މަގުމަތީގެ ރައްކާތެރިކަމާ ގުޅޭ ހަރަކާތެއް މީސްމީޑިއާގައި ފަށައިފި
މުޅި ރާއްޖޭގައި މި ހަރަކާތް ހިންގުމަށް ހަމަޖެހިފައިވޭ
ނައިބު ރައީސް ފައިސަލް ނަސީމް ކުޑަ ކުދިންތަކަކާ އެކު ފޮޓޯއެއްް ނަންގަވަނީ
މަގުމަތީގެ ސަލާމަތާއި ރައްކާތެރިކަމާ ގުޅޭ ހަރަކާތެއް މީސްމީޑިއާގައި ފަށައިފި އެވެ.
މަގުމަތީގެ ރައްކާތެރިކަމާ ގުޅޭ ހަރަކާތް ރަސްމީކޮށް ފައްޓަވައި ދެއްވީ އެއް ނަމްބަރު ޖެޓީ ސަރަހައްދުގައި އޮތް ހަފްލާއެއްގައި ނައިބު ރައީސް ފައިސަލް ނަސީމެވެ.
އާދިއްތަ ދުވަހު ހަވީރު އޮތް މި ހަރަކާތުގައި ވާހަކަ ދައްކަވަމުން ނައިބުރައީސް ފައިސަލު ވިދާޅުވީ ސަރުކާރުގެ އެންމެ މުހިންމު ސިޔާސަތަކީ ރައްޔިތުންނަށް ސަލާމަތާއި ރައްކާތެރިކަން ކަށަވަރު ކޮށްދިނުން ކަމަށާއި އަދި ރައީސް އިބްރާހިމް މުހައްމަދު ޞޯލިހު ވެސް އެންމެ އިސްކަމެއް ދެއްވާ ކަމަކީ ވެސް އެއީ ކަމަށެވެ.
މީގެ އިތުރުން ފައިސަލް ވިދާޅުވީ މި ވަރުގެ ގައުމެއްގައި މިހާ ވަރަށް އެކްސިޑެންޓްތައް ހިނގުމަކީ ގަބޫލު ކުރެވޭނެ ކަމެއް ނޫން ކަމަށާއި މިއަދުވެސް ރާއްޖޭގައި އެކްސިޑެންޓްތަކުގެ ސަބަބުން ނުކުޅެދޭ ހާލަތުގައި ތިބި އެތައް ބަޔަކު އެބަ އުޅޭ ކަމަށެވެ. އަދި އެތައް ބައެއްގެ ފުރާނަ ގެއްލިފައިވާ ކަމަށާއި މިފަދަ މަންޒަރުތަކަކީ ގަބޫލު ކުރާ އަދި ދެކެން ބޭނުންވާ ކަންކަން ނޫން ކަމަށެވެ.
މަޑުން ދުއްވުމާއި ބާރަށް ދުއްވުމަކީ އެ މީހެއްގެ އިޚްތިޔާރުގައި އޮންނަ ކަމެއް ކަމަށް ވާއިރު ދުއްވުމުގައި ސަމާލުކަން ދޭންޖެހޭ އެތައް ކަމެއް ހުންނަ ކަމަށް ނައިބު ރައީސް ވިދާޅުވިއެވެ.
ދުނިޔޭގެ ގައުމުތަކުގައި ބާރަށް ދުއްވަނީ ދުވާލަކު އެތައް ސަތޭކަ ކިލޯމީޓަރެއް ދުއްވަން ޖެހިފައިވާ އަދި އެކަމުގައި ގިނަ ވަގުތުތަކެއް ހޭދަކުރަން ޖެހިފައިވާ ގައުމުތަކުގައި ކަން ފާހަގަ ކުރައްވާ ނައިބު ރައީސް ވިދާޅުވީ ޔޫރަޕާއި ސިންގަޕޫރުގެ ގައުމުތަކާއި އެހެނިހެން ބޮޑަތި ގައުމުތަކުގައި ވެސް ސަލާމަތާއި ރައްކާތެރިކަން އޮތީ މި ކުޑަކުޑަ ރާއްޖެއާ އަޅާބަލާއިރު ވަރަށް މަތީ ދަރަޖައަކަށް ރައްކާތެރި ކުރެވިފައި ކަމަށެވެ.
ރޯޑްސޭފްޓީ ކެމްޕެއިންގެ މީސްމީޑިއާ ހަރަކާތަކީ ނައިބު ރައީސް ފައިސަލް ނަސީމްގެ އިސްނެންގެވުމުގެ މަތިން ރާއްޖޭގެ ހުރިހާ ހިސާބެއްގައި ހިންގުމަށް ހަމަޖެހިފައިވާ ހަރަކާތުގެ ފެށުމެވެ. މި ހަރަކާތް މިއަދު މާލޭގެ ނުވަ ސަރަހައްދެއްގައި ހިންގުމަށް ހަމަޖެހިފައިވެއެވެ. އަދި ހުޅުމާލޭގެ ދެ ސަރަހައްދެއްގައި ހިންގާނެއެވެ.
މި ހަރަކާތުގައި މައިގަނޑު ގޮތެއްގައި އޮންނާނީ މަގުމަތީގެ ސަލާމަތާއި ރައްކާތެރިކަމާ ގުޅޭ މެސެޖްތަކެއް ލިޔެގެން ހަދާފައިވާ ފޮޓޯ ފްރޭމްތައް ބޭނުންކޮށްގެން ފޮޓޯނެގުމަށް ފަހު ހޭޝްޓެގާ އެކު ސޯޝަލް މީޑިއާއަށް އަޕްލޯޑް ކުރުމެވެ.
