ކުރެވޭ މަސައްކަތުގެ ނަތީޖާ ފެންނަމުންދާކަން އުފަލާ އެކު ފާހަގަ ކުރަން: މަހްލޫފް
2 ޖޫން 2019 | އާދީއްތަ 16:54ގިނަ ކުންފުނިތަކަކާއި މުއައްސަސާތަކުން މި ހަރަކާތުގައި ބައިވެރިވޭ
ޔޫތު މިނިސްޓަރ އަޙުމަދު މަހްލޫފް
މަގުމަތީގެ ސަލާމަތާއި ރައްކާތެރިކަމަށް ކުރެވޭ މަސައްކަތުގެ ނަތީޖާ ފެންނަމުންދާ ކަމަށް ޔޫތު މިނިސްޓަރ އަހުމަދު މަހލޫފް ވިދާޅުވެއްޖެއެވެ.
އާދިއްތަ ދުވަހު އެއް ނަމްބަރު ޖެޓީ ސަހަރައްދުގައި ބޭއްވި މަގުމަތީގެ ރައްކާތެރިކަމާ ގުޅޭ މީސް މީޑިޔާ ހަރަކާތް ފެށުމުގެ ރަސްމިއްޔާތެއްގައި ވާހަކަފުޅު ދައްކަވަމުން މިނިސްޓަރ މަހްލޫފް ވިދާޅުވީ މަގުތަކަކީ ރައްޔިތުންނަށް އަމާންތަނަކަށް ހެދުން އެއީ ރައީސުލް ޖުމުހުރިއްޔާގެ އެއް ވައުދުފުޅު ކަމަށާއި އެގޮތުން މިސަރުކާރު އައި ފަހުން އެކަމަށްޓަކައި މަސައްކަތްތަކެއް ކުރަމުން ދާކަމަށެވެ. އަދި މިއަދާ ހަމައަށް އައިއިރު ފާހަގަ ކުރެވޭ ރަނގަޅު ބަދަލުތަކެއް ފެނިފައިވާ ކަމަށް މިނިސްޓަރ ވިދާޅުވިއެވެ.
މީގެ އިތުރުން ވެސް ޔޫތު މިނިސްޓްރީގެ ކޮމިއުނިޓީ އެމްޕަވަރމެންޓް އަދި އެކްޓީން ޑިޕާރޓްމެންޓް ހެޑް ފާތިމަތު ޝެހެޒިނީ ވިދާޅުވީ މި ހަރަކާތުގައި ބޭނުންކުރާ ފޮޓޯ ޕްރޭމްތައް ތައްޔާރުކޮށްފައި ވަނީ މަގުމަތީގެ ސަލާމަތާއި ރައްކާތެރިކަމާ ގުޅޭ ގޮތުން ތައްޔާރުކޮށްފައިވާ ފަސް ޝިއާރެއްގެ ދަށުން ކަމަށްވާއިރު ވީހާ ވެސް ގިނައިން ފޮޓޯ ނެގުމަށް ފަހު ގިނަ ބޭފުޅުން އެ ފޮޓޯތައް ސޯޝަލް މީޑިއާގައި ހިއްސާކުރުމަކީ ވަރަށް ބޮޑަށް އެދޭ ކަމެއް ކަމަށެވެ.
މި ހަރަކާތުގައި ގިނަ ކުންފުނިތަކަކާއި އެކި މުއައްސަސާތަކުން ބައިވެރިވެއެވެ. އެގޮތުން މޯލްޑިވްސް ޕޮލިސް ސާރވިސާއި، ޔޫތު މިނިސްޓްރީ އާއި، ޓްރާންސްޕޯޓް މިނިސްޓްރީ، އެޗްޕީއޭގެ އިތުރުން މާލޭ ސިޓީކައުންސިލް ހިމެނެއެވެ. އޭގެ އިތުރުން އެމްޓީސީސީ އާއި ބީއެމްއެލް، އޫރީދޫ، އާސަންދައިގެ އިތުރުން ވެމްކޯ އާއި އައިލެންޑް އޭވިއޭޝަން ވެސް މި ހަރަކާތުގައި ބައިވެރި ވެއެވެ. އަދި ސްޓެލްކޯ އާއި މޯލްޑިވްސް މެޑިކަލް އެސޯސިއޭޝަންގެ އިތުރުން ދިރާގާއި އެންސްޕާ ހިމެނެއެވެ. އަދި އެސްޓީއޯ އާއި އެލައިޑް ވެސް މި ހަރަކާތުގައި ބައިވެރި ވެއެވެ. އެމްޕީއެލް އާއި ކަސްޓަމްސް ހިމެނޭއިރު އެމްޑަބްލިއުއެސްސީ އާއި ފެނަކައިން ވެސް މި ހަރަކާތުގައި ބައިވެރި ވެއެވެ. އަދި މިނޫނަސް ފާހަގަ ކޮށްލެވޭ ގިނަ ފަރާތްތަކަކުން ބައިވެރިވެއެވެ.
