ޕްރިންސެއް ކަމަށް ހެދިގެން އެތައް ނާޖާއިޒް ފައިދާތަކެއް ހޯދަމުން ދިޔަ މީހަކު ހޯދުމުގެ މަސައްކަތް އިޓަލީ ފުލުހުން ފަށައިފިއެވެ.

ޕްރިންސް ސްޓެފަންގެ ނަމުގައި އަގު ބޮޑެތި ރެސްޓޯރެންޓުތަކުން ހިލޭ ކެއުމާއި، އަގު ބޮޑެތި ހޮޓާތަކުގައި އެންމެ ލާރިއެއްވެސް ހަރަދު ނުކޮށް ހުރުމާއި، ދުނިޔޭގެ މަޝްހޫރު މީހުންނާ ބައްދަލު ކޮށް ފައިދާތަކަށް ނަގަމުން ދިޔަ މި މީހާ އުޅުނީ މޮންޓެނިގްރޯ އެންޑް މެސެޑޯނިއާގެ ޕްރިންސެއް ކަމަށް ހެދިގެންނެވެ.

އޭނާ ވަނީ ޕްރިންސް ސްޓެފަންގެ ނަމުގައި ފޭސްބުކް ޕޭޖަކާއި ވެބްސައިޓެއް ވެސް ހަދާފައެވެ. ތަންތަނަށް ދާއިރު އޭނާގެ ގާތުގައި މީހަކުވެސް ގެންގުޅެއެވެ. އެއީ "ސަފީރެއްގެ" ގޮތުގައި އޭނާ ތައާރުފް ކޮށްދޭ މީހެކެވެ. އިޓަލީގެ ފުލުހުން ގެންދަނީ ފޭކް އެމްބެސެޑަރު ހޯދުމުގެ މަސައްކަތްވެސް ކުރަމުންނެވެ.

އިޓަލީގައި މި ދެމީހުން ތަންތަނަށް ދަތުރުކޮށް އުޅުނީ މާސިޑީޒް ކާރެއްގައެވެ. އޭގައި ހުންނަނީ ރިޕަބްލިކް އޮފް މޮންޓެނެގްރޯގެ ޑިޕޮލޮމެޓިކް ޕްލޭޓް އާއި ދިދަ ހަރުކޮށްފައެވެ.

މޮންޓެނެގްރޯ އަކީ އިރުމަތީ ޔޫރަޕަށް ނިސްބަތްވާ ކުޑަކުޑަ ގައުމެކެވެ.

ފޭކް ޕްރިންސާއި އޭނާގެ ފޭކް އެމްބެސެޑަރު ފައިދާތައް ހޯދަމުން އިޓަލީގެ އެތަންމިތާގައި އުޅެމުންދަނިކޮށް މި މީހުންނަކީ ފޭކް ބައެއް ކަމުގެ ތުހުމަތު ކުރެވެން ދިމާވީ، ހުސްވި އަހަރުގެ އޮގަސްޓު މަހު އިޓަލީގެ ޕުލްގިއާގެ އަގު ބޮޑު ރިސޯޓެއްގައި ހަފްތާއެއް ވަންދެން ތިބުމަށްފަހު ހޮޓަލުން ނުކުތުމުން އެ ދެމީހުންގެ ބިލް މޮންޓެނެގްރޯގެ ފޮރިން މިނިސްޓްރީއަށް ފޮނުވުމުން އެ ބިލަށް ފައިސާ ދެއްކުމަށް އިންކާރު ކުރި ހިސާބުންނެވެ.

އެ ހިސާބުން އިޓަލީގެ ފުލުހުން ތަހުގީގު ފަށާ، އެ ދެމީހުންގެ މައްޗަށް ކުރެވޭ ތުހުމަތާ ގުޅޭ ހެކި ހޯދަން ފެށިއެވެ.

ފޭކް ޕްރިންސްގެ ފޭސްބުކް ޕޭޖް ހަދާފައިވަނީ 2014 ވަނަ އަހަރުގެ ފެބްރުއަރީ މަހުގައެވެ. އެ ޕޭޖްގައި ޕްރިންސް ބައްދަލުކޮށްފައިވާ މީހުންނާ އެކު ނަގާފައިވާ ފޮޓޯ ތަކާއި، އޭނާ އެކި ނަންނަމުގައި ލަގަބު ދީފައިވާ މީހުންގެ ފޮޓޯތައްވެސް ހުއްޓެވެ. އޭގެ ތެރޭގައި ޕޮލިޓީޝަނުންނާއި، ވިޔަފާރިވެރިންނާއި، ޑިޕްލޮމެޓުންނާއި، ފިލްމީ ތަރިންފަދަ މީހުން ހިމެނެއެވެ. ޕްރިންސެއް ކަމަށް ހެދިގެން އިޓަލީގެ މި މީހާ ބައްދަލު ކުރި މަޝްހޫރު މީހުންގެ ތެރޭގައި ޕަމެލާ އެންޑަސަން ހިމެނެއެވެ. ޕަމެލާ މި ފޭކް ޕްރިންސްގެ މަޅީގައި ޖެހި އޭނާގެ އަތުން ޝަރަފެއްވެސް ވަނީ ހޯދާފައެވެ. އަދި އެ ޝަރަފް ދިން ރަސްމިއްޔާތުގެ ފޮޓޯވެސް އޭނާގެ އިންސަޓަގްރާމްގައި ޕޯސްޓްވެސް ކުރިއެވެ.

އިޓަލީގެ ނޫހެއް ކަމަށްވާ އަންސާއިން ބުނެފައިވާ ގޮތުގައި، މި ދެމީހުންގެ މަގްސަދެއް ކަމަށް ބެލެވެނީ ޔޫރަޕްގެ އެކި އަގު ބޮޑު ތަންތާގައި ހިލޭ ތިބުމާއި، ޚިދުމަތް ހޯދުމެވެ.

މޮންޓެނެގްރޯގެ ޕްރިންސަކަށް ހެދިގެން މި ހުރިހާ ކަމެއް އިޓަލީގެ އުމުރުން 57 އަހަރުގެ މި މީހާ ކުރަމުން ދިޔައިރު، 1918 ގެ ފަހުން މޮންޓެނެގްރޯ އަކީ ރަސްކަމެއް އޮންނަ ގައުމެއްވެސް ނޫނެވެ.