ޖޭއެސްސީ އަށް ނޭދެވޭ އަސަރުތައް ސުޕްރީމް ކޯޓުން ފޯރުވާފައި އެބަހުރި: ބަންޑާރަ ނާއިބް
މަޖިލީހުގެ ބާރުތަކާއި މަސްއޫލިއްޔަތުތަކަށް އަސަރުކުރާ ގޮތަށް ކަންތައްތައް ނިންމާ ކަމަށް ތުހުމަތު ކުރެއްވި
ބަންޑާރަ ނައިބް އިބްރާހިމް ރިއްފަތު، ރައްޔިތުންގެ މަޖިލީހުގެ ޖުޑީޝަރީ ކޮމެޓީގައި
ޖުޑީޝަލް ސަރވިސް ކޮމިޝަން (ޖޭއެސްސީ) އަށް ނޭދެވޭ އަސަރުތައް, ސުޕްރީމް ކޯޓުން ފޯރުވާފައިވާ ކަމަށާއި, ފާއިތުވި 6 މަސް ދުވަހުގެ ތެރޭގައި އެކަން ފެނިފައިވާ ކަމަށް ބަންޑާރަ ނާއިބް އިބްރާހިމް ރިއްފަތު ވިދާޅުވެއްޖެ އެވެ.
ޖޭއެސްސީގެ މެމްބަރު ހާޒިރުކޮށް ބޭއްވި ރައްޔިތުންގެ މަޖިލީހުގެ ޖުޑީޝަރީ ކޮމެޓީގެ މެމްބަރުން ކުރިމަތިކުރުވި ސުވާލުތަކަށް ޖަވާބުދެއްވަމުން ބަންޑާރަ ނައިބް ވިދާޅުވީ، 2008 ވަނަ އަހަރު އެކުލަވައިލާފައިވާ ފެހި ގާނޫނު އަސާސީ ގައި ތިންބާރު ވަކިކޮށްފައިވާއިރު، އަދުލު އިންސާފު ގާއިމްކުރުމުގެ ބާރަށް ވަކި ހާއްސަ ބާރުތަކާއި، އިޙްތިސާސްތަކެއް ލިބިދިފައިވާ ކަމަށެވެ. ނަމަވެސް ސުޕްރީމް ކޯޓުން އެކި ދުވަސްވަރު އެކި ބާވަތުގެ ނިންމުންތައް ނިންމާފައިވާއިރު އޭގެ ތެރޭގައި ކަނޑައެޅިގެން ރައްޔިތުންގެ މަޖިލީހުގެ ބާރުތަކާއި މަސްއޫލިއްޔަތު ތަކަށް އަސަރުކުރާ ގޮތަށް ކަންތައްތައް ނިންމާފައިވާ ކަމަށް ބަންޑާރަ ނާއިބް ވިދާޅުވި އެވެ.
އެމަނިކުފާނު ވިދާޅުވީ ސުޕްރީމް ކޯޓުން ޖޭއެސްސީގެ މަސްއޫލިއްޔަތުތަކާއި، ބާރުތަކަށް އެކި ސިފަ ސިފާގައި ނޭދެވޭ އަސަރުތައް ފޯރުވާފައި ހުރިކަމަށެވެ.
ގާނޫނު އަސާސީގެ 157 ވަނަ މާއްދާގެ (ށ) ގައި ބުނާ ގޮތުން، ޖުޑީޝަލް ސަރވިސް ކޮމިޝަނަކީ ވަކި ފަރާތަކަށް ބުރަނުވެ އޮންނަން ޖެހޭ މުސްތަގިއްލު މުއައްސާސާއެކެވެ. އަދި އެކޮމިޝަންގެ ވާޖިބުތަކާއި މަސްއޫލިއްޔަތުތައް އަދާކުރަން ވާނީ ގާނޫނޫ އަސާސީއާ ރައްޔިތުންގެ މަޖިލީހުން ފާސްކުރާ ގާނޫނާ އެއްގޮތްވާ މަތިން ކަމަށާއި، އަދުލު އިންސާފު ގާއިމްކުރުމުގެ ބާރުގައި ހިމެނޭ އެންމެހައި މީހުންނާއި، ރައްޔިތުންގެ މަޖިލީހުން ކަނޑައަޅާ ކޮންމެ ފަރާތެއްގެ މައްޗަށް ޖުޑީޝަލް ސަރވިސް ކޮމިޝަންގެ އިހުތިސާސް ހިނގާނެ ކަމަށް ޤާނޫނު އަސާސީގައިވެއެވެ.
ޤާނޫނު އަސާސީގެ އެ މާއްދާއަށް އިޝާރަތްކުރައްވާ ރިފްއަތު ވިދާޅުވީ، ޤާނޫނު އަސާސީގައި ސުޕްރީމް ކޯޓުގެ ފަނޑިޔާރުންނަށް ޖޭއެސްސީގެ ބާރު ނުހިންގޭނެ ކަމަށް ބުނެފައިނުވާ ކަމަށާއި، ފަނޑިޔާރުން އެކަމުގައި އިސްތިސްނާ ނުވާ ކަމަށެވެ.
ސުޕްރީމް ކޯޓުން ޖޭއެސްސީ އަށް ނުފޯޒު ފޯރުވާ ކަމަށް ބަންްޑާރަ ނައިބް ވިދާޅުވެފައިވާއިރު، ޖުޑީޝަލް ސަރވިސް ކޮމިޝަން (ޖޭއެސްސީ) އަށް ހުށައެޅިފައިވާ މައްސަލައަކާއި ގުޅިގެން މަގާމުގެ މަސްއޫލިއްޔަތުތަކުން ދުރުކޮށް ސަސްޕެންޑްކުރެވުނު ސުޕްރީމް ކޯޓުގެ ގާޒީ އަބްދުﷲ ދީދީގެ މައްސަލަ އެއްވެސް ގޮތަކަށް ކުރިޔަށް ނުގެންދިޔުމަށް ސުޕްރީމް ކޯޓުން ބުރާސްފަތި ދުވަހު ވަނީ ޖޭއެސްސީ އަށް އަމުރުކޮށްފައެވެ. އެކަމަކު ޖޭއެސްސީން ވަނީ ކުއްލި ބައްދަލުވުމެއް ބާއްވައި، އަބްދުﷲ ދީދީ ސަސްޕެންޑްކުރުމަށް ނިންމި ނިންމުން ދެމި އޮންނާނެކަމަށް ބުނެ ސުޕްރީމް ކޯޓުގެ އަމުރު ބަލައިގަތުމަށް އިންކާރު ކޮށްފައެވެ.
ދީދީ ސަސްޕެންޑްކުރުމަށް ނިންމީ ޖޭއެސްސީއަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު، ހުށަހެޅުއްވި މައްސަލައަކާއި ގުޅިގެންނެވެ. އެއީ ފަނޑިޔާރާއި ގުޅޭ ރިޝްވަތުގެ މައްސަލައަކަށްވާއިރު، އެ މައްސަލަ ފުލުހުން ތަހުޤީޤްކުރަމުން އަންނަކަމަށް ޖޭއެސްސީން ވަނީ ބުނެފައެވެ.
