ރޯ މަހުގެ އަގު އުފުލިއްޖެ

ރޯ މަހުގެ އަގު އުފުލިއްޖެއެވެ.

ރަމަޟާން މަސް ފެށިގެން އެއް އަގެއްގައި ހިފެހެއްޓިފައިވާ ރޯމަހުގެ އަގު މިހާރު ވަނީ އުފުލެން ފަށާފައެވެ. ހޮނިހިރު ދުވަހު މަސް މާރުކޭޓްގައި މަސް ކިލޯއެއް ހުރީ 45ރ. އާއި 50ރ. އާ ދެމެދުގެ އަގެއްގައެވެ. ކަންނެލި ހުރީ ކިލޯއެއް 60ރ. އާއި 70ރ. އާ ދެމެދުގެ އަގެއްގައެވެ.

ރޯމަސް މާރުކޭޓްގައި މަސް ވިއްކާ ފަރާތްތަކުން ބުނީ އަދިވެސް މަހުގެ އަގު އުފުލިގެންދާނެ ކަމަށް ބެލެވޭ ކަމަށެވެ. މަހުގެ އަގު އުފުލިފައި ވަނީ މަސްވެރިން މަހަށް ނުދިއުމުގެ ސަބަބުން، މާރުކޭޓަށް މަސް ނުލިބޭތީ ކަމަށް މާރުކޭޓްގައި މަސް ވިއްކާ ފަރާތްތަކުން ވަނީ ބުނެފައެވެ.

ރޯމަހެކޭ އެއްގޮތަށް ފަރުމަހުގެ އަގު ވެސް ވަނީ އުފުލިފައެވެ.

ފިލޮޅު ހުރީ ކިލޯއެއް 70ރ. އާއި 100ރ. އާ ދެމެދުގެ އަގެއްގައެވެ. ގިނިމަސް ކިލޯއެއް 50ރ. އަށް ހުރިއިރު، ރަތްމަސް ކިލޯއެއް ހުރީ 80ރ. އާއި 100ރ. އާ ދެމެދުގެ އަގެއްގައެވެ.

މާރުކޭޓްގައި ފަރުމަސް ވިއްކާ ފަރާތްތަކުން ބުނީ، ފަރުމަހުގެ އަގު އުފުލިފައި ވަނީ މޫސުމް ގޯސްވުމުގެ ސަބަބުން ކަމަށެވެ.