އެންމެ ފުރަތަމަ ނަރަކައަށް އެއްލާލެވޭ 3 މީހުންގެ ތެރޭގައި ރެއާ ދުވާލު ސަދަޤާތް ކުރާ މީހަކުވޭ: ޚުތުބާ
28 ޖޫން 2019 | ހުކުރު 08:12ތިމާގެ ދީލަތިކަން އެހެން މީހުންނަށް ދެއްކުމުގެ މަޤްސަދުގައި ސަދަގާތް ނުކުރުމަށް ގޮވާލާފައިވޭ
ހުކުރު ޚުތުބާ
ޤިޔާމަތް ދުވަހު އެންމެ ފުރަތަމަ ނަރަކައަށް އެއްލާލެވޭ 3 މީހުންގެ ތެރޭގައި ރެއާ ދުވާލު ސަދަޤާތް ކުރާ މީހަކު ހިމެނޭނެ ކަމަށް ހުކުރު ޚުތުބާގައި ބުނެފިއެވެ.
" ސަދަޤާތް ކުރުމުގެ މުހިއްމުކަން" މި މައުޟޫގެ މައްޗަށް ބިނާކޮށްފައިވާ ޚުތުބާގައި ބުނީ، ޤިޔާމަތް ދުވަހު އެންމެ ފުރަތަމަ ނަރަކައަށް އެއްލާލެވޭ ތިން މީހުންގެ ތެރޭގައި ރެއާއި ދުވާލު އޭނާގެ މުދަލުން ސަދަޤާތްކޮށް އުޅުނު މީހަކު ހިމެނޭނެ ކަމަށާއި، އޭގެ ތެރޭގައި ތިމާގެ ދީލަތިކަން އެހެން މީހުންނަށް ދެއްކުމުގެ މަޤްސަދުގައި ސަދަޤާތްކުރާ މީހުން ހިމެނޭ ކަމަށެވެ. އެގޮތުން މީހުންގެ ތައުރީފުގެ ބަސްތައް ހޯދުމަށް ސަދަޤާތް ކުރާ މީހާއަށް އޮތީ ނަރަކަ ކަމަށް ޚުތުބާގަައި ބުނެފައިވެއެވެ.
ޚުތުބާގައި އިތުރަށް ބުނީ، ސަދަޤާތް ދިނުމަކީ ސިއްރާއި ފާޅުގައިވެސް ކުރެވިދާނެ ކަމެއް ކަމަށާއި، މި ދެ ގޮތަކީވެސް ދަރުމައާއި ސަވާބު ލިބޭނެ ގޮޮތެއް ކަމަށްވިޔަސް ބޮޑަށް މޮޅު އިތުރުވެގެންވަނީ ސިއްރުން ސަދަޤާތް ކުރުން ކަމަށެވެ. އެގޮތުން ސިއްރުން އަދާކުރެވޭ އަޅުކަމަށް ﷲ ގެ ހަޟްރަތުގައި ޚާއްސަ މަޤާމެއް ދެވިފައިވާ ކަމަށްވެސް ޚުތުބާގައި ބުނެފައިވެއެވެ.
އޭގެ އިތުރުން، ހަތް ބާވަތެއްގެ މީހުންނަށް ޤިޔާމަތް ދުވަހުން އަރުޝީގެ ހިޔާވަހިކަން ލިބިގެންދާއިރު، އޭގެ ތެރޭގައި ކަނާއަތުން ވައަތަށްވެސް ނޭނގޭހާ ސިއްރުން ސަދަޤާތް ކުރާ މީހުން ހިމެނޭ ކަމަށް ޚުތުބާގައި ބުނެފައިވެއެވެ. އެގޮތުން އެފަދަ މީހުންނަކީ އެމީހުންގެ ކިބައިގައި އިހުލާސްތެރި ކަމުގެ ނިއުމަތް ރަނގަޅަށް އަށަގެންފައިވާ މީހުން ކަމަށާއި، އެއީ ނަސީބުވެރިން ކަމަށް ޚުތުބާގައި ވަނީ ސިފަ ކުރައްވާފައެވެ.
