ސަރުކާރުގެ ބައެއް ކުންފުނިތަކުގެ މަޤްސަދު އެންމެ ފުރިހަމައަށް އަދާކުރަމުން ނުދާ ކަމަށް ރައީސުލް ޖުމްހޫރިއްޔާ އިބްރާހީމް މުހައްމަދު ސޯލިހް ވިދާޅުވެއްޖެއެވެ.
ސަރުކާރު ހިއްސާވާ ކުންފުނިތަކުގެ މަހާސިންތާ 2019 ޝަރަފުވެރިކޮށްދެއްވާ ވާހަކަފުޅު ދައްކަވަމުން ރައީސް ވިދާޅުވީ މިއަދު ސަރުކާރާއި ކުންފުނިތަކުގައި ވެސް ކޮރަޕްޝަނަށް މަގުފަހިވުމަށް އޮތް އެންމެ ބޮޑު ދިމާލަކީ ޕްރޮކިއުމަންޓާއި ބިޑްތަކަށް ހުޅުވާލުމަށް ދިމާވެފައިވާ މައްސަލަ ކަމަށާއި ކުންފުނިތަކުގެ މަޤްސަދު އެންމެ ފުރިހަމައަށް އަދާކުރެވިގެން ނުދާ ކަމަށެވެ. އަދި ސަރުކާރު ކުންފުނިތަކަކީ ރައްޔިތުންގެ ފައިސާއިން އުފައްދާފައިވާ ކުންފުނިތައް ކަމަށާއި ކޮންމެ ކުންފުންޏެއް ވެސް ވާންޖެހޭނީ ޒިންމާދާރު ކަމާއެކީގައި ރައްޔިތުންނަށް ޖަވާބުދާރީވެވޭ ކުންފުންނަކަށް ކަމަށް އެމަނިކުފާނު ވިދާޅުވި އެވެ.
މިއަދު ސަރުކާރާއި ކުންފުނިތަކުގައި ވެސް ކޮރަޕްޝަނަށް މަގުފަހިވުމަށް އޮތް އެންމެ ބޮޑު ދިމާލަކީ ޕްރޮކިއުމަންޓާއި ބިޑްތަކަށް ހުޅުވާލުމަށް ދިމާވެފައިވާ މައްސަލަ. އެހެންކަމުން ކުންފުނިތަކުގެ ޕްރޮކިއުމަންޓާއި ބިޑް ކުރުމުގެ ކަންތައްތައް ކުރަންވާނީ މިހާރަށްވުރެ ހާމަކަން ބޮޑު ގޮތަކަށް ނުފޫޒުން އެއްކިބާވެގެން. މިހާރު ހުރި ކުންފުނިތަކަށް ބަލާއިރު ބައެއް ކުންފުނިތަކުގެ މަޤްސަދު އެންމެ ފުރިހަމައަށް އަދާކުރަމުންދާ ކަމަށް ދެންނެވޭކަށް ނެތް. އެހެންނަމަވެސް ވަރަށް ރަނގަޅަށް ހިނގާ ކުންފުނިތައް ހުރިކަން މި ފުރުސަތުގައި ފާހަގަކޮށްލަން. މިދެންނެވި ސަބަބުތަކަށްޓަކައި ކުންފުނިތަކުގެ މަޤްސަދު ހާސިލު ކުރެވޭނެ އީޖާދީ ކަންކަން ހޯދާ ކުންފުނިތަކުގެ މިސްރާބު އަލުން ސީދާކުރުމަކީ ހާއްސަ ސަމާލުކަމެއްދީގެން ކުރަންޖެހޭ ކަމެއް.
ސަރުކާރުގެ ކުންފުނިތަކަކީ ރާއްޖޭގެ އިޤްތިސާދު ކުރިއެރުވުމަށް މުހިންމު ރޯލެއް އަދާކުރާ ބައެއްކަން ފާހަގަކުރައްވާ ރައީސް ސޯލިހް ވިދާޅުވީ އެންމެ މުހިންމު ކަމަކީ ކޯޕަރޭޓް ގަވަނަންސްއާ އެއްގޮތަށް ކުންފުނިތައް ބައްޓަން ކުރުން ކަމުގައެވެ. އަދި ކުންފުނިތައް ހިންގަމުންދާ ގޮތުގެ މައުލޫމާތު މިހާރަށްވުރެން ބޮޑަށް އާންމު ރައްޔިތުންނާއި ހިއްސާކުރުމަށް އެމަނިކުފާނު އެދިވަޑައިގެންނެވިއެވެ.
ސަރުކާރުގެ ކޮންމެ މަޤާމެއްގައި ހުރި ކޮންމެ ބޭފުޅަކު ވިޔަސް، ކޮރަޕްޝަންގެ އަމަލެއް ހިންގުމަށް މި ސަރުކާރުން ކުޑަ ވެސް ފުރުސަތެއް ނުދޭނެ ކަމަށް ރައީސް ސޯލިހް ވިދާޅުވިއެވެ.
