އޭސީސީ އާއި ބްރޯޑްކާސްޓިންގ ކޮމިޝަންގެ މެމްބަރުން މަޖިލީހަށް ހާޒިރުކުރަނީ
17 ޖޫން 2019 | ހޯމަ 12:03ދެ ކޮމިޝަންގެ މެމްބަރުން ކޮމިޓީއަށް ހާޒިރު ކުރަނީ ހޯމަ ދުވަހު
މިނިވަން މުއައްސަސާތަކާއި ބެހޭ ކޮމިޓީގެ ބައްދަލުވުމުގެ ތެރެއިން
އެންޓި ކޮރަޕްޝަން ކޮމިޝަން (އޭސސީ) އާއި މޯލްޑިވްސް ބްރޮޑްކާސްޓިން ކޮމިޝަން (ބްރޮޑްކޮމް) މަޖިލީހުގެ މިނިވަން މުއައްސަސާތަކާއި ބެހޭ ކޮމިޓީއަށް ހާޒިރުކުރަން ނިންމައިފިއެވެ.
ހޯމަ ދުވަހު އޮތް މިނިވަން މުއައްސަސާތަކާއި ބެހޭ ކޮމިޓީގެ ބައްދަލުވުމުގައި ނިންމާފައިވަނީ އަންނަ އަފްތާގެ ހޯމަ ދުވަހުގެ މެންދުރު 2:30 އަށް ދެ ކޮމިޝަންގެ މެމްބަރުން ކޮމެޓީީއަށް ހާޒިރު ކުރުމަށެވެ. ދެ ކޮމިޝަނުގެ މެމްބަރުން ކޮމިޓީއަށް ހާޒިރުކުރަން ފާސްކޮށްފައިވަނީ، ކޮމިޓީގެ މެމްބަރުންގެ އިއްތިފާގުންނެވެ.
އޭސީސީގެ މެމްބަރުންނާއި، ބްރޮޑްކޮމްގެ މެމްބަރުން ކޮމިޓީއަށް ހާޒިރުކުރަން ހުށަހެޅުއްވީ ބިލެތްދޫ ދާއިރާގެ މެމްބަރު އަހްމަދު ހަލީމްއެވެ. ހަލީމްގެ ހުށަހެޅުއްވުމަށް ތާއީދު ކުރެއްވީ ގަލޮޅު ދެކުނު ދާއިރާގެ މެމްބަރު މީކާއީލް ނަސީމްއެވެ.
އޭސީސީ ކޮމިޝަނަށް ހާޒިރުކުރަނީ ފާއިތުވި 5 އަހަރުގެ ތެރޭގައި ރައްޔިތުންގެ މެދުގައި ކޮމިޝަނުގެ ނަޒާހަތްތެރިކަމާއި މެދު ސުވާލު އުފެދޭ އެތައް ކަންތައްތަކެއް ހިގާފައިވާތީ، އެކަމާއި ގުޅޭ ގޮތުން ސުވާލު ކުރުމަށެވެ.
ބްރޮޑްކޮމް ކޮމިޓީއަށް ހާޒިރުކުރަނީ ފާއިތުވި 5 އަހަރު ދައުލަތުގެ މީޑިޔާ ސަރުކާރުން ހިސޯރުކޮށްފައި އޮތުމާއި، މިނިވަން މީޑިޔާތަކައް ހިންގުމަށް ކޮމިޝަނުން ހުރަސްއަޅާފައިވާތީ، އެކަމާއި ގުޅޭ ގޮތުން ސުވާލުކުރުމަށެވެ. މީގެ އިތުރުން ބްރޮޑްކޮމްގެ ނައިބް ރައީސް އިސްމާއިލް ސޮފްވާން ވަޒީފާއަށް ނުނިކުމެ މުސާރަ ނަންގަވަމުން އަންނަ މައްސަލަ އާއި ގުޅޭ ގޮތުން ސުވާލު ކުރުން ހިމެނެއެވެ.
