މެންޗެސްޓާ ޔުނައިޓެޑުން އެ ކްލަބަށް ކޯޗެއް ހޯދާނަމަ، އެކަމަށް އެންމެ ގާބިލީ އޭނާ ކަމަށް ފުޓުބޯޅަ ލެޖެންޑް ޑިއެގޯ މެރެޑޯނާ ބުނެފިއެވެ.

ފޯފޯޓޫއަށް ދިން އިންޓަވިއުއެއްގައި މެރެޑޯނާ ބުނީ، ޔުނައިޓެޑުން އެ ކްލަބުގެ ގިނަ އަދަދެއްގެ ޖޯޒީތައް މުޅި ދުނިޔެއަށް ވިއްކާ ކަމަށާއި، އެޓީމުން ތަށިތައް ވެސް ހޯދަންޖެހޭ ކަމަށެވެ.

އެގޮތުން މެރެޑޯނާ ބުނީ، ޔުނައިޓެޑަށް ތަށި ހޯދައިދެވޭނީ އޭނާއަށް ކަމަށާއި، އެ ކްލަބުގެ ކޯޗަކަށް އެންމެ ގާބިލީ އޭނާ ކަމަށެވެ. އަދި ޔުނައިޓެޑަކީ ވަރަށް ކުރިން ވެސް އޭނާ އެންމެ ގަޔާވާ އިނގިރޭސި ޓީމު ކަމަށް މެރެޑޯނާ ވަނީ ބުނެފައެވެ.

ޔުނައިޓެޑުގެ މިޑްފިލްޑަރ ޕައުލް ޕޮގްބާއަކީ މަސައްކަތްކުރާ ކުޅުންތެރިއެއް ނޫންކަން ފާހަގަކޮށް މެރެޑޯނާ ބުނީ، އެންޑްރޭ ހެރޭރާއަކީ އޭނާ ވަރަށް ގަޔާވާ ކުޅުންތެރިޔެއް ކަމަށެވެ.

މެރެޑޯނާ މިހެން ބުނެފައިވާއިރު، މި ސީޒަނުގައި ޔުނައިޓެޑަށް ޕޮގްބާ ވަނީ ކުޅުނު 47 މެޗުގައި 16 ލަނޑު ކާމިޔާބުކޮށްފައެވެ. ނަމަވެސް ހެރޭރާ ކުޅެފައި ވަނީ 28 މެޗެވެ.

ޔުނައިޓެޑުގެ ދާއިމީ ކޯޗެއްގެ ގޮތުގައި މި ވަގުތު ހުރީ އެ ކްލަބުގެ ކުރީގެ ފޯވާޑް އޮލެ ގުނަ ސޯލްޝެއާއެވެ. އޭނާގެ އިރުޝާދުގެ ދަށުން ޔުނައިޓެޑު ކުޅުނު 29 މެޗުގެ ތެރެއިން 16 މެޗުން ވަނީ މޮޅުވެފައެވެ. ބާކީ ނުވަ މެޗުން ބަލިވިއިރު، ހަތަރު މެޗުން ވަނީ އެއްވަރުވެފައެވެ.

އާޖެންޓީނާ ގައުމީ ޓީމާއެކު ވޯލްޑްކަޕް ކާމިޔާބުކޮށްފައިވާ މެރެޑޯނާ ވަނީ އާޖެންޓިނާ ގައުމީ ޓީމަށް އިރުޝާދު ދީފައެވެ. އޭނާ މިހާރު އިރުޝާދު ދެމުން އަންނަނީ މެކްސިކޯގެ ޑޮރަޑޯސްއަށެވެ.