ރާއްޖެ އިން ބޮޑު ވަފްދެއް ވަޑައިގެންނެވީތީ ވަރަށް އުފާކުރަން: ކަރޫ ޖަޔަސޫރިޔާ

ސްރީލަންކާ އާއި އެކުގައިވާކަން ހާމަކޮށްދިނުމަށް ރާއްޖެއިން ބޮޑު ވަފްދެއް ވަޑައިގެންނެވީތީ، އެކަމާ ވަރަށް ބޮޑަށް އުފާކުރައްވާ ކަމަށް ސްރީލަންކާގެ ގާނޫނު ހަދާ މަޖިލީހުގެ ރައީސް ކަރޫ ޖަޔަސޫރިޔާ ވިދާޅުވެއްޖެއެވެ.

ރަސްމީ ގެކޮޅުގައި ހުންނަވާ "ރާއްޖެ އެމްވީ" އަށް ދެއްވި ޚާއްސަ އިންޓަރވިއުއެއްގައި ވާހަކަދައްކަވަމުން ކަރޫ ޖަޔަސޫރިޔާ ވިދާޅުވީ ރާއްޖެއިން ބޮޑު ވަފްދެއް ލަންކާ އާއި އެކުގައި ތިބިކަން ހާމަކޮށް ދިނުމަށް، އެ ގައުމަށް ވަޑައިގެންނެވީތީ، އެކަމުގެ އަގު ވަޒަން ކުރައްވާ ކަމަށާއި، އަދި އެކަމާއި ވަރަށް އުފާކުރައްވާ ކަމަށެވެ.

ކަރޫ ޖަޔަސޫރިޔާ ވިދާޅުވީ ސްރީލަންކާ އަކީ ރާއްޖެ އާއި ވަކިން އޮތް ގައުމެއް ކަމުގައި ވިޔަސް، ޖެއޮގްރަފީ ގޮތުންނާއި، ތާރީޚީ ގޮތުން އެއް ގޮތް ކަންތައްތަކެއް ހިމެނޭ ދެ ގައުމު ކަމަށެވެ. އެހެންކަމުން ސްރީލަންކާއިން އަބަދުވެސް ރާއްޖެ ދެކެނީ، އެންމެ އަވައްޓެރި އަދި އެންމެ ގާތް ގައުމު ކަމުގައި ކަމަށެވެ.

ސްރީލަންކާ އަކީ ރައްކާތެރި ގައުމެއްކަން މުޅި ދުނިޔެއަށް ހާމަކޮށް ދިނުމަށް، ރާއްޖޭގެ ވަފްދެއް ސްރީލަންކާ އަށް ވަޑައިގެންނެވުމުން ދޭހަވަގެން ދިޔައީ، ލަންކާއަށް ދިވެހިން ކުރަމުން އަންނަ އިތުބާރު ކަމަށް ކަރޫ ޖަޔަސޫރިޔާ ވިދާޅުވިއެވެ.

މަޖިލީހުގެ ރައީސް މުހައްމަދު ނަޝީދު އާއި، ނައިބް ރައީސް އީވާ އަބްދުﷲ، ޕާލަމެންޓްރީ ގްރޫޕް މެމްބަރުން، ގައުމީ މަޖިލިސް މެމްބަރުން، ރައީސް އޮފީހުގެ މިނިސްޓަރުން އެކުލެވޭ ގޮތަށް 100 އަށް ވުރެ ގިނަ މީހުންގެ ވަފްދެއް ވަނީ 3 ދުވަހުގެ ދަތުރުފުޅެއް ސްރީލަންކާއަށް ކުރައްވާފައެވެ.

ކަރޫ ޖަޔަސޫރިޔާ ވަނީ އެ ވަފްދާއި ބައްދަލުކޮށް، ސްރީލަންކާގެ ގާނޫނު ހަދާ މަޖިލީހުގެ ތަޖްރިބާތައް ހިއްސާކުރައްވާ، ރާއްޖޭގެ ގާނޫނު ހަދާ މަޖިލީހުގެ މަސައްކަތްތައް ކުރިއަށްދާ ގޮތް އޮޅުން ފިލުއްވާފައެވެ. އަދި އެޕްރީލް މަހުގެ 21 ވަނަ ދުވަހު އެ ގައުމަށް ދިން ޓެރަރިސްޓް ހަމަލާއިން އަރައިގަތުމަށް ކުރައްވަމުން އަންނަ މަސައްކަތްވެސް، ރާއްޖޭގެ ވަފްދާއި، ކަރޫ ޖަޔަސޫރިޔާ ވަނީ ހިއްސާ ކުރައްވާފައެވެ.