މިހާތަނަށް ރާއްޖޭގައި ބާއްވާ އެންމެ ބޮޑު ޕާރޓްނަރޝިޕް ފޯރަމް ބޭއްވުމަށް ތައްޔާރުވެއްޖެއެވެ.
މި ފޯރަމް ޖޫން މަހުގެ 17 ވަނަ ދުވަހު އިފްތިތާހު ކުރުމަށް ހަމަޖެހިފައިވާއިރު، ބުރާސްފަތި ދުވަހުގެރޭ ރާއްޖެޓީވީގެ ފަލަސުރުހީ ޕްރޮގްރާމްގައި އެކަމާ ގުޅޭ މައުލޫމާތު ދެއްވަމުން އެމްބެސެޑަރ އެޓް ލާރޖް ޑރ އާސިމް އަހުމަދު ވިދާޅުވީ، ވޭތުވެ ދިޔަ ދުވަސްތަކުގައި ބޭރު ދުނިޔޭގައި ރާއްޖެ އޮތީ ވަރަށް ބޮޑަށް އެކަހެރިވެފައި ކަމަށާއި، ނަމަވެސް މި ސަރުކާރުން ގެންގުޅުއްވާ ޚާރިޖީ ސިޔާސަތު އޮންނާނީ ވަރަށް ހާމަކަން ބޮޑު ގޮތެއްގައި ކަމަށް ރައީސް ސޯލިހުވެސް ވިދާޅުވެފައިވާ ކަމަށެވެ. ވުމާއެކު ގިނަ ޤައުމުތަކާއެކު ގުޅުން ބަދަހިކުރުމަކީ މި ފޯރަމްގެ މަޤްސަދެއް ކަމަށް އާސިމް ވިދާޅުވިއެވެ.
އެ މަޤްސަދު ހާސިލު ކުރުމަށް އަޅުގަނޑުމެން ކުރާ މަސައްކަތްތަކުގެ ތެރެއިން އެއް ކަމެއް މިކަމަކީ، ދެން މި ޕާރޓްނަރޝިޕް ފޯރަމްއާ ބެހޭގޮތުން ދުނިޔޭގެ އެކިއެކި ޤައުމުތަކަށް މައުލޫމާތު އެރުވުމުގެގޮތުން އަޅުގަނޑުމެން މިދިޔަ މަހު ވާނީ ސްރީލަންކާގެ ކޮލަމްބޯގައާ، ދިއްލީގައި ތިއްބަވާ ރާއްޖެއަށް ކަނޑައަޅުއްވާފައިވާ ސަފީރުންނާ ބޭރުގެ އެކިއެކި ޖަމާއަތްތަކުގެ ބޭފުޅުންނާ ބައްދަލުކޮށް ޕާރޓްނަރޝިޕް ފޯރަމްއާ ބެހޭ މައުލޫމާތު އަރުވާފައި.އެމްބެސެޑަރ އެޓް ލާރޖް ޑރ އާސިމް އަހުމަދު
އާސިމް އިތުރަށް ވިދާޅުވީ، މި ފޯރަމްއަށް ވަޑައިގަންނަވާ ފަރާތްތަކުން ރާއްޖޭގެ ތަރައްޤީގެ ސިޔާސަތުތަކާބެހޭ މައުލޫމާތުތައް އޮޅުން ފިލުވައި ރާއްޖޭގެ ޚާރިޖީ ސިޔާސަތު ހުޅުވާލެވިފައިވާގޮތާއި ބެހޭގޮތުންވެސް މައުލޫމާތު އޮޅުންފިލުވާނެ ކަމަށާއި، ރާއްޖޭގެ ތަރައްޤީގެ މަޝްރޫއުތަކުގައި އެފަރާތްތަކުން ވެދެވޭނެ އެހީތަކާ ގުޅޭގޮތުން މަޝްވަރާ ކުރައްވާނެ ކަމަށެވެ.
އަޅުގަނޑުމެން މި ފޯރަމްގައި ވަރަށް ގިނަ ތަރައްޤީގެ މަޝްރޫއުތަކާ ބެހޭގޮތުން މައުލޫމާތު އަރުވާނަން، ހަމައެއާއެކީގައި ރާއްޖޭގެ ތަރައްޤީގެ ލަނޑުދަނޑިތަކާ ރާއްޖޭގެ ތަރައްޤީގެ މިސްރާބު މިހާރު މި ދާގޮތާއި ބެހޭގޮތުން އަޅުގަނޑުމެން ދުނިޔޭގެ ހުރިހާ ޤައުމަކަށް އެހެން ދުނިޔޭގެ ހުރިހާ ޤައުމެކޭ ދެންނެވިޔަސް އަޅުގަނޑުމެންނާ އެކީގައި މަސައްކަތް ކުރާ ޤައުމުތަކަށް މި މައުލޫމާތު އެރުވުމަށް އަޅުގަނޑުމެން މަސައްކަތް ކުރާނަން، އެއީ މައިގަނޑު ބޭނުމަކީ މި ފޯރަމްގެ.އެމްބެސެޑަރ އެޓް ލާރޖް ޑރ އާސިމް އަހުމަދު
މި ޕްރޮގްރާމްގައި ރައީސް އޮފީހުގެ ޕޮލިސީ ޕޮލިސީ ސެކެޓަރީ އާމިނަތު ޝައުނާވެސް ބައިވެރިވެ ވަޑައިގެންފައިވާއިރު، ޝައުނާ ވިދާޅުވީ، ޕާރޓްނަރޝިޕް ފޯރަމްގެ އެންމެ ބޮޑު އެއް މަޤުސަދަކީ ފާއިތުވި 7 އަހަރު ތެރޭގައި ބައިނަލްއަޤުވާމީ މުޖުތަމައުގައި ރާއްޖެއިން ޒިންމާދާރުކަން ކުޑަގޮތަކަށް އަމަލުކޮށްފައިވާތީ އެކަންކަން ހައްލުކޮށް، ޤައުމުތަކާމެދު އޮތް ގުޅުން އިތުރަށް ވަރުގަދަ ކުރުމަށް ކަމަށެވެ.
މި އަަހަރުގެ ޕާޓްނަރޝިޕް ފޯރަމް އިފްތިތާޙު ކޮށްދެއްވާނީ ރައީސުލްޖުމްހޫރިއްޔާ އިބްރާހިމް މުޙައްމަދު ސޯލިޙެވެ. މި ފޯރަމްގައި ރަޙުމަތްތެރި ޤައުމުތަކާއި ޖަމްއިއްޔާ ޖަމާޢަތްތަކާއިއެކު "ޖަޒީރާ ރާއްޖެ"އެއްގެ ތަސައްވުރާއި ބެހޭ ގޮތުންނާއި ސަރުކާރުގެ ތަރައްޤީގެ އެޖެންޑާ އާއި ބެހޭ ގޮތުން މަޝްވަރާކޮށް، ޚިޔާލު ބަދަލު ކުރެވޭނެއެވެ. އެގޮތުން ބައިނަލްއަޤްވާމީ މުޖްތަމައުގެ އެހީތެރިކަން ސަރުކާރުން ބޭނުންވާ މައިގަނޑު 5 ދާއިރާއަކުން ޕެނަލް ޑިސްކަޝަންތައް ބާއްވައި، މައުލޫމާތު ދިނުމަށް ވަނީ ހަމަޖެހިފައެވެ.
މި ޖޫން މަހުގެ 17 އަދި 18 ގައި ބޭއްވުމަށް ހަމަޖެހިފައިވާ "މޯލްޑިވްސް ޕާޓްނަރޝިޕް ފޯރަމް" އަށް ދިވެހި ސަރުކާރުން ދަނީ އެންމެ ފަހުގެ ތައްޔާރީތައްވަމުންދާ ކަމަށާއި ފޯރަމްއަށް ކަނޑައަޅާފައިވާ ޝިއާރަކީ "އިންވެސްޓިންގ އިން އަ ރިޒިލިއެންސް އެންޑް ސަސްޓައިނަބަލް މޯލްޑިވްސް" ކަމަށް ފޮރިން މިނިސްޓްރީން ބުނެފައިވެއެވެ.
