ބޮޑީ ބިލްޑިން ޗެމްޕިއަންޝިޕްގެ ބިޑް ރާއްޖެއިން ކާމިޔާބުކޮށްފި

ދެހާސް ވިހި ވަނަ އަހަރު ބާއްވާ އޭޝިއަން ބޮޑީ ބިލްޑިންގ އެންޑް ފިޒީކް ސްޕޯޓްސް ޗެމްޕިއަންޝިޕްގެ ބިޑް ރާއްޖެއިން ކާމިޔާބު ކޮށްފިއެވެ.

ރާއްޖެއިން އެ ބިޑް ކާމިޔާބު ކޮށްފައިވާކަން އިއުލާން ކޮށްފައިވަނީ މިނިސްޓްރީ އޮފް ޔޫތް އެމްޕަވަރމެންޓް އަހުމަދު މަހުލޫފް ހުކުރު ދުވަހު ކުރެއްވި ޓްވީޓެއްގައެވެ.

ބޮޑީ ބިލްޑިންގ ޗެމްޕިއަންޝިޕް ރާއްޖޭގައި ބޭއްވުމުގެ ޝައުގުވެރިކަން މިނިސްޓަރު މަހުލޫފް ފާޅުކުރައްވާފައިވަނީ، މޭމަހުގެ އެއްވަނަ ދުވަހު ބޭއްވި ނެޝަނަލް ބޮޑީ ބިލްޑިން ޖަޖިން ކޯސް އިފްތިތާހު ކުރުމުގެ ރަސްމިއްޔާތުގައެވެ.

އެ ރަސްމިއްޔާތަށް ރާއްޖެއަށް ވަޑައިގެން އުޅުއްވި އޭޝިއަން ބޮޑީ ބިލްޑިން އެންޑް ފިޒީކް ސްޕޯޓްސް ފެޑެރޭޝަންގެ (އޭބީބީއެފް) ގެ ރައީސް ޕައުލް ޗުއާ (ޕާޕާ) އާ އެކަމާއި ބެހޭ ގޮތުން ކުރިން މަޝްވަރާކުރެވި، ޕާޕާގެ ފުރިހަމަ ތާއިދު އެކަމަށް ލިބޭނެ ކަމަށް މިނިސްޓަރު ވިދާޅުވިއެވެ.

ހުކުރު ދުވަހު މަހުލޫފް ކުރެއްވި ޓްވީޓެއްގައި ވިދާޅުވީ، އުފާލާއި އެކު 2020 ވަނަ އަހަރުގެ އޭޝިއަން ބޮޑީ ބިލްޑިންގް ޗެމްޕިއަންޝިޕް ރާއްޖެއިން ކާމިޔާބުކޮށްފައިވާކަން އިއުލާންކުރާކަމަށެވެ. އެ ބިޑް ކާމިޔާބު ކުރުމަށްޓަކައި ބޮޑީ ބިލްޑިންގް އެސޯޝިއޭޝަންގެ ރައީސް އާއި އެކްޒިކްޓިވް ކޮމިޓީ (އެކްސްކޯ) އިން ކުރެއްވި މަސައްކަތައް މަހުލޫފް ވަނި ޝުކުރު އަދާކޮށްފައެވެ.

މަހުލޫފު ވިދާޅުވީ، އެ އިވެންޓް ބޭއްވުމަށް ގަސްދުކުރަނީ މާލެއިން ބޭރުގައި 400 އެތިލީޓުންނާއެކު ކަމަށެވެ. ބާއްވާނީ ކޮން ރަށެއްގައި ކަމެއް މިނިސްޓަރު ވިދާޅެއް ނުވެއެވެ.

ހަ ގައުމެއް ހިމެނޭ ގޮތަށް 1959 ވަނަ އަހަރު ވުޖޫދަށް އައި އޭބީބީއެފް ގައި މިހާރު 40 ގައުމުއް ހިމެނެއެވެ. އޭބީބީއެފް އަކީ އޮލިމްޕިކްސް ކައުންސިލް އޮފް އޭޝިޔާގެ އިތުރުން ޖެނެރަލް އެސެމްބްލީ އޮފް އޭޝިޔާ ޕެސިފިކް ސްޕޯޓްސް ފެޑެރޭޝަންގެ މެމްބަރެކެވެ.

މި ފަހަރުގެ ބޮޑީ ބިލްޑިން ޗެމްޕިއަންޝިޕް ބާއްވަން ހަމަޖެހިފައިވަނީ ނޭޕާލްގެ ވެރިރަށް ކަތަމަންޑޫ ގައި ޖުލައި މަހުގެ 18 އިން 21 އަށެވެ.

އޭބީބީއެފްގެ ރައީސް ޕާޕާ އަކީ ރައްޖޭގެ ބޮޑީ ބިލްޑިން ފެޑެރޭޝަންއާ ގާތް ގުޅުމެއް އޮންނަ ރާއްޖޭގެ ގިނަ ބޮޑީ ބިލްޑަރުން ތަކެއް ތަމްރީނު ކޮށްދެއްވާފައިވާ ބޭފުޅެކެވެ.