މޯދީ ތަގްރީރު ކުރައްވާ ޖަލްސާ ހޮނިހިރު ދުވަހުގެ ރޭ!
އެންމެ ފުރަތަމަ އޮންނާނީ މޯދީއަށް މަޖިލީހުގެ ރައީސް މަރުހަބާ ދެންނެވުން
މޯދީ ރާއްޖެއަށް ކުރެއްވި ދަތުރުފުޅުގެ ތެރެއިން
އިންޑިއާގެ ބޮޑު ވަޒީރު ނަރެންދުރަ މޯދީ ރައްޔިތުންގެ މަޖިލީހުގައި ތަގްރީރު ކުރައްވާ ޖަލްސާ ހޮނިހިރު ދުވަހު އިރު އޮއްސި 06:45 ގައި ބާއްވާ ގޮތަށް އެޖެންޑާ ކޮށްފިއެވެ.
މޯދީ ތަގްރީރް ކުރައްވާ ޖަލްސާ 6:45 ގައި ފެށުމަށް ހަމަޖެހިފައިވާއިރު އެންމެ ފުރަތަމަ އޮންނާނީ މޯދީއަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު މަރުހަބާ ދެންނެވުމެވެ. އެމަނިކުފާނު މަޖިލީހުގެ މެމްބަރުންނާ މުހާތަބުކޮށް ވާހަކަފުޅު ދައްކަވާން ހަމަޖެހިފައިވާނީ އޭގެ ފަހުންނެވެ.
އިންޑިއާގެ ބޮޑުވަޒީރުގެ މަގާމަށް ދެ ވަނަ ދައުރަކަށް އިންތިހާބުވެ ވަޑައިގެންނެވި ނަރެންދުރަ މޯދީ މަގާމާ ހަވާލުވެވަޑައިގަތުމަށް ފަހު ފުރަތަމަ ފަހަރަށް އިންޑިއާ އިން ބޭރަށް ކުރައްވާ ދަތުރުފުޅުގައި ރާއްޖެ ވަޑައިގެން، ރައްޔިތުންގެ މަޖިލީހުގައި ތަގުރީރު ކުރެއްވުމަށް ދައުވަތު ދިނުމަށް މަޖިލީހުން ފާސްކޮށްފައި ވަނީ 29 މެއިގައި އޮތް ރައްޔިތުންގެ މަޖިލީހުގެ ޖަލްސާގައެވެ.
ރައްޔިތުންގެ މަޖިލިސް ކުރާ ގޭގައި ތަގްރީރް ކުރެއްވުމުގެ ފުރުސަތު ގައުމުތަކުން އަރުވަނީ، އެ ގައުމަކުން އެ މެހްމާނަކަށް ދެވޭނެ އެންމެ މަތީ ޝަރަފު އެރުވުމުގެ ގޮތުންނެވެ.
ރާއްޖެއަށް ކުރައްވާ ދެ ދުވަހުގެ ދަތުރުފުޅު ނިންމަވާލެއްވުމަށް ފަހު މޯދީ ފުރައިވަޑައިގަންނަވާނީ އަވަށްޓެރި ސްރީލަންކާ އަށެވެ.
މޯދީ ވަނީ ރައީސް އިބްރާހީމް މުހައްމަދު ސޯލިހް ހުވާކުރެއްވުމުގެ ޖަލްސާ އަށް ވެސް ވަޑައިގެންފައެވެ.
