ބޮލީވުޑްގައި މިހާތަނަށް ހަދާ އެންމެ އަގުބޮޑު ފިލްމު މިއަހަރުގެ ތެރޭގައި ފަށާނެއެވެ.

"މަހާބާރާތު"ގެ ނަމުގައި ނެރޭ މި ފިލްމުގައި އާމިރުޚާނާ އެކު ލީޑު ރޯލުން ފެނިގެންދާނެ ތަރިއަކު އަދި ފައިނަލް ނުވެއެވެ. އެންމެ ފަހުގެ ޚަބަރުތައް ބުނާ ގޮތުގައި މި ފިލްމުގެ އަންހެން ކެރެކްޓާއިން ފެނިގެންދާނީ ދީޕިކާ ޕަދުކޯންއެވެ. އެހެން ނަމަވެސް އިންޑިއާގެ ނޫސްތަކުން ވަނީ އާމިރުގެ މި ފިލްމުން އޭނާއާ އެކީ ފެނުމަށް ދީޕިކާ "އާނ" ބަސް ބުނެފާނެތޯ ސުވާލު އުފައްދާފައެވެ.

ދީޕިކާ މިފިލްމު ނުކުޅެފާނެ ކަމަށް ބައެއް ފަރާތްތަކުން ބުނަނީ އޭނާ އެންމެ ފަހުން ކުޅުނު ފިލްމު "ޕަދްމާވަތު"ގައި އޭނާއަށް ދިމާވި ކަންތައްތަކުގެ ސަބަބުން ކަމަށެވެ. "މަހާބާރަތު" އަކީ ވެސް ޕަދްމާވަތު ގޮތަށް އިންޑިއާގެ ތާރީޚީ ކަންތައްތަކެއް ދައްކުވައިދޭ ފިލްމެކެވެ. "ޕަދްމާވަތު" ގެ ސަބަބުން ދީޕިކާގެ ބޯ ބުރިކޮށްލުމަށް އަގު ކިޔައި ކަންތައްތަކެއް ވަނީ ހިނގާފައެވެ. އަދި އެ ފިލްމުގެ ސެޓަށް ގެއްލުން ދިނުން ފަދަ ގިނަ މައްސަލަތަކެއް އެ ފިލްމަށް ކުރިމަތިވިއެވެ. އެހެން ކަމުން "މަހާބާރަތު: ކުޅުމަށް ދީޕިކާ އެއްބަސްނުވާނެ ކަމަށް ވަނީ އަޑުތައް ފެތުރިފައެވެ. އެހެން ނަމަވެސް ބައެއް ފަރާތްތަކުން ބުނެފައި ވަނީ މިއީ އާމިރު ޚާނާ އެކީ ފުރަތަމައަށް ފެންނާނެ ފިލްމު ކަމަށް ވުމުން ދީޕިކާ މި ފިލްމަށް އާނއެކޭ ބުނެފާނެ ކަމަށެވެ.

ވާހަކަތައް މިގޮތަށް ހުރި ނަމަވެސް އަދި ދީޕިކާއަށް ސޮއި ކުރުމަށް ރަސްމީކޮށް ހުށައަޅާފައެއް ނުވެއެވެ.

"މަހާބާރަތު" އަށް ކާސްޓުން ނެގުމާ ގުޅޭ ގޮތުން މީގެ ކުރިން އާމިރު ބުނެފައި ވަނީ އޭނާ ބޭނުންވަނީ އެ އަގު ބޮޑު ފިލްމަށް ވަރަށް ކުޅަދާނަ މޮޅު ފަންނާނުން ކަމަށެވެ. އަދި ބޮލީވުޑްގައި ތިބި އެންމެ މޮޅު ފަންނާނުން ބޭނުންވާ ކަމަށާއި  އޭނާ ބޭނުން ވަނީ އެފިލްމުގެ ބަތަލަކަށް ދީޕިކާ ވުން ކަމަށެވެ.

އާމިރުގެ މި ބުނުމަށް ދީޕިކާ އަދި ކޮމެންޓްކޮށްފައި ނުވި ނަމަވެސް އާމިރު ކަހަލަ ކުޅަދާނަ ތަރިއަކާ އެކީ ފިލްމަކުން ފެނުން އެއީ އޭނާ ބޭނުންވާ ކަމެއް ކަމަށް ދީޕިކާގެ އާއިލާ މީހަކާ ހަވާލާދީ ޚަބަރުތައް ބުނެއެވެ.

"މަހާބާރަތު" އަކީ އާމިރުގެ "ޑްރީމް" ޕްރޮޖެކްޓެކެވެ.

އާމިރު ޚާން ދަނީ އޭނާގެ އެންމެ ފަހުގެ ފިލްމު "ތަގްސް އޮފް ހިންދުސްތާނު" ގެ މަސައްކަތް ކުރަމުންނެވެ. އެފިލްމު ނެރޭނީ މިއަހަރުގެ ނޮވެމްބަރ 7 ގައެވެ. އެ ފިލްމުގައި އާމިރުގެ އިތުރުން އަމީތާބް ބައްޗަން އާއި ފާތިމަތު ސަނާ ޝައިޚް ވެސް ފެނިގެންދާނެއެވެ.