ބޭލް އާއި އިސްކޯގެ އިތުރުން 13 ކުޅުންތެރިޔަކު ވިއްކާލަން ރެއާލުން ނިންމައިފި
21 ޖޫން 2019 | ހުކުރު 06:49ރެއާލުން އަންނަނީ ކުރިޔަށް އޮތް ސީޒަނަށް ކުޅުންތެރިން ހޯދަމުން މަސައްކަތް ކުރަމުން
ރެއާލްއަށް ކުޅެމުން އަންނަ ގެރެތު ބޭލް
ޓްރާންސްފާ ބާޒާރުގައި ބޭލް އަދި އިސްކޯގެ އިތުރުން 13 ކުޅުންތެރިޔަކު ވިއްކާލުމަށް ރިއާލުން ނިންމައިފި ކަމަށް ރިޕޯޓްތައް ބުނެފިއެވެ.
ރިޕޯޓްތައް ބުނާގޮތުން ރެއާލްގެ ކޯޗް ޒައިނުއްދީން ޒިދާންގެ އެދުމުގެ މަތިން މަޝްހޫރު އިތުރު ކުޅުންތެރިންތަކެއް ގަތުމަށް ރެއާލުން ވަނީ ބޭލް އާއި އިސްކޯގެ އިތުރުން 13 ކުޅުންތެރިޔަކު ވިއްކާލަން ނިންމާފައެވެ.
މި ޓްރާންސްފަރ ބާޒާރުގައި ސްކޮޑު ވަރުގަދަ ކުރުމަށް ރެއާލުން ބޮޑު ހޭދައެއް ކުރަމުން އަންނައިރު، އެޓީމުން ވަނީ މިހާތަނަށް ފަސް ކުޅުންތެރިއަކު ސަޕޯޓަރުންނަށް ދައްކާލައިފައެވެ. އޭގެ ތެރޭގައި ބެލްޖިއަމްގެ ފޯވާރޑް އެޑެން ހަޒާޑްވެސް ހިމެނެއެވެ.
ރެއާލުން އިތުރު މިޑްފިލްޑަރަކު ގަންނަން ތައްޔާރުވަމުން އަންނައިރު، ބެލެވޭ ގޮތުގައި އެޓީމުން ފާރަލަނީ ފްރާންސްގެ މިޑްފިލްޑަރ ޕައުލް ޕޮގްބާގެ އިތުރުން ކްރިސްޓަން އެރިކްސަން އަށެވެ. މީގެ އިތުރުން ބްރެޒިލްގެ ތަރި ނޭމާ ގަތުމަށް ވެސް ރެއާލުން އަންނަނީ ތައްޔާރު ވަމުން ކަމަށް ރިޕޯޓްތައް ބުނެއެވެ.
މީގެ އިތުރުން ރެއާލުން ވަނީ ވާދަވެރި އެޓްލެޓިކޯ މެޑްރިޑަށް މިޑްފިލްޑަރ މާރކޯސް 33.9 މިލިއަން ޑޮލަރަށް ވިއްކާލައިފައެވެ. އަނެއްކޮޅުން ހަމޭސް ރޮޑްރިގޭސް ނަޕޯލީއަށް ބަދަލުވާން އުޅޭ ކަމުގެ އަޑުތައްވެސް ވަނީ ގަދަވެފައެވެ. ހަމައެހެންމެ، ގޯލްކީޕަރު ނާވަސްގެ އިތުރުން ލޫކާ ޒިދާން ފްރާންސްގެ ޓީމަކަށް ވިއްކާލަން ރެއާލުން އޮތީ ތައްޔާރަށްކަމަށްވެސް ރިޕޯޓްތައް ބުނެއެވެ.
ވޭލްސްގެ ފޯވާރޑް ގެރެތު ބޭލްއަކީ ރެއާލުން އެންމެ ބޮޑު ހޭދައެއް ކުރި އެއް ކުޅުން ތެރިޔާއަށްވާއިރު، ކޯޗު ޒިދާންގެ ޕްލޭނުގައި ބޭލް ނުހިމަނާކަމަށް ރިޕޯޓްތައް ބުނެއެވެ. ނަމަވެސް ރިޕޯޓްތައް ބުނާގޮތުން ބޭލް ބޭނުންވަނީ ރެއާލްގައި މަޑުކުރުމަށެވެ.
ރެއާލުން އެ ކްލަބުގެ ސްކޮޑު ވަރުގަދަކުރުމަށް މަސައްކަތް ފަށާފައިވަނީ އެ ކްލަބުން މިދިޔަ ސީޒަނުގައި ނެރުނު ދަށް ނަތީޖާތަކުގެ ސަބަބުންނެވެ.
