އަބަދުވެސް ނަފްސު ވަޒަން ކުރުން މަތީ ދެމިހުރުމަށް ޚުތުބާގައި ގޮވާލައިިފި

ކޮންމެ މުސްލިމެއްވެސް އަބަދުވެސް އެމީހެއްގެ ނަފްސު ވަޒަން ކުރުން މަތީ ދެމިހުރުމަށް މިއަދުގެ ހުކުރު ޚުތުބާގައި ގޮވާލައިފިއެވެ.

" ނަފްސު ވަޒަން ކުރުމުގެ މުހިއްމުކަން" މި މައުޟޫގެ މައްޗަށް ބިނާކޮށްފައިވާ ޚުތުބާގައި ބުނީ، މަރުވާނެ ވަގުތެއް އެއްވެސް މީހަކަށް ނޭނގޭނެ ކަމަށާއި، ވުމާއެކު އަބަދުވެސް އެމީހެއްގެ އަމަލުތަކާއި އަމިއްލަ ނަފްސު ވަޒަން ކުރަން ޖެހޭނެ ކަމަށެވެ. އަދި އީމާންތެރިކަން ހުރީ ކިހާ މިންވަރަކަށްތޯ އަމިއްލައަށް ދެނެގަނެ، ﷲ ގެ އަމުރުފުޅުތަކަށް ތަބާވެވޭ މިންވަރު އަމިއްލައަށް ވަޒަން ކޮށްލުމަށް ޚުތުބާގައި ވަނީ ގޮވާލާފައެވެ.

ޚުތުބާގައި އިތުރަށް ބުނީ، އެމީހެއްގެ އަމިއްލަ ނަފްސާއި ދަރިންގެ ސަލާމަތާއި ރައްކާތެރި ކަމަކީ އެމީހެއްގެ އަމިއްލަ ޒިންމާއެއް ކަމަށާއި، ދެދުނިޔޭގެ ބާއްޖަވެރިކަން ލިބޭނީ އެގޮތުގައި އުޅެގެން ކަމަށެވެ.

އޭގެ އިތުރުން، ޒުވާންކަން ހޭދަކުރި ގޮތާމެދު ޤިޔާމަތް ދުވަހުން ސުވާލު ކުރެވޭނެ ކަމަށާއި، ވުމާއެކު އެމީހެއްގެ ޒުވާން ދުވަސްވަރު ހޭދަކުރެވޭ ގޮތާމެދު ފުންކޮށް ވިސްނައި ﷲ ދެއްވާފައިވާ ރިޒުޤުތަކުގެ ބޭނުން ހެޔޮ ގޮތުގައި ހިފުމަށްވެސް ޚުތުބާގައި ވަނީ ގޮވާލާފައެވެ.