އޮޒިލްގެ ބެސްޓް މޭންއަކީ ތުރުކީގެ ރައީސް!
9 ޖޫން 2019 | އާދީއްތަ 09:59ތުރުކީގެ މަޝްހޫރު މީހުންގެ ކައިވެނީގެ ހަފްލާތަކުގައި އުރުދުޣާން ބައިވެރިވެވަޑައިގަންނަވާ
އޮޒިލްގެ ކައިވެނީގެ ހަފްލާ
މަޝްހޫރު ފުޓްބޯޅަ ކުޅުންތެރިޔާ މެސުޓް އޮޒިލްގެ ކައިވެނީގެ ހަފްލާގައި، އޮޒިލްގެ ބެސްޓް މޭންގެ ގޮތުގައި ތުރުކީގެ ރައީސް ރަޖަބް ތައްޔިބް އުރުދުޣާން ބައިވެރިވަޑައިގެންފިއެވެ.
މިހާރު އާސެނަލް އަށް ކުޅެމުންދާ އޮޒިލް، ކައިވެނީގެ ގޮތުން ގުޅިފައި ވަނީ ތުރުކީގެ އެކްޓްރެސް އަދި މޮޑެލްއެއް ކަމުގައިވާ އާމިނޭ ގުލްޝޭ އާއެވެ. އޭނާއަށް 2014 ވަނަ އަހަރު "މިސް ތުރުކީ" ގެ ޝަރަފު ލިބިފައިވެއެވެ.
ދެ ތަރިންގެ ކައިވެނީގެ ހަފްލާ ބޭއްވީ އިސްތާންބުލްގެ ބޮސްޕޮރަސްގައެވެ. އެ ހަފްލާގައި ސިޔާސީ ބޭފުޅުންނާއި ފިލްމީ ތަރިން ވެސް ގިނަ އަދަދަކަށް ބައިވެރިވިއެވެ.
އޮޒިލް އާއި އާމިނޭގެ ކައިވެނީގެ ހަފްލާގެ ފޮޓޯތަކުން ރައީސް އުރުދުޣާން އާއި އަނބިކަނބަލުން، އޮޒިލްގެ ދެމަފިރިންނާ އެކު ހުންނަތަން ފެނެއެވެ. ތުރުކީގެ މަޝްހޫރު މީހުންގެ ކައިވެނީގެ ހަފްލާތަކުގައި އާންމު ގޮތެއްގައި، އުރުދުޣާން ބައިވެރިވެ ވަޑައިގަންނަވައެވެ.
އުރުދުޣާން އެ ހަފްލާގައި ބައިވެރިވަޑައިގެންނެވީ އޮޒިލްގެ އެދުމަކަށެވެ.
އުރުދުޣާން އާއި އޮޒިލް ބައްދަލުކުރުމުން ޖަރުމަނުގެ ގިނަ ބަޔަކު ވަނީ ނުރުހުން ފާޅުކޮށްފައެވެ. އޮޒިލްއަކީ ޖަރުކަނުގެ ރައްޔިތެއް ނަމަވެސް އޭނާގެ އާއިލާ ނިސްބަތް ވަނީ ތުރުކީއަށެވެ.
