ބައެއް ރީ-ބްރޯޑްކާސްޓަރުންނަށް ޖޫރިމަނާގެ ގޮތުގައި ކޮށްފައިވާ 2 މިލިއަނަށް ވުރެ ގިނަ ރުފިޔާ މާފުކޮށްދިނުމަށް އެދި މޯލްޑިވްސް ބްރޯޑްކާސްޓިންގ ކޮމިޝަނުން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު އަރިހުގައި އެދިއްޖެއެވެ.
ބުރާސްފަތި ދުވަހު އެ ކޮމިޝަނުން ނެރުނު ބަޔާނެއްގައި ބުނީ ރީބްރޮޑްކާސްޓިންގ ކުންފުނިތަކުން ދޭންޖެހޭ 2،504،000 (ދެ މިލިއަން ފަސް ލައްކަ ހަތަރު ހާސް) ރުފިޔާ މާފުކޮށްދިނުމަށް އެދިފައި ވަނީ އެ ފަރާތްތަކަކީ ރަށްރަށުގައި ކުދި ވިޔަފާރި ކުރާ ފަރާތްތަކަކަށް ވެފައި އެ ކުންފުނިތަކުގެ މާލީ ހާލަތު ހުރި ގޮތުން ޖޫރިމަނާ ދެއްކުމަށް ނުކުޅެދިފައިވުމާއި، އޭގެ ތެރެއިން ބައެއް ކުންފުނިތަކުން ޖޫރިމަނާ މަޢާފުކޮށްދިނުމަށް އެދި ރައީސުލްޖުމްހޫރިއްޔާގެ އޮފީހަށް ވެސް ހުށަހަޅާފައިވާ ކަމުގެ މަޢުލޫމާތު އެ ކޮމިޝަނަށް ލިބިފައި ވާތީ ކަމަށެވެ.
އޭގެ އިތުރުން، ސަރުކާރުގެ ބައެއް ވަޒީރުންގެ ފަރާތްޕުޅުން ވެސް ބައެއް ކުންފުނިތަކުގެ ޖޫރިމަނާ މައާފުކުރެވޭނެ ގޮތެއް އޮތްތޯ ބަލައިދިނުމަށް އެދި ކޮމިޝަނަށް ކަންބޮޑުވުން ހުށައަޅާފައިވާ ކަމަށާއި، އެ ކުންފުނިތަކުގެ މާލީ ހާލަތަށް ބަލައި، އެކަމުން އަރައިގަނެ، ޤާނޫނާއި ޤަވާއިދުތަކާ އެއްގޮތަށް ކުރިއަށް ދިއުމަށް މަގުފަހިކޮށްދެން ބޭނުންވާ ކަމަށް ވެސް ކޮމިޝަނުގެ ބަޔާނުގައި ބުނެފައި ވެއެވެ.
ވޭތުވެދިޔަ ދެ އަހަރެއްހާ ދުވަހުގެ ތެރޭގައި ލައިސަންސް ނެތި ނުވަތަ ޤަވާއިދާ ޚިލާފަށް ރީބްރޯޑްކާސްޓް ކޮށްގެން އެ ފަދަ ފަރާތްތަކާ މެދު ފިޔަވަޅު އެޅުމަށް ރީބްރޯޑްކާސްޓް ކުރުމުގެ ޤަވާއިދުގައި ބަޔާންކުރާ ޖޫރިމަނާ ޖުމްލަ 29 ފަރާތެއްގެ މައްޗަށް ކުރެވިފައިވާ ކަމަށާއި، އޭގެ ތެރެއިން ބައެއް ފަރާތްތަކުން ޖޫރިމަނާ ދައްކާފައިވާއިރު، 15 ފަރާތަކުން ޖޫރިމަނާ ނުދައްކާ ކަމަށް އެ ކޮމިޝަނުން ބުނެފައިވެއެވެ.
ރީބްރޯޑްކާސްޓަރުންގެ އިތުރުން ބްރޮޑްކޮމް އިން ވަނީ، އަބުރު ރައްކާތެރިކުރުމުގެ ނަމުގައި މިދިޔަ ސަރުކާރުން ފާސްކުރި އަބުރު ރައްކާތެރިކޮށްދިނުމާއި ނޫސްވެރިކަމުގެ މިނިވަންކަމުގެ ގާނޫނުގެ ދަށުން ބްރޯޑްކާސްޓަރުން ވެސް ބޮޑެތި އަދަދުތަކުން ޖޫރިމަނާކޮށްފައެވެ. އެގޮތުން އެކި މައްސަލަތަކުގައި ރާއްޖެޓީވީ 3.7 މިލިއަން ރުފިޔާ އިން ޖޫރިމަނާކޮށްފައިވާކަން ފާހަގަކޮށްލެވެ. ބްރޮޑްކޮމް އިން އެންގި މުއްދަތުތަކުގައި ރާއްޖެ ޓީވީން އެ ފައިސާ ދައްކާފައިވާއިރު އެ މައްސަލަތައް ވަނީ ކޯޓުގައެވެ. މި ސަރުކާރު އައުމާ އެކު އަބުރުގެ ގާނޫނު ވަނީ އުވާލާފައެވެ.
