ފިލްމް ޕްރޮޑިއުސަރ ކަރަން ޖޯހަރު ވަނީ "ދޯސްތާނާ 2" ހަދަން އުޅޭކަން ބުރާސްފަތި ދުވަހު އިއުލާން ކޮށްފައެވެ.
މި ފިލްމްގައި ލީޑް ރޯލަށް ޖާންވީ ކަޕޫރާއި ކާތިކް އާރްޔަން ހަމަޖައްސާފައިވާއިރު ބަތަލްގެ ރޯލް އަދާކުރާނެ އިތުރު ތަރިއެއް ހޯދަމުންދާ ކަމަށް ކަރަން ވަނީ ބުނެފައެވެ.
2008 ވަނަ އަހަރު ރިލީޒް ކުރި "ދޯސްތާނާ" ގައި ލީޑްރޯލުން ފެނިގެން ގޮސްފައިވަނީ ޕްރިޔަންކާ ޗޯޕްރާ އާއި އަބީޝެކް ބަޗަން އަދި ޖޯން އަބްރަހަމް އެވެ.
މި ފިލްމްގެ ޕްރޮޑަކްޝަން ޓީމާއި ގާތް މީހަކާ ހަވާލާދީ ރިޕޯޓްތައް ބުނާގޮތުން "ދޯސްތާނާ" އެހާ ކާމިޔާބު ފިލްމަކަށް ވެގެން ގޮސްފައިވަނީ މަޖާ ގޮތަކަށް މިފިލްމުގެ ވާހަކަ ގެނެސްދީފައިވާތީ ކަމަށެވެ. މި ފިލްމްގެ ސީކުއެލްވެސް އެފަދަ މަޖާގޮތަކަށް ބެލުންތެރިންނަށް ގެނެސްދިނުމަށް ކަރަން ބޭނުންވާކަމަށް މަސްދަރުން ވަނީ ބުނެފައެވެ. އަދި ޓީމުން މިވަގުތު ދަނީ ފިލްމްގެ ސްކްރިޕްޓް ތައްޔާރު ކުރުމުގެ މަސައްކަތް ކުރަމުން ކަމަށް ވަނީ ބުނެފައެވެ.
މި ފިލްމް ވެގެން ދާނީ ކަރަން ގެ ފިލްމެއްގައި ކާތިކް މަސައްކަތް ކުރާ ފުރަތަމަ ފިލްމަށެވެ.
"ދޯސްތާނާ" ގައި ފެނިގެންދަނީ އަބީޝެކް ބަޗަން އާއި ޖޯން އަބްރަހަމް، ޕްރިޔަންކާ ޗޯޕްރާދެކެ ލޯބިވެގެން އުޅޭ މަންޒަރެވެ. ނަމަވެސް އެމީހުން ދިރިއުޅެމުން ގެންދިޔައީ ޕްރިޔަންކާގެ އެޕާޓްމަންޓްގައި ގޭ ކަޕުލް އެއްކަމަށް ހެދިގެންނެވެ.
މި ފިލްމްގައި ޚާއްސަ ފެނިލުމަކުން ބޮބީ ޑިއޯލް ވެސް ފެނިގެން ދެއެވެ.
