ރާއްޖެ އާދެވިއްޖެ، ދަތުރުން ދައްކުވައިދެނީ އިންޑިއާ އާއި ރާއްޖެ ގުޅިފައިވާ މިންވަރު: ބޮޑުވަޒީރު މޯދީ
ރާއްޖެ ވަޑައިގެންނެވީ ދެ ދުވަހަށް
އިންޑިއާގެ ބޮޑުވަޒީރު ނަރެންދްރަ މޯދީ ރާއްޖެ ވަޑައިގަތުމުން އެމަނިކުފާނަށް ކުޑަކުއްޖަކު މަރުހަބާ ކިޔަނީ
ރާއްޖެ އަށް ވަޑައިގެންނެވިއްޖެ ކަމަށާއި، މި ދަތުރުފުޅުން ދައްކުވައިދެނީ އިންޑިއާ އާއި ރާއްޖެ ގުޅިފައިވާ މިންވަރު ކަމަށް އިންޑިއާގެ ބޮޑުވަޒީރު ނަރެންދްރާ މޯދީ ވިދާޅުވެއްޖެއެވެ.
ބޮޑުވަޒީރު ނަރެންދްރާ މޯދީ މިހްނެ ވިދާޅުވީ ހޮނިހިރު ދުވަހު އެމަނިކުފާނުގެ އޮފިޝަލް ޓްވިޓަރ އެކައުންޓުން ދިވެހި ބަހުން ކުރެއްވި ޓްވީޓެއްގައެވެ.
އެމަނިކުފާނުގެ ޓްވީޓުގައި ވިދާޅުވެފައިވަނީ މި ދަތުރުފުޅުން ދައްކުވައިދެނީ އިންޑިއާ އާއި ދިވެހިރާއްޖެ ގުޅިފައިވާ ވަރުގަދަ ގުޅުމުގެ މުހިންމުކަން ކަމަށެވެ. އަދި ތަފާތު ރޮނގުތަކުން ރާއްޖެއާ އެކު ގުޅުން ބަދަހިކުރުމަށް ބޭނުންވެވަޑައިގަންނަވާ މިންވަރު މި ދަތުރުފުޅުން ފެންނާނެ ކަމަށް ވެސް އިންޑިއާގެ ބޮޑުވަޒީރު މޯދީ ވިދާޅުވިއެވެ.
ބޮޑުވަޒީރު މޯދީ ވަނީ މީގެ ކުރިން ވެސް ދިވެހި ބަހުން ޓްވީޓެއް ކުރައްވާފައެވެ. މިދިޔަ އަހަރުގެ އޮކްޓޫބަރު މަހު މޯދީގެ ރަސްމީ ޓްވިޓާ އެކައުންޓުން ޓްވީޓްކުރެއްވީ ދިވެހި ދެ ލަވަކިޔުންތެރިއަކު ހިންދީ ބަހުން ކިޔާފައިވާ ލަވަޔަކާ ގުޅިގެންނެވެ.
ބޮޑުވަޒީރު މޯދީ އަށް ރާއްޖޭގެ ވެލާނާ އިންޓަރނޭޝަލް އެއަރޕޯޓުން މަރުހަބާ ދަންނަވާފައި ވަނީ ފޮރިން މިނިސްޓަރު އަބްދުﷲ ޝާހިދާއި ފިނޭންސް މިނިސްޓަރު އިބްރާހީމް އަމީރުއެވެ.
މި ދަތުރުފުޅުގެ ތެރެއިން ރައްޔިތުންގެ މަޖިލީހުގައި ބޮޑުވަޒީރު މޯދީ ތަގުރީރް ކުރެއްވުމަށް ވަނީ ހަމަޖެހިފައެވެ. އެމަނިކުފާނު ތަގްރީރް ކުރައްވާ ޖަލްސާ ފަށާނީ ހޮނިހިރު ދުވަހުގެ 6:45 ގައެވެ.
