ރިމާންޑުގައި ތިބޭ މީހުންނަށް ވަކި އުސޫލެއް ކަނޑައަޅަން ޖެހޭ: މުނާޒު
ރަނގަޅު ކުރަން ޖެހޭ ކަންތައްތައް ގިނަކަމަށް ވިދާޅުވި
މަޖިލީހުގެ ގައުމީ ސަލާމަތާއި ބެހޭ ކޮމިޓީ އަދި ހިއުމަން ރައިޓްސް އެންޑް ޖެންޑަރ ކޮމިޓީ
ޖަލުތަކުގައި ތަހުގީގީ މަރުހަލާގައި ތިބޭ މީހުންނަށް ވަކި އުސޫލެއް ކަނޑައަޅަން ޖެހޭ ކަމަށް ކޮމިޝަނަރ އޮފް ޕްރިޒަންސް އަބްދުﷲ މުނާޒް ވިދާޅުވެއްޖެއެވެ.
ހޮނިހިރު ދުވަހު ރައްޔިތުންގެ މަޖިލީހުގެ ގައުމީ ސަލާމަތާއި ބެހޭ ކޮމިޓީ އަދި ހިއުމަން ރައިޓްސް އެންޑް ޖެންޑަރ ކޮމިޓީއަށް ކޮމިޝަނަރ އޮފް ޕްރިޒަންސް ހާޒިރުކޮށްގެން މެމްބަރުން ކުރިމަތި ކުރެއްވި ސުވާލުތަކަށް ޖަވާބު ދެއްވަމުން މުނާޒް ވިދާޅުވީ، ޖަލުގައި މިހާރު ވަސީލަތްތައް ހުރީ ހުކުމް ކޮށްފައި ތިބޭ މީހުންނާއި ތަހުގީގު މަރުހަލާގައި ބަންދުގައި ތިބޭ މީހުންނާ ވަކިކުރެވޭ ކަހަލަ ގޮތަކަށް ނޫން ކަމަށެވެ.
ރަނގަޅު ކުރަން ޖެހޭ ކަންތައްތައް ގިނަ ކަމަށާއި، ކުށްވެރިންނާއި، ކުށުގެ ތުހުމަތުގެ ބަންދުގައި ތިބޭ މީހުންނަށް ވަކި އުސޫލުތަކެއް ކަނޑައަޅަން ޖެހޭ ކަމަށް ވިދާޅުވިއެވެ.
ހުކުމެއް ނުކުރާ މީހަކު ޔުނީފޯމް ލައްވައިގެން އަތުގައި ބިޑި އަޅުވައިގެން ކޯޓަށް ގެންދިޔުމަކީ އެންމެ ރަނގަޅު ގޮތެއް ކަމަށް ގަބޫލު ނުކުރައްވާ ކަން ފާހަގަ ކުރައްވަމުން މުނާޒު ވިދާޅުވީ، ދާދި ފަހުން އެ ގަވާއިދު ބަދަލުކޮށްފައިވާ ކަމަށެވެ.
މުނާޒް ވިދާޅުވީ، ރިމާންޑު ޖަލުގައި ތިބި ގިނަ މީހުންނަކީ މުއްދަތު ޖަހަން ގެނެސްފައި ތިބި މީހުން ކަމަށެވެ. އެމީހުންގެ މައްސަލަ އަށް ގޮތެއް ނިންމައި ދިނުމަށް ޕޮރޮސެކިއުޓަރ ޖެނެރަލް (ޕީޖީ) ގެ އިތުރުން ސުޕްރީމް ކޯޓުގައި ވެސް އެދިފައިވާ ކަމަށް ވިދާޅުވިއެވެ.
ޖަލުގެ އެކި ގަވާއިދު ތަކާއި އުސޫލުތައް ބަދަލުކޮށްގެން ގިނަ ކަންތައްތަކެއް ކުރެއްވިއްޖެ ކަމަށް ވިދާޅުވިއެވެ. ކުރިން ގައިދީންނަށް ވަކީލުންނާ ބައްދަލު ކުރަން ފުރުސަތު ލިބެނީ ހަމައެކަނި މައްސަލައެއް ކުރިޔަށްދާއިރު ކަން ފާހަގަ ކުރައްވަމުން މުނާޒު ވިދާޅުވީ، މިހާރު ގައިދީން ބޭނުންވާ ކޮންމެ އިރެއްގައި ވަކީލުންނާ ބައްދަލުކުރުމުގެ ފުރުސަތު ލިބޭ ގޮތަށް ހަމަޖައްސާފައިވާ ކަމަށެވެ.
އާއިލާގެ މީހުންނަށް ވެސް ގައިދީންނަށް ބައްދަލު ކުރަން ކުރިޔަށް ވުރެ ގިނަ ވަގުތު މިހާރު ދެވޭނެ ކަމަށް ވެސް މުނާޒު ވިދާޅުވިއެވެ. ބަޖެޓްގެ ތާށިކަމާއި އެހެން ސަބަބުތަކާއި ހުރެ ގިނަ ކަންތައްތަކެއް ކުރެވެން ނެތްކަން އޭނާ ވަނީ ފާހަގަ ކޮށްފައެވެ.
