އިންގްލޭންޑް އަންނަނީ ކުރިއެރުން ހޯދަމުން: ރަޝްފޯޑް

އިންގްލޭންޑް އަންނަނީ މަޑުމަޑުން ކުރިއެރުން ހޯދަމުން ކަމަށް މެންޗެސްޓާ ޔުނައިޓެޑަށް ކުޅެމުން އަންނަ އިނގިރޭސި ފޯވާޑް މާކަސް ރަޝްފޯޑް ބުނެފިއެވެ.

ދަ މިރާއަށް ދިން އިންޓަވިއުއެއްގައި ރަޝްފޯޑް ބުނީ، އިންގްލޭންޑްގެ މިސްރާބު މި ވަގުތު ހުރީ ރަނގަޅަށް ކަމަށާއި، ޓީމު މަޑުމަޑުން ކުރިއެރުންތައް ހޯދަމުން އަންނަ ކަމަށެވެ.

އުމުރުން 21 އަހަރުގެ ރަޝްފޯޑް ބުނީ، ރަޝިއާގައި މިދިޔަ އަހަރު ނިމުނު ވޯލްޑް ކަޕްގެ ކުރިން އިންގްލޭންޑުން ކުޅެމުންދިޔައީ ރަނގަޅު ފުޓުބޯޅައެއް ކަމަށާއި، މެޗުތަކުންވެސް މޮޅުވި ކަމަށެވެ. އަދި ސްޕެއިން އާއި ކްރޮއޭޝިއާ ދެކޮޅަށް މިދިޔަ އަހަރު ކުޅުނު މެޗުތަކުން ހޯދި ނަތީޖާއަކީ ކުރިއެރުން ހޯދާ ކަމުގެ ހެއްކެއް ކަމަށްވެސް އޭނާ ވަނީ ބުނެފައެވެ.

ނަމަވެސް ރަޝްފޯޑް ބުނީ، މައްސަލަތައް ކުރިމަތިވަނީ އަބަދުވެސް ބޮޑެތި ޓީމުތަކާ ދެކޮޅަށް ނިކުންނައިރު ކަމަށެވެ. އެގޮތުން އޭނާ ބުނީ، ދުނިޔޭގެ އެއްވަނަ ޓީމަށްވާން އިންގްލޭންޑުން ބޮޑެތި ޓީމުތައް ބަލިކުރަން ޖެހޭ ކަމަށެވެ.

ނޭޝަންސް ލީގުގެ ސެމީ ފައިނަލުގައި ނެދަލޭންޑްސްއާ ދެކޮޅަށް ނިކުންނަ މެޗާ ބެހޭ ގޮތުން ރަޝްފޯޑް ބުނީ، އެ މެޗު އުނދަގޫވާނެ ކަމަށާއި، އިންގްލޭންޑް ނިކުންނާނީ ރަނގަޅު ނަތީޖާއެއް ހޯދުމުގެ އަޒުމުގައި ކަމަށެވެ.

މީގެ އިތުރުން ރަޝްފޯޑް ބުނީ، އިންގްލޭންޑުން މުބާރާތެއް ކާމިޔާބުނުކުރާތާ ދުވަސްތަކެއް ވެފައިވާ ކަމަށާއި، ނޭޝަންސް ލީގަކީ އިންގްލޭންޑުން ހޯދަން މަސައްކަތް ކުރާ ތަށްޓެއް ކަމަށެވެ.

ރަޝްފޯޑް ވަނީ އިނގިރޭސި ގައުމީ ޓީމަށް މިހާތަނަށް ކުޅުނު 31 މެޗުގައި ހަ ލަނޑު ކާމިޔާބުކޮށްފައެވެ.