ފަސް ދުވަހުގެ މުއްދަތަށް ކުރިޔަށް ގެންދިޔަ "ރަންނަމާރި ހަންޓް 2019" ނިންމާލައިފި
27 ޖޫން 2019 | ބުރާސްފަތި 13:36އެކްސަސައިޒް ފެށީ މި މަހުގެ 23 ވަނަ ދުވަހު
ރަންނަމާރި ހަންޓު އެކްސަސައިޒްގެ ތެރެއިން
ސިފައިން އަދާކުރަން ޖެހޭ އޮޕަރޭޝަނަލް ޓާސްކުތަކަށް ތަމްރީނުކޮށް، ސިފައިންގެ ޤާބިލުކަން އިތުރުކުރުމަށް ކޮންމެ އަހަރަކު ބާއްވަމުން އަންނަ އެކްސަސައިޒް "ރަންނަމާރި ހަންޓް" ގެ މިއަހަރުގެ ސިލްސިލާ ކާމިޔާބުކަމާ އެކު ބުރާސްފަތި ދުވަހު ނިންމާލައިފިއެވެ.
އެމްއެންޑީއެފް މާލޭ އޭރިއާގެ އިތުރުން، އެމްއެންޑީއެފް ނޮދަން އޭރިއާގެ ބައެއް ރަށްތަކުގައި ކުރިއަށްގެންދިޔަ މި އެކްސަސައިޒް ފެށީ މިމަހުގެ 23 ވަނަ ދުވަހުގެ ހެނދުނު 08:30 ގައެވެ.
ބުރާސްފަތި ދުވަހުގެ ނިޔަލަށް ކުރިއަށްގެންދިޔަ އެ އެކްސަސައިޒްގެ ތަމްރީނުތައް ބާއްވާފައިވަނީ، އެމްއެންޑީއެފް މާލޭ އޭރިއާގެ އިތުރުން އެމްއެންޑީއެފް ނޮދަން އޭރިއާގެ ބައެއް ރަށްތަކާއި، އެ ސަރަޙައްދުތައް ހިމެނޭ ކަނޑުގެ ސަރަޙައްދުތަކުގައި ކަމަށް އެމްއެންޑީއެފް އިން މައުލޫމާތުދެއެވެ.
މި ދެ އޭރިއާގައި ގުޅިގެން ކުރިއަށްގެންދިޔަ އެކްސަސައިޒްގައި، އެމްއެންޑީއެފް މާލޭ އޭރިއާގައި ކުރިއަށްދިޔަ ތަމްރީނުތައް، މާލެ، ހުޅުލޭ، ހުޅުމާލެ އަދި ކ.ތިލަފުށި ސަރަޙައްދުގައި ބޭއްވިއިރު، އެމްއެންޑީއެފް ނޮދަން އޭރިއާއިން ރ. އަތޮޅުގެ ބައެއް ސަރަޙައްދުތަކުގައި ކުރިއަށް ގެންގޮސްފައިވެއެވެ."ފައިނަލް އެކްސަސައިޒް" ބާއްވާފައިވަނީ، ރ.ކިނޮޅަހުގައެވެ.
