ސުލޫކީ މައްސަލަތައް ހުރި ފަނޑިޔާރުންނާ މެދު ވަގުތުން ވަގުތަށް ފިޔަވަޅު އެޅެންޖެހޭނެ: މީކާއިލް
19 ޖޫން 2019 | ބުދަ 04:31ނެތް ބާރުތަކެއްގެ ބޭނުންކުރައްވައިގެން ހަމަ ވަރަށް ހަޑިކޮށް، ހުތުރުކޮށް އުޅުއްވާ މަންޒަރު ފެނިގެން މި ދަނީ
ރާއްޖެޓީވީގެ ފަލަ ސުރުހީ ޕްރޮގްރާމްގައި ގަލޮޅު ދެކުނު ދާއިރާގެ މެމްބަރު މީކާއިލް އަހްމަދު ނަސީމް ވާހަކަ ދައްކަވަނީ
ސުލޫކީ މައްސަލަތައް ހުރި ފަނޑިޔާރުންނާ މެދު ވަގުތުން ވަގުތަށް ފިޔަވަޅު އެޅެންޖެހޭނެ ކަމަށް ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު މީކާއިލް އަހްމަދު ނަސީމް ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަ ދައްކަވަމުން މީކާއިލް ވިދާޅުވީ މިހާރު ފަނޑިޔާރުންނާ މެދު ހުރި ސުލޫކީ މައްސަލަތައް ބަލާ ނިމެންޖެހޭނެ ކަމަށާއި މިހާރު އޮތީ މިނިވަން ކޮމިޝަނެއް ކަމަށެވެ.
ފަނޑިޔާރުންގެ މައްސަލަ ޖުޑިޝަލް ސަރވިސް ކޮމިޝަނުން ބަލަން ފެއްޓުމުން، ނެތް ބާރެއްގެ ބޭނުންތައް ކުރައްވައިގެން ވަރަށް ހަޑިކޮށް އުޅުއްވާ މަންޒަރު މިހާރު ފެނިގެންދާ ކަމަށް މީކާއިލް ވިދާޅުވިއެވެ.
ޖުޑިޝަލް ސަރވިސް ކޮމިޝަން މިހާރު އޮތީ ސުޕްރީމް ކޯޓުގެ ވަކިތަކުން ސަލާމަތްވެފައި ކަމަށާއި ޖޭއޭސީއާ މެދު ސުޕްރީމް ކޯޓަށް ފިޔަވަޅު ނޭޅޭނެ ކަމަށް މީކާއިލް ވަނީ ވިދާޅުވެފައެވެ.
މިނިވަން މުއައްސަސާގައި ތިބި ފަރާތްތައް ވަޒީފާއަށް ބަރާބަރަށް ނިކުންނަވަން ޖެހޭނެކަން ފާހަގަކުރައްވާ މީކާއިލް ވިދާޅުވީ ބައެއް ފަހަރު ސިޔާސީ ނުފުޒާ ހެދި އެ މުއައްސަސާތަކުން ބަލަންޖެހޭ މައްސަލަތައް ނުބަލާ ދޫކޮށްލާފައިވާ ކަމަށެވެ.
ސުޕަރމެޖޯރިޓީއެއް އޮތުމަކީ ސަރުކާރު ޖަވާބުދާރީ ނުކުރުވޭނެ ސަބަބެއް ނޫން ކަމަށާއި ސަރުކާރު ޖަވާބުދާރީ ކުރުވާ މަންޒަރު ވަރަށް ރަނގަޅަށް 19 ވަނަ ރައްޔިތުންގެ މަޖިލީހުން ފެނިގެން ހިނގައްޖެ ކަމަށް މީކާއިލް ވިދާޅުވިއެވެ.
