އީދު ނަމާދު ކުރާ ސަރަހައްދުގައި އޮފިޝަލުންގެ ގޮތުގައި ބިދޭސީން ހަރަކާތްތެރިވަނީ
1 ޖޫން 2019 | ހޮނިހިރު 08:30މާލޭގައި އީދު ނަމާދު ކުރަނީ މާފަންނު ސްޓޭޑިއަމްގައި
އިސްލާމިކް މިނިސްޓްރީން ބޭއްވި ޕްރެސް ކޮންފަރެންސް
މިއަހަރުގެ ފިތުރު އީދު ނަމާދު ބޮޑު ޖަމާއަތުގައި ކުރަން ހަމަޖެއްސި ސަރަހައްދުގައި އޮފިޝަލުންގެ ގޮތުގައި ބިދޭސީން ހަރަކާތްތެރިވާ ގޮތަށް ހަމަޖައްސައިފިއެވެ.
މިކަން ހާމަކޮށްފައިވަނީ، ފިތުރު އީދުގައި މާލޭ އަދި ރާއްޖޭގެ އިތުރު ހިސާބުތަކުގައި ބޮޑު ޖަމާއަތުގައި ކުރެވޭ އީދު ނަމާދާއި ބެހޭ ގޮތުން މައުލޫމާތު ދިނުމަށްޓަކައި އިސްލާމިކް މިނިސްޓްރީ ގައި ހޮނިހިރު ދުވަހު ބޭއްވި ޕްރެސް ކޮންފަރެންސެއްގައެވެ.
އެ ޕްރެސް ކޮންފަރެންސް ގައި ވާހަކަ ދައްކަމުން މާލެ ސިޓީ ކައުންސިލްގެ މެމްބަރު އަހުމަދު ނިޔާޒް ވިދާޅުވީ، އޮފިޝަލުންގެ ގޮތުގައި ބިދޭސީން ބައިވެރިކުރަން ނިންމާފައިވަނީ، އީދު ނަމާދުކުރުމަށް ގިނަ އަދަދަކަށް ބިދޭސީން ވެސް ދާކަން ފާހަގަކުރެވޭތީ ކަމަށެވެ.
އެމީހުންގެ ތެރެއިން ބަޔަކު އޮފިޝަލުންގެ ތެރޭގައި ހަރަކާތްތެރިވާނަމަ ކޮމިއުނިކޭޓު ކުރަން ފަސޭހަވެގެންދާނެ ކަމަށް އޭނާ ވިދާޅުވިއެވެ.
ރާއްޖޭގައި ބޮޑު ޖަމާއަތުގައި އީދު ނަމާދު ކުރަމުންދާތާ ހަތް އަހަރުވެފައިވާއިރު، ބިދޭސީންނަށް އެފަދަ ކަމަކަށް ހުއްދަ ދިނުމަށް، ކަމާބެހޭ ފަރާތްތަކުން ނިންމި މިއީ ފުރަތަމަ ފަހަރުކަން ފާހަގަ ކޮށްލެވެއެވެ.
މާލޭގައި ބޮޑު ޖަމާއަތުގައި އީދު ނަމާދު ކުރަން ހަމަޖެހިފައިވަނީ މާފަންނު ޓާފް ދަނޑުގައެވެ.
