ހައްޖަށް ދާން ރައްކާކޮށްފައި ހުއްޓާ ވަގަށް ނެގި ފައިސާ އަދިވެސް ނުހޯދޭ
2 ޖޫން 2019 | އާދީއްތަ 06:24ފައިސާ ވަގަށް ނަގާފައި ވަނީ މިދިޔަ ހަފްތާ ހޯމަ ދުވަހު
ވަގަށް ނަގާފައި ވަނީ 300،000 ރުފިޔާ
ނިމިގެން ދިޔަ ހަފްތާގެ ހޯމަ ދުވަހު ފ. ދަރަބޫދޫގައި ބަޔަކު ހައްޖަށް ދާންވެގެން ރައްކާ ކޮށްފައި ހުއްޓާ ވަގަށް ނެގި 300،000 ( ތިންލައްކަ ރުފިޔާ) އަދިވެސް ނުހޯދޭ ކަމަށް ފުލުހުން ބުނެފިއެވެ.
ފުލުހުން މީޑިއާ އޮފިޝަލް ވިދާޅުވީ، އެ މައްސަލާގައި މިހާތަނަށް އެއްވެސް މީހަކު ހައްޔަރު ކޮށްފައިނުވާ ކަމަށާއި، އެ މައްސަލަ ބަލަމުންދާ ކަމަށެވެ.
ދަރަނބޫދޫގެ ކައުންސިލުންގެ ރައީސް އަލީ މުހައްމަދު ރާއްޖެ.އެމްވީ އަށް ވިދާޅުވީ، ގެއްލުނު ފައިސާ އަކީ މުސްކުޅި ދެމަފިރިއަކު ހައްޖަށްދާން ރައްކާ ކޮށްފައި ހުރި ފައިސާތަކެއް ކަމަށެވެ.
ފައިސާގެ އިތުރުން ރަންފަށެއް ވެސް ވަނީ ވަގަށް ނަގާފައެވެ. އަލީ މުހައްމަދު ވިދާޅުވީ، ފައިސާ ރައްކާކޮށްފައި ހުރި އެ ދެމަފިރިން ކުރިން ދިރިއުޅުނު އެރަށު އަތަމާގޭގެ ކަބަޑަކަށްލާފައި ކަމަށެވެ.
ފައިސާ ނެގިކަން އެމީހުންނަށް އެނގުނީ ހޯމަ ދުވަހު ހެނދުނުއެވެ. އެ ދެމަފިރިން ބޭންކުގައި ފައިސާ ރައްކާ ނުކުރުނީ ބޭންކަށް އިތުބާރު ނުކުރާތީ ކަމަށް ރަށު ކައުންސިލްގެ ރައީސް ފާހަގަ ކުރެއްވިއެވެ.
ވައްކަން ކުރިކަމަށް ތުހުމަތު ކުރެވެނީ އެރަށު ބައެއް ކަމަށް އަލީ މުހައްމަދު ވިދާޅުވިއެވެ.
ފަހަކަށް އައިސް ބައެއް ރަށްރަށުގައި ބޮޑެތި އަދަދުން ފައިސާ ވަގަށް ނެގުން ވަނީ އިތުރުވެފައެވެ. މާލެ އަތޮޅު ދިއްފުށި ފިހާރައަކުން ވަގަށް ތިޖޫރީ އެއް ނެގި މައްސަލަ ބޮޑުވެ އެރަށު ރައްޔިތުން ނިކުމެ އެކަން ކުރިކަމަށް ތުހުމަތު ކުރެވޭ މީހުންނާ ދެމެދު ވަނީ ކުރިމަތިލުން ތަކެއް ހިނގާފައެވެ.
