ފަނޑިޔާރު ދީދީގެ ތަހުގީގު: ޓިވީތަކުން ލައިވް ކުރަނީ
19 ޖޫން 2019 | ބުދަ 16:04ނުވަޔަކުން ފެށިގެން އާއްމުންނަށް ވަނީ ފުރުސަތު ހުޅުވާލަފައި
ޖޭއެސްސީގެ ޕްރެސް ކޮންފަރެންސް ތެރެއިން
އާއްމުންނަށް ހުޅުވާލައިގެން ބުރާސްފަތި ދުވަހު ބޭއްވުމަށް ހަމަޖެހިފައިވާ ސުޕްރީމް ކޯޓުގެ ފަނޑިޔާރު އަބްދުﷲ ދީދީގެ ތަހުގީގު ލައިވް ކުރުމުގެ ފުރުސަތު މީޑިއާ ތަކަށް ދޭން ހަމަޖެހިފައިވާ ކަމަށް ޖޭއެސްސީން ބުނެފިއެވެ.
ޖޭއެސްސީ އިން ބަލަމުންދާ ދިދީގެ ސުލޫކީ ދެ މައްސަލައިގެ ތަހުގީގު ބޭއްވުމަށް ތާވަލުކޮށްފައިވަނީ މާދަމަ ހެނދުނު 10:00 ގައި ދަރުބާރުގެ ރަންނަބަނޑޭރި ކިލޭގެފާނު މާލަމުގައެވެ.
ޖޭއެސްސީގެ ޑިރެކްޓަރު ހަސަން ޒަހީން ވިދާޅުވީ، އެ ކޮމިޝަންގެ ބޭނުމަކީ ވީހާވެސް ގިނަ ބަޔަކަށް ހުޅުވާލައިގެން ތަހުގީގު ކުރިޔަށް ގެންދިޔުން ކަމަށާއި އެގޮތުން އޮންލައިން މީޑިއާ ތަކުގެ އިތުރުން ޓިވީ ސްޓޭޝަންތަކަށް އެ ފުރުސަތު ދޭން ހަމަޖެހިފައިވާ ކަމަށެވެ. ރާއްޖެޓީވީންވެސް އެ ތަހުގީގު ލައިވް ކުރުމަށް ވަނީ ހަމަޖެހިފައެވެ.
ތަހުގީގަށް ވަންނަ ބޭނުންވާ އާއްމުންނަށް ޖާގަ އޮތް ވަރަކުން އެ ފުރުސަތު ދޭނެ ކަމަށް ޖޭއެސްސީން ބުންޏެވެ.
އޭނާ ވިދާޅުވީ، 08:30 ފެށިގެން ޖޭއެސްސީގެ މުވައްޒަފުން އެތަނުގައި ހަރަކާތްތެރިވާނެ ކަމަށެވެ. ތަހުގީގެއް ގައި ހިފަހައްޓަން ޖެހޭ އުސޫލުތަކާއި ހަމަތަކެއް ހިފަހައްޓަމުން ގެންދާނެ ކަމަށް ވިދާޅުވިއެވެ. ތަހުގީގު ކުރިޔަށްދާއިރު ހުރިހާ ފަރާތެއްގެ އެއްބާރުލުމާއި އެހީތެރިކަން ދިނުމަށް ޖޭއެސްސީން ވަނީ އެދިފައެވެ.
ތަހުގީގު ކުރިޔަށްދާ ގަޑީގައި ސަލާމަތީ ކަންތައްތައް ބަލަހައްޓަމުން ދާނި ފުލުހުންނާއި އެމްއެންޑީއެފުންނެވެ.
ފަނޑިޔާރު ދީދީގެ ތަހުގީގު އާއްމުންނަށް ހުޅުވާލައިގެން ކުރިޔަށް ގެންދިޔުމަށް ހަމަޖެހިފައިވާ އޭނާގެ އެދުމުގެ މަތިންނެވެ. ޖޭއެސްސީން ތަހުގީގު ކުރަމުންދާ ފެމެލީ ކޯޓުގެ އިސް ގާޒީ ހަސަން ސައީދުވެސް އެދިވަޑައިގެންފައިވަނީ އޭނާގެ ޝަރިޔަތްވެސް ހުޅުވާލައިގެން ކުރިޔަށް ގެންދިޔުމަށެވެ.
