ރާއްޖޭގެ ދެ ބިތުގައި ވިޔަފާރި ބަނދަރެއް ގާއިމްކުރަން ކޮންސަލްޓަންޓުން ހޯދަނީ
ބައިނަލްއަގްވާމީ ފަރމްތަކުން ދިވެހި ކުންފުނިތަކާއި ގުޅިގެން ޕްރޮޕޯޒަލް ހުށައެޅުމަށް ބާރު އަޅާފައިވޭ
ރާއްޖޭގެ އެންމެ ދެކުނުގައި އޮންނަ އައްޑޫ އަތޮޅު: އުތުރާއި ދެކުނުގައި ވެސް ބަނދަރެއް އަޅަން ހަމަޖެހިފައިވޭ
ދިވެހިރާއްޖޭގެ އުތުރާއި ދެކުނުގައި ބައިނަލްއަގްވާމީ ފެންވަރުގެ ވިޔަފާރި ބަނދަރެއް ގާއިމްކުރަން ކޮންސަލްޓެންސީ މަސައްކަތް ކޮށްދޭނެ ފަރާތެއް ހޯދަން އިއުލާން ކޮށްފިއެވެ.
ފިނޭންސް މިނިސްޓްރީން ގެޒެޓުގައި ކޮށްފައިވާ އިއުލާނެއްގައި ބުނެފައިވަނީ، ކޮންސަލްޓަންސީ މަސައްކަތުގައި ހިމެނެނީ ރާއްޖޭގެ އުތުރާއި ދެކުނުގައި ބައިނަލް އަޤްވާމީ ބަނަދަރެއް ތަރައްގީ ކުރުމަށްޓަކައި ސްކޯޕިންގ މަސައްކަތް ކުރުމާއި، ފީސިބިލިޓީ އެނަލިސިސް ހެދުމާއި ޕްރޮޖެކްޓު އެކުލަވައިލުމާއި، ޓްރާންސެކްޝަން އެޑްވައިޒަރީ މަސައްކަތް ކުރުން ކަމަށެވެ.
ފިނޭންސް މިނިސްޓްރީން ވަނީ މަސައްކަތް ކުރުމަށް ޝައުޤުވެރިވާ ފަރާތްތަކުން ރިކްއެސްޓް ފޯ ޕްރޮޕޯސަލް (އާރްއެފްޕީ) އާ އެއްގޮތަށް ޕްރޮޕޯސަލް ހުށަހެޅުމުގެ ދައުވަތު ޝަރުތުހަމަވާ ހުރިހާ ފަރާތްތަކަށް ހުޅުވާލާފައެވެ.
މިނިސްޓްރީން ވަނީ މިކަމަށް އެދި ހުށައަޅާ ބައިނަލްއަގްވާމީ ފަރމްތަކުން ދިވެހި ކުންފުނިތަކާއި ގުޅިގެން (ޖޮއިންޓް ވެންޗަރ އުސޫލުން) ޕްރޮޕޯޒަލް ހުށައެޅުމަށް ބާރު އަޅާފައެވެ. އަދި ކޮންސަލްޓަންޓުން ކަނޑައެޅުމުގައި މިކަމަށާއި ޕްރޮޕޯޒަލްގެ ފެންވަރާއި އަގަށް ވެސް ރިއާޔަތް ކުރާނެ ކަމަށް ފިނޭންސް މިނިސްޓްރީން ބުނެފައިވެއެވެ. ޕްރޮޕޯޒަލް ހުށައެޅުމުގެ އެންމެ ފަހު ތާރީހަކީ 18 ޖުލައި 2019 އެވެ.
މި ސަރުކާރުން ވަނީ މާލެ ވިޔަފާރި ބަނދަރު ތިލަފުއްޓަށް ބަދަލު ކުރުމުގެ ގޮތުން ހުޅުވާލުމާއެކު، އެ ރަށުގައި ބައިނަލްއަގުވާމީ ބަނދަރެއް ފަރުމާކޮށް، އެ ބަނދަރުގެ މާސްޓަ ޕްލޭން ހަދަން 34 ފަރާތްތަކުން ކުރިމަތިލާފައިވާ ކަމަށް ބުނެފައެވެ.
