ގައުމީ ޔުނިވަރސިޓީގެ ފެކަލްޓީއަކަށް އިސްލާމިކް ޔުނިވަރސިޓީ ހަދައިފި ނަމަ މާ ރަނގަޅު ތައުލީމެއް ފޯރިކޮށްދެވޭނެ: މެމްބަރުން
24 ޖޫން 2019 | ހޯމަ 09:36ސިޔާސީ ނުފޫޒުން ޔުނިވަރސިޓީ މިނިވަން ކުރަންޖެހޭ
މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ
މޯލްޑިވްސް ނޭޝަނަލް ޔުނިވަރސިޓީ (އެމްއެންޔޫ) އާއި އިސްލާމިކް ޔުނިވަރސިޓީ އޮފް މޯލްޑިވްސް (އައިޔޫމް) އެއްކޮށްލައި ގައުމީ ޔުނިވަރސިޓީގެ ފުރާޅުގެ ދަށުގައި ހިނގާ ފެކަލްޓީއަކަށް ހަދައިފި ނަމަ މާރަނގަޅު ފެންވަރުގެ ތައުލީމު ދެވޭނެ ކަމަށް ރައްޔިތުންގެ މަޖިލީހުގެ ގިނަ މެމްބަރުން ބުނެފިއެވެ.
އިސްލާމީ ޔުނިވަރސިޓީގެ ގާނޫނަށް އިސްލާހު ގެންނަން ސަރުކާރުން ރައްޔިތުންގެ މަޖިލީހަށް ހުށަހެޅި ބިލަށް ބަހުސްކުރައްވަމުން މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ ވިދާޅުވީ ދަރިންނަށް ދެވޭ ތައުލީމަކީ އެންމެ ކޮލެޓީ ތައުލީމު ކަމަށް ވާންޖެހޭ ކަމަށާއި، އެގޮތަށް ސަރުކާރު މަސައްކަތް ކުރުމަކީ ކޮންމެހެން ބޭނުންތެރިކަމެއް ކަމަށެވެ.
މެމްބަރު އިމްތިޔާޒު ވިދާޅުވީ ޔުނިވަރސިޓީތައް ހިންގާއިރު އެތަންތަނަކީ ސިޔާސީ ކުލަވަރުޖެހި، ސިޔާސީ ނުފޫޒު ވަދެފައިވާ ތަންތަނުގައި ބަދަލުގައި އެކަޑަމިކް ގޮތަކަށް ރާއްޖޭގެ ދަރިވަރުންނަށް އެންމެ ފުރިހަމަ ގޮތަކަށް ތައުލީމު ދެވޭނެ ނިޒާމެއް ގޮތުގައި އެކުލަވާލުމަކީ ކޮންމެހެން ބޭނުންތެރިކަމެއް ކަމަށެވެ. އަދި ކައުންސިލްގައި ހުރިހާ ގިންތިތަކެއް ވެސް އެކުލެވޭނެ ގޮތަކަށް ބަދަލު ކުރުމަކީ މުހިންމު ކަމެއް ކަމަށް މެމްބަރު ވިދާޅުވިއެވެ.
މެމްބަރު އިމްތިޔާޒު ވިދާޅުވީ ދެ ޔުނިވަރސިޓީ އެއްކޮށްލެވިގެން އިސްލާމީ ތައުލީމު ދެވޭނެ ގޮތަށް ގައުމީ ޔުނިވަރސިޓީގެ ދަށުން އިސްލާމީ ފެކަލްޓީއެއް ހިންގުމަކީ ވަރަށް ރަނގަޅު ފެންވަރެއްގައި ދައުލަތަށް ކުރެވޭނެ ކަންތައް ކަމަށެވެ.
ގަމު ދާއިރާގެ މެމްބަރު މުހައްމަދު ވިސާމް ވިދާޅުވީ ޔުނިވަރސިޓީގެ ކައުންސިލް މިނިވަންވާންޖެހޭ ކަމަށާއި، އެކައުންސިލް މިނިވަން ކައުންސިލްއަކަށް ވެގެން ނޫނީ ރާއްޖޭގެ ތައުލީމީ ފެންވަރު ހަރުދަނާ ގޮތެއްގައި ކުރިއަށް ގެންދެވެން ނެތް ކަމަށެވެ.
މެމްބަރު ވިސާމް ވިދާޅުވީ ވޭތުވެދިޔަތަނުގައި ފެނިފައިވަނީ ސިޔާސީ ބައެއް ބޭފުޅުން ނުފޫޒު އެކައުންސިލްގެ މައްޗަށް ބާރުވެރިވެ އެކައުންސިލުން ވަކި ގޮތްތަކަށް ކަންތައް ކުރަމުންދާތަން ކަމަށެވެ.
މެމްބަރު ވިސާމް ވިދާޅުވީ މާލެ ފިޔަވައި އަތޮޅު ތެރޭގައި މިހާރު ގާއިމްވެފައިވާ ޔުނިވަރސިޓީ މަރުކަޒުތައް ނުވަތަ ގޮފިތައް ކައުންސިލްގައި ތަމްސީލް ކުރެވެންޖެހޭ ކަމަށާއި، ކައުންސިލްގައި ތަމްސީލް ކުރެވިގެން ނޫން ގޮތަކަށް އެތަންތަނުގެ ތައުލީމީ ކަންތައްތައް ހަރުދަނާ ކުރެވިގެން ނުދާނެ ކަމަށެވެ.
މެމްބަރު ވިސާމް ވިދާޅުވީ ގަމުގައި ޔުނިވަރސިޓީގެ ކެންޕަހެއް އެޅުމަށް 45 ހެކްޓަރުގެ ބިމެއް ދީފައިވާ ކަމަށާއި، އެކަމުގެ އަމަލީ މަސައްކަތް ފަށާނެ ދުވަހެއްގެ އުންމީދުގައި ރައްޔިތުން އަދިވެސް އެބަތިބި ކަމަށެވެ.
ހިތަދޫ މެދު ދައިރާގެ މެމްބަރު އަހުމަދު ރަޝީދު ވިދާޅުވީ ގައުމީ ޔުނިވަރސިޓީގެ ގާނޫނަށް އަނެއްކާ ވެސް އިސްލާހު ގެންނަން ހުށަހެޅިފައިވާ ބިލަކީ ވަރަށް މުހިންމު ބިލެއް ކަމަށާއި، މިބިލުން ގެނެވޭ އެންމެ މުހިންމު އިސްލާހަކީ އެ އިރެއްގައި އޮންނަ ސަރުކާރެއްގައި ސިޔާސީ ނުފޫޒުން ގައުމީ ޔުނިވަރސިޓީ ސަލާމަތް ކުރެވޭނެ ކަމަށެވެ.
މެމްބަރު ރަޝީދު ވިދާޅުވީ ގައުމީ ޔުނިވަރސިޓީގެ ކައުންސިލް އެކުލެވިގެންވާ ގޮތަށް މިގެނެވޭ އިސްލާހުގެ ސަބަބުން ޑެފިއުޓީ ވައިސް ޗާންސެލަރު ކައުންސިލުން އައްޔަން ކުރެވޭ ކަމަށާއި، ކައުންސިލް މެމްބަރުން އައްޔަންކުރެވޭ ގޮތް ބަދަލުވެގެން ދަނީ މިނިވަންކަމާއި ސިޔާސީ ނުފޫޒެއް ނެތި ބަސްބުނެ ކަންކަން ނިންމޭނެ ގޮތަށް ކަމަށެވެ.
ޔުނިވަރސިޓީގެ ބައެއް ފެކަލްޓީތަކުގައި ދަރިވަރުން ވަރަށް މަދުކަން ފާހަގަކުރައްވައި މެމްބަރު ރަޝީދު ވިދާޅުވީ ޚާއްސަކޮށް ދިވެހިބަހުގެ ޑިގްރީއަށް ކިޔަވާ ކުދިން މަދުކަން ފާހަގަކުރެވޭ ކަމަށާއި، އެހެން ދިމާވަނީ ދިވެހިބަހުން ޑިގްރީ ހާސިލްކުރުމުން ވަޒީފާ ލިބުމުގައި ފުރުސަތު ކުޑަވުމުން ކަމަށް ބެލެވޭ ކަމަށެވެ. އެހެންކަމުން ދިވެހި ބަހުން ޑިގްރީ ހަދާ ދަރިވަރުންނަށް ވެސް ޔުނިވާސިޓީގައި އޮންނަ އެހެން ފެކަލްޓީއަކުން އެކައުންޓް ފަދަ ޕްރޮގްރާމުތަކުގަ ބައިވެރިވެވޭ ގޮތަށް ކަންކަން ހަމެޖެހިފައި އޮތުން މުހިންމު ކަމަށް ވިދާޅުވިއެވެ.
މީގެ އިތުރުން މެމްބަރު ރަޝީދު ވިދާޅުވީ ދެ ޔުނިވަރސިޓީގައި ކަންކަން އޮތީ އެއްގޮތަކަށް ކަމަށް ވާތީ ދެ ޔުނިވަރސިޓީ އެއްކުރެވިއްޖެ ނަމަ ހަރަދުގެ ގޮތުންނާއި، ކިޔަވާދިނުމުގެ އުސޫލަށް ރަނގަޅު ބަދަލުތަކެއް އަންނާނެ ކަމަށެވެ.
ތުޅާދޫ ދާއިރާގެ މެންބަރު ހިސާން ހުސައިން ވިދާޅުވީ ގައުމީ ޔުނިވަރސިޓީގައި އިސްލާމިކް ފެކަލްޓީއެއް ތަރައްގީކުރުމަކީ ވަރަށް މުހިންމު ކަމެއް ކަމަށާއި، އެގޮތަށް އަމަލުކޮށްފި ނަމަ އެ ފެކަލްޓީގައި އިސްލާމީ އިލްމު ޕްރޮގްރާމްތައް ފުޅާކޮށް އިސްލާމީ އިލްމު ދެވޭނެ ކަމަށެވެ.
ދުނިޔޭގައި އަމަލު ކުރަމުންދާ އެންމެ ރަނގަޅު އުސޫލަކީ ވެސް ވަކި މާއްދާތަކަށް ޔުނިވަރސިޓީއެއްގައި ވަކި ފެކަލްޓީތަކެއް ގާއިމު ކުރުން ކަމަށް މެމްބަރު ހިސާން ވިދާޅުވިއެވެ.
