ޗެލްސީ ދޫކޮށްލަން ސާރީ އެދިއްޖެ، ބަދަލުވަނީ ޔުވެންޓަސް އަށް!

ޗެލްސީ ދޫކޮށްލަން އެ ކްލަބުގެ ކޯޗު މައުރީޒިއޯ ސާރީ އެދިފައިވާ ކަމަށާއި، އޭނާ ބަދަލުވަނީ ޔުވެންޓަސް އަށް ކަމަށް ރިޕޯޓްތައް ބުނެފިއެވެ.

ގޯލްޑޮޓްކޮމް އިން ބުނީ، ޗެލްސީގެ އިސްވެރިންނާ މިދިޔަ ހުކުރު ދުވަހު ސާރީގެ އެޖެންޓް ފަލި ރަމާންޑި ބައްދަލުކޮށްފައިވާ ކަމަށާއި، ސާރީގެ ފަރާތުން އެދިފައި ވަނީ ރިލީޒްކޮށްދިނުމަށް ކަމަށެވެ.

މީގެ އިތުރުން، އެ ބައްދަލުވުމުގައި ސާރީ ބަދަލުވާން ބޭނުންވަނީ ޔުވެންޓަސްއަށް ކަމަށް ރަމާންޑި ބުނެފައިވާ ކަމަށް ވެސް ގޯލްޑޮޓްކޮމްއިން ބުނެއެވެ.

ބައެއް ރިޕޯޓްތައް ބުނާ ގޮތުން ޔުވެންޓަސްއާ އެކު ސާރީ ވަނީ މިހާރު އެއްބަސްވުމަކަށް އައިސްފައެވެ. އެގޮތުން އޭނާ މިހާރު މަޑުކޮށްގެން ހުރީ ޗެލްސީން ދޭނެ ޖަވާބަކަށް ކަމަށް ވެސް ރިޕޯޓްތައް ބުނެއެވެ.

ޗެލްސީއާ އެކު ސާރީ ހަދާފައިވާ އެއްބަސްވުމުގައި ބާކީ ދެ އަހަރު އޮތްއިރު، އޭނާ ދާދި ފަހުން ނޫސްވެރިންނަށް މައުލޫމާތު ދެމުން ބުނީ، ޕްރިމިއާ ލީގުގައި ކޯޗުކޮށްދިނުމަކީ އުފަލެއް ކަމަށާއި، އެއްބަސްވުން ހަމަވަންދެން ކްލަބުގައި މަޑުކުރަން ބޭނުންވާ ކަމަށެވެ.

ބައެއް ރިޕޯޓްތައް ބުނާ ގޮތުން ފަސް މިލިއަން ޔޫރޯ ހުށަހަޅާ ކްލަބަކަށް ސާރީ ދޫކޮށްލަން ޗެލްސީން އެއްބަސްވެއެވެ. އަދި ފަސް މިލިއަން ޔޫރޯ ދިނުމަށް ފަހު ސާރީ ގެންނަން ޔުވެންޓަސްއިން ވެސް ބޭނުންވާ ކަމަށް ރިޕޯޓްތައް ބުނެއެވެ.

މިދިޔަ އަހަރުގެ ޖުލައި މަހު ޗެލްސީގެ ކޯޗުކަމާ ސާރީ ހަވާލުވުމަށްފަހު، މިހާތަނަށް އިރުޝާދުދިން 62 މެޗުގެ ތެރެއިން 38 މެޗުން އެ ޓީމު ވަނީ މޮޅުވެފައެވެ. ބާކީ 11 މެޗުން އެ ޓީމު ބަލިވިއިރު، 13 މެޗުން ވަނީ އެއްވަރުވެފައެވެ.