ބުރާސްފަތި ދުވަހު ކާށިދޫ ފަރަށް އަރާފައިވާ ފިއުލް ސަޕްލައި މޯލްޑިވްސް (އެފްއެސްއެމް) ގެ ތެޔޮ ބާޖު ފުންކުރެވިފައިވާ ކަމަށް އެމްއެންޑީއެފުން ބުނެފިއެވެ.

އެކަމާ ގުޅޭގޮތުން "ރާއްޖެއެމްވީ" އަށް މައުލޫމާތު ދެއްވަމުން އެމްއެންޑީއެފްގެ މީޑީއާ އޮފިޝަލު ވިދާޅުވީ، ތެޔޮ ބާޖު ހޮނިހިރު ދުވަހުގެ މެންދުރު 11:22 ހާއިރު ފުންކުރެވިފައިވާ ކަަމަށާއި، ތެޔޮ ބާޖަށް އިތުރު ގެއްލުމެއް ލިބިފައި ނުވާ ކަމަށެވެ. އަދި ފުން ކުރުމުގެ ތެރޭގައި މޫދަށް ތެޔޮ ލީކުވެފައިނުވާ ކަމަށް ވެސް އެމްއެންޑީއެފުގެ އޮފިޝަލުން ވަނީ ކަށަވަރު ކޮށްދެއްވާފައެވެ.

"މާތޮޅި" ނަމަކަށް ކިޔާ 100 ފޫޓުގެ މި ތެޔޮ ބާޖު ކާށިދޫ ހުޅަނގު ނެރު މައްޗަށް އުރުނުއިރު، އެ ތެޔޮ ބާޖުގައި 27000 ލީޓަރުގެ ޕެޓްރޯލާއި، 180000 ލީޓަރު ޑީސަލް ބަރުކޮށްފައި ހުއްޓެވެ. އަދި ބާޖު ފުން ކުރުމަށްޓަކައި އެމްއެންޑީއެފުން އުޅަނދުގައި ހުރި ތެޔޮ ހުސްކުރުމުގެ މަސައްކަތް ކޮށްފައިވާއިރު، ކާށިދޫ ގޮނޑުދޮށަށް ވެސް އެއްވެސް ވަރަކަށް ތެލުގެ އަސަރު މިހާތަނަށް ކޮށްފައިނުވާ ކަމަށް ކާށިދޫ ކައުންސިލުގެ ޒިންމާދާރުވެރިޔާ ވެސް ވަނީ "ރާއްޖެއެމްވީ" އަށް ކަށަވަރު ކޮށްދެއްވާފައެވެ.

އެ ހާދިސާ ހިނގި އިރު އުޅަނދުގައި ހަ ދިވެއްސަކު ތިބި ކަމަށާއި، މިހާތަނަށް އެއްވެސް ގެއްލުމެއް ލިބުނު ކަމުގެ މައުލޫމާތު ނުލިބޭ ކަމަށް އެމްއެންޑީއެފްއިން މައުލޫމާތު ދީފައިވެއެވެ.