އާޖެންޓީނާގެ ލޯކަލް އިންތިހާބަށް ވޯޓުލާން ކައިރިވެފައި ވަނިކޮށް، އެ ގައުމުންނާއި އަވަށްޓެރި އުރުގުއޭއިން ކަރަންޓް ކަނޑައިގެން ދިޔުމާއި ގުޅިގެން އެތައް އިރެއް ވަންދެން ވޯޓުލުން ފަސްވެއްޖެއެވެ.

ކަރަންޓު ކަނޑައިގެން ދިޔުމާއި ގުޅިގެން އެ ދެ ގައުމުގެ 10 މިލިއަނަށް ވުރެ ގިނަ މީހުން އިރުތަކެއް ވަންދެން ކަރަންޓާ ނުލާ އުޅެން ޖެހުނެވެ. ކަރަންޓް ކެނޑެން މެދުވެރިވީ އެ ދެ ގައުމަށް ހިދުމަތްދޭން ބޭނުންކުރާ ގްރިޑެއް ފެއިލްވެގެން ކަމަށެވެ. މި މައްސަލައިގެ ފުރިހަމަ ތަހުގީގެއް ހިންގާނެ ކަމަށް އާޖެންޓީނާގެ ރައީސް މައުރީސިއޯ މެކްރީ ވައުދުވެވަޑައިގެންނެވިއެވެ.

އާޖެންޓީނާ އާއި އުރުގުއޭގެ އިތުރުން ޕެރެގުއާއީ އަދި ޗިލީގެ ވެސް ބައެއް ހިސާބުތަކަށް އަސަރުކޮށްފައިވާ ކަމުގެ މައުލޫމާތު ލިބިފައިވެއެވެ. ކަރަންޓު ފޯރުކޮށްދޭ އެޑެސޫރް ކުންފުނީގެ ތަރުޖަމާނު އަލިހާންޑްރާ މާޓީނޭޒް ބުޏީ މިއީ މުޅީ ގައުމުން ކަރަންޓު ކަނޑައިގެން ދިޔަ ފުރަތަމަ ފަހަރު ކަމަށެވެ.

ކަރަންޓް ކަނޑައިގެން ދިޔުމާއި ގުޅިގެން އެ ގައުމުގެ ރޭލު ދަތުރުފަތުރުގެ ނިޒާމު ހުއްޓުމަކަށް އައިސް، ފެން ފޯރުކޮށްދިނުމުގައި ވެސް ދަތިތަކާއި ކުރިމަތިލާން ޖެހުނެވެ.

އާޖެންޓީނާގެ ރަސްމީ މަސްދަރުތަކާ ހަވާލާދީ ހަވާލާދީ އެ ގައުމުގެ މީޑިއާތަކަން ރިޕޯޓްކޮށްފައިވަނީ، ކަރަންޓު ކެނޑުނީ ޔަސިކްރޭތާ ހައިޑްރޯއިލެކްޓްރިކް ޑޭމްއަށް ދިމާވި ޓްރާންސްމިޝަން މައްސަލައަކާއި ގުޅިގެން ކަމަށެވެ. މިހާރު ގައުމުގެ 80 އިންސައްތައަށް ކަރަންޓް ފޯރުކޮށްދީފައިވާ ކަމަށް އާޖެންޓީނާގެ ކަމާއިބެހޭ ފަރާތްތަކުން ބުނެފައިވެއެވެ.