ސްޓެލްކޯ އިން މިއަހަރު ބޮޑެތި މަޝްރޫޢުތަކެއް ފަށަނީ
23 ޖޫން 2019 | އާދީއްތަ 05:32ސްޓެލްކޯގެ 22 ވަނަ އަހަރީ ދުވަސް
ސްޓެލްކޯގެ 22 ވަނަ އަހަރީ ދުވަހު ބޭއްވުނު ދިދަ ނެގުމުގެ ރަސްމިއްޔާތުގެ ތެރެއިން
ސްޓެލްކޯ އިން މި އަހަރުގެ ތެރޭގައި ބޮޑު މަޝްރޫޢުތަކެއް ފަށާނެ ކަމަށް ސްޓެލްކޯގެ މެނޭޖިންގް ޑިރެކްޓަރު، ހަސަން މުޣްނީ ވިދާޅުވެއްޖެއެވެ.
ސްޓެލްކޯގެ 22 ވަނަ އަހަރީ ދުވަހު ބޭއްވި ޚާއްސަ ދިދަ ނެގުމުގެ ޖަލްސާގައި ވާހަކަ ދައްކަވަމުން ހަސަން މުޣްނީ ވިދާޅުވީ ޒަމާނީ ޓެކްނޮލޮޖީ ބޭނުންކޮށްގެން، ޒަމާނީ އުސޫލުތަކާ އެއްގޮތަށް ކުންފުނީގެ ޚިދުމަތްތައް ފުޅާކުރަން ޖެހޭ ކަމަށާއި ކުރިއަރާފައިވާ ގައުމުތަކުގައި ބޭނުންކުރާ ވަސީލަތްތައް ސްޓެލްކޯއަށް ތަޢާރަފް ކުރަން ބޭނުންވާ ކަމަށެވެ.
އެގޮތުން މިއަހަރު، ޕައިލެޓް ޕްރޮޖެކްޓްތައް ކުރިއަށް ގެންދިއުމަށް ގަސްތުކުރާ ކަމަށާއި ސޯލާގެ ބޮޑު ޕްރޮޖެކްޓެއް ވެސް ވަރަށް އަވަސް މުސަތްގުބަލެއްގައި އިއުލާނު ކުރެވިގެންދާނެ ކަމަށް ވިދާޅުވިއެވެ.
މީގެ އިތުރުން ސްޓެލްކޯގެ މުވައްޒަފުންނަކީ އަޚުލާގީ ގޮތުން އެހެން ކުންފުނިތަކަށް ނަމޫނާ ބަޔަކަށް ވާން ޖެހޭ ކަމަށާއި ސްޓެލްކޯގެ މުވައްޒަފުންނަކީ އަބަދު ވެސް "ޕްރޮފެޝަނަލް" ބަޔަކަށް ވުމަށް ހަސަން މުޣްނީ އިލްތިމާސް ކުރެއްވިއެވެ.
ސްޓެލްކޯގެ 22 ވަނަ އަހަރީ ދުވަހު އޮތް ދިދަ ނެގުމުގެ ރަސްމިއްޔާތުގައި ވާހަކަ ދައްކަވަމުން ހަސަން މުޣްނީ ވިދާޅުވީ، ފާއިތުވި ދެ ދިން އަހަރު ސްޓެލްކޯގެ މާލީ ހާލަތު އޮތީ އެންމެ ރަނގަޅަށް ނޫން ކަމަށެވެ. އަދި ބައެއް ފަރާތްތަކުން ސްޓެލްކޯގެ މާލީ ހާލަތު ރަނގަޅު ކަމަށް ބުނި ކަމުގައި ވިޔަސް ހަގީގަތަކީ ހާލަތު އޮތީ އެންމެ ރަނގަޅަކަށް ނޫން ކަމަށެވެ.
ވޭތުވެ ދިޔަ ދެ އަހަރު ތެރޭގައި މާލޭގެ ކެޕޭސިޓީ ކުރިއެރުވުމަށް މާބޮޑު މަސައްކަތްތަކެއް ވެސް ކުރެވިފައި ނެތް ނަމަވެސް މިހާރު އެ ކަންތައްތައް ރަނގަޅުކޮށް އިތުރަށް ކުރިއަރުވަން ކުރަން ޖެހޭ މަސައްކަތްތައް ކުރަމުން ގެންދާ ކަމަށް ސްޓެލްކޯ އިން ބުންޏެވެ.
