ތިން ދިވެހިންނާއެކު ހާލުގައި ޖެހުނު ދޯންޏެއް އެމްއެންޑީފުން ހޯދައިފި
އުޅަނދު ފެނުނީ ހުވަދޫ ކަނޑުގެ 30 މޭލު ބޭރުން
ކަނޑު ދަތުރު ކުރައްވާ ހުރިހާ ބޭފުޅުންވެސް މޫސުމަށް ސަމާލުވުމަށް އެމްއެންޑީއެފުން އިލްތިމާސް ކުރޭ
ފުރިފަހުން ޚަބަރެއް ނުވެގެން ހޯދަމުން ދިޔަ "އުފުރިޔާ" ނަމަކަށް ކިޔާ ދޯންޏެއް ހާލުގައި ޖެހިފައި ވަނިކޮށް އެމްއެންޑީއެފް ސެންޓްރަލް އޭރިއާ ކޯސްޓްގާޑް ސްކޮޑްރަންއިން ކުރި މަސައްކަތުން ހޯދައިފިއެވެ.
މާލެއިން ފުރައިގެން އައްޑޫސިޓީ އަށް ދަތުރު ކުރި 33 ފޫޓުގެ އުފުރިޔާ ދޯނި ގެއްލިގެން، މިކަމުގެ ރިޕޯޓް އެމްއެންޑީއެފް ކޯސްޓްގާޑް މެރިޓައިމް ރެސްކިއު ކޯރޑިނޭޝަން ސެންޓަރ (އެމްއާރުސީސީ) އަށް ލިބިފައިވަނީ ހޯމަ ދުވަހު ހަވީރު 17:20 ހާއިރު ކަމަށް އެމްއެންޑިއެފުން ބުނެއެވެ.
އެމްއެންޑީއެފުން ބުނީ، މިކަމުގެ ރިޕޯޓް ލިބުމާއެކު އެމްއެންޑީއެފް ސެންޓްރަލް އޭރިއާ ކޯސްޓްގާޑު ސްކޮޑްރަންގެ ފާސްޓް އިންޓަރސެޕްޓަރ ކްރާފްޓް "މާފަތް" ލޯންޗު، އުފުރިޔާ ދޯނި ހޯދުމަށްޓަކައި ވަނީ މަސައްކަތް ފަށާފައި ކަމަށެވެ.
އެގޮތުން އުފުރިޔާ ދޯނި ހޯދުމަށްޓަކައި މާލެ އިން ފުރައިގެން އެމްއެންޑީއެފް ކޯސްޓްގާޑް ޝިޕް ޝަހީދުޢަލީވެސް ހަރަކާތްތެރިވަމުންދަނިކޮށް، ދޯނި ފެނިފައިވަނީ އެމްއެންޑީއެފް ސެންޓްރަލް އޭރިއާ ކޯސްޓްގާޑު ސްކޮޑްރަންގެ ފާސްޓް އިންޓަރ ސެޕްޓަރ ކްރާފްޓް "މާފަތް" ލޯންޗަށް ކަމަށް އެމްއެންޑީއެފުން ބުނެއެވެ.
އެމްއެންޑީއެފުން ބުނީ، އުފުރިޔާ ދޯނި ފެނުނީ ހޯމަ ދުވަހުގެ ރޭ 22:30 ހާއިރު، ލ. ގަމުގެ އިރުން 31 ނޯޓިކަލް މޭލު ބޭރުން އިންޖީނު ހުއްޓިފައި އޮއްވާ ކަމަށެވެ.
މީގެއިތުރުން އެމްއެންޑީއެފުން ބުނީ، އިންޖީނު ހުއްޓިގެން ހާލުގައި ޖެހިފައި އޮތް އުފުރިޔާ ދޯނި ފެނުނު އިރު އޭގައި ތިން ދިވެހިން ތިބި ކަމަށާއި، އެ ތިން މީހުންގެ ހާލުވެސް ރަނގަޅު ކަމަށެވެ. އަދި ދޯނީގެ ވެރިފަރާތުން ދޯނި ކަފުޖަހާނެ އުޅަނދެއް ހޯދުމުގެ މަސައްކަތް ދަނީ ކުރަމުން ކަމަށްވެސް އެމްއެންޑީއެފުން ބުނެއެވެ.
