންގ އެންޑް އިންފްރާސްޓްރަކްޗަރ އިން ނެރުނު ބަޔާނެއްގައި ބުނީ، ޢިމާރާތްކުރުމަށް ބޭނުންކުރާ ތަކެތި އެތެރެކުރުމާއި އުފެއްދުން ކޮންޓްރޯލްކުރުމުގެ ޤަވާއިދާއި އިމާރާތްކުރުމުގެ މަސައްކަތަށް ބޭނުންކުރާ ތަކެއްޗާއި ތަކެތި ޓެސްޓްކުރާ ފަރާތްތަކުގެ ޤަވާއިދު ތަންފީޒުކުރަން ފެށުމާއެކު، 6 ބާވަތެއްގެ ތަކެތި ހުއްދަ ނުހޯދާ އެތެރެކުރުމާއި, އުފެއްދުން މަނާވެގެންދާނެ ކަމަށެވެ. އެގޮތުން މި މަސައްކަތަކީ މިނިސްޓްރީ އާއި ކަސްޓަމްސް ސާރވިސް އާއި ގުޅިގެން ކުރާ މަސައްކަތެއް ކަމަށާއި، މިނިސްޓްރީން ދޫކުރާ ހުއްދައާ ނުލައި ކަސްޓަމްސް އިން އެތަކެތި ދޫ ނުކުރާނެ ކަމަށްވެސް ބަޔާނުގައި ބުނެފައިވެއެވެ.
މިނިސްޓްރީން ބުނީ މިނިސްޓްރީން ދޫކުރާ ހުއްދަ ނެގުމުގެ ކުރިން "އިމާރަތް ކުރުމުގެ އަމަލީ މަސައްކަތް ކުރާ ފަރާތްތަކުގެ ޤަވާއިދު" ގައި ރަޖިސްޓްރީވާން ޖެހޭނެެކަމަށެވެ. އަދި އިމާރަތް ކުރުމަށް ބޭނުންކުރާ ތަކެތި ޓެސްޓު ކުރާ ފަރާތްތަކުންވެސް 28 ޖޫންއިން ފެށިގެން މިނިސްޓްރީގައި ރަޖިސްޓްރީނުކޮށް ޚިދުމަތް ދިނުމަކީ މަނާ ކަމެއް ކަމަށް މިނިސްޓްރީން ބުންޏެވެ. އެފަރާތްްތައް މިނިސްޓްރީގައި ރަޖިސްޓްރީ ވުމަށް އާންމުކޮށް ހުޅުވާލާފައިވާ ކަމަށްވެސް މިނިސްޓްރީގެ ބަޔާނުގައި ބުނެފައިވެއެވެ.
