މި އަހަރުގެ ފިތުރު އީދު ދުވަހު ރިލިޒްކޮށްފައިވާ ސަލްމާން ހާންގެ ބާރަތް ފިލްމަށް 200 ކްރޯޑާ ކައިރި ގާތްކުރާ ވަރުގެ އާމްދަނީ އެއް ލިބިފައިވާ ކަމަށް ރިޕޯޓްތައް ބުނެފިއެވެ.

ބާރާތް ވަނީ ރިލީޒް ކުރިތަ ފަސް ދުވަސް ތެރޭގައި ބޮކްސް އޮފީހުގައި 150 ކްރޯޑް ހޯދާފައިވެއެވެ. ރީލް ލައިފް ޕްރޮޑަކްޝަނާ، ސަލްމާން ހާން ފިލްމާގެ އިތުރުން ޓީ ސީރީސް ގުޅިގެން އުފައްދާފައިވާ މި ފިލްމަކީ ތަފާތު އެކި ރަހަތައް އެކުލެވިގެންވާ ފިލްމެކެވެ. އޭގެ ތެރޭގައި، އެކްޝަން، އިމޯޝަންގެ އިތުރުން ކޮމިޑީވެސް ހިމެނެއެވެ. ފިލްމު އުފައްދާފައިވަނީ 240 ކްރޯޑުގެ ބަޖެޓަކުންނެވެ.

ބާރަތް ވަނީ އިންޑިއާގެ 4،700 ސްކްރީނުގެ އިތުރުން އެހެނިހެން ގައުމުތަކުގެ 1،300 ސްކްރީނުގައި އަޅުވާފައެވެ.

ބޮކްސް އޮފީހުގައި އެ ފިލްމު ކާމިޔާބީ އަށް ބަލާއިރު އެ ފިލްމު ވެގެން ގޮސްފައިވަނީ މި އަހަރުގެ ރިލީޒް ކުރި ފިލްމު ތަކުގެ ތެރެއިން އެންމެ ކާމިޔާބު އެއް ފިލްމަށެވެ.

ދެހާސް ސާދަވަނަ އަހަރު ދެކުނު ކޮރެޔާގެ '' އޯޑް ޓު މައި ފާދާ'' ފިލްމު އަސްލަކަށް ބަލައިގެން ހަދާފައިވާ މި ފިލްމުގައި ދައްކުވައިދެނީ އުމުރުން އަށްއަހަރުގެ ކުއްޖަކު އޭނާގެ ބައްޕަ އަށް ވެފައިވާ ވައުދެއް ފުއްދުމަށް ކުރާ މަސައްކަތެވެ. ފިލްމުގައި ސަލްމާން ހާންގެ ބައްޕަގެ ރޯލު ކުޅެފައިވަނީ ޖެކީ ޝްރޯފްއެވެ.

ސަލްމާންގެ ލޯބިވެރިޔާގެ ރޯލުން ކެޓްރީނާ ކުޅެފައިވާއިރު ދައްތަގެ ރޯލުން ފެނިގެން ދަނީ ތާބޫއެވެ. އޭގެ އިތުރުން އެ ފިލްމުގައި ހަރަކާތްތެރިވާ ތަރިންގެ ތެރޭގައި ދީޝާ ޕަޓާނީ، ނޯރާ ފަތްހީ، އާސިފް ޝައިކް އަދި ކޮމޭޑިއަން ސަތިޝް ކައުޝިކްއެވެ.

ފިލްމުގެ މަންޒަރުތައް އިންޑިއާގެ ޕަންޖާބު އާއި ދިއްލީގައި ނަގާފައިވާއިރު ފިލްމުގައި އަބޫދާބީ ، ސްޕެއިންގެ އިތުރުން މަލްޓާގައި ނަގާފައިވާ މަންޒަރުތައް ހިމެނެއެވެ.