ވަކީލަކަށްވުމަށް އެދި ފޯމް ހުށައެޅުމުގެ މުއްދަތު އިތުރުކޮށްފި
17 ޖޫން 2019 | ހޯމަ 13:51އިތުރުކޮށްފައި ވަނީ ބުދަ ދުވަހާ ހަމަޔަށް
ގާނޫނީ ވަކިލުންތަކެއް ހުވާ ކުރަނީ
ގާނޫނީ ވަކީލެއްގެ ހައިސިއްޔަތުން މަސައްކަތްކުރުމުގެ ހުއްދަ އަށް އެދި ހުށައަޅާ އެޕްލިކޭޝަންގެ ހުށައެޅުމުގެ މުއްދަތު ބުދަ ދުވަހާ ހަމަޔަށް އިތުރު ކޮށްފިއެވެ.
ހޯމަ ދުވަހު ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަން (ޑިޖޭއޭ) އާއްމުކުރި އިއުލާނެއްގައި ބުނީ، ފޯމް ހުށައެޅުމަށް މުއްދަތު ދެ ދުވަހަށް އިތުރުކޮށްފައިވާ ކަމަށެވެ. އެހެން ކަމުން ފޯމު ހުށައެޅުމުގެ މުއްދަތު ބުދަ ދުވަހުގެ ދޭއެއް ޖަހަންދެން ވަނީ އިތުރުކޮށްފައެވެ. ގާނޫނީ ވަކީލު ހުއްދައަށް އެދޭ ފޯމް ޖުޑިޝަރީގެ ވެބްސައިޓް ލިބެންހުންނާނެ ކަމަށްވެސް ޑިޖޭއޭގެ އިއުލާނުގައިވެއެވެ.
އެންމެފަހުން ގާނޫނީ ވަކީލެއްގެ ހައިސިއްޔަތުން މަސައްކަތް ކުރުމުގެ ހުއްދަ ދީފައިވަނީ އޭޕްރީލް މަހުއެވެ. ގާނޫނީ ވަކީލު ކަމުގެ ހުވާލައިދެއްވި ސުޕްރީމް ކޯޓުގެ ފަނޑިޔާރު ޢަބްދުﷲ ޢަރީފް އެވެ.
ގާނޫނީ ވަކީލު ކަމުގެ ހުއްދަ ދިނުމުގެ ޝަރުތުތަކުގެ ތެރޭގައި، އުމުރުން 18 އަހަރު ފުރިފައިވާ ދިވެހިރައްޔިތެއް ކަމުގައިވުމާއި، ދިވެހިރައްޔިތަކާ ކައިވެނިކޮށްގެން ހުންނަ މީހަކަށްވުން ނުވަތަ ދިވެހިރާއްޖޭގައި އުޅޭ މީހެއް ކަމުގައިވާން ޖެހެއެވެ. އަދި އެލް.އެލް.ބީ ޑިގްރީއެއް ނުވަތަ ބެޗްލަރޒް ޑިގްރީއެއް ދިވެހި ނުވަތަ ޝަރީއަތާއި ގާނޫނުގެ ރޮނގުން ކޮމްބައިންޑް ބެޗަލަރޒް ޑިގްރީއެއް ރާއްޖެއިން ނުވަތަ ރާއްޖެއިން ބޭރުން ހާސިލްކޮށްފައިވާ މީހެއް ކަމުގައި ވާން ޖެހެއެވެ.
