އައްޑޫސިޓީގައި 20 މެގަ ވޮޓްގެ ސެންޓްރަލް ޕަވަރ ގްރިޑެއް ގާއިމް ކުރަނީ: ފެނަކަ
1 ޖޫން 2019 | ހޮނިހިރު 05:47ޕަވަރ ގްރިޑް ގާޢިމް ކުރުމަށް ކުރަންޖެހޭ ދިރާސާކުރުމަށް ޓެކްނިކަލް ޓީމެއް އަންނަ މަހު އައްޑޫސިޓީއަށް ދާނެ ކަމަށް ވިދާޅުވި
ފެނަކަ ކޯޕަރޭޝަންގެ މެނޭޖިން ޑިރެކްޓަރ އަހުމަދު ސައީދު މުހައްމަދު
އައްޑޫސިޓީގައި 20 މެގަ ވޮޓްގެ ސެންޓްރަލް ޕަވަރ ގްރިޑެއް ގާއިމް ކުރުމަށްޓަކައި ކުރަންޖެހޭ މަސައްކަތް ކުރަމުން އަންނަ ކަމަށް ފެނަކަ ކޯޕަރޭޝަނުން ބުނެފިއެވެ.
ފެނަކަ ކޯޕަރޭޝަންގެ މެނޭޖިން ޑިރެކްޓަރ އަހުމަދު ސައީދު މުހައްމަދު ވިދާޅުވީ އައްޑޫސިޓީގައި 20 މެގަ ވޯޓްގެ ސެންޓްރަލް ޕަވަރ ގްރިޑެއް ގާއިމް ކުރުމަށް ކުރަންޖެހޭ ސާރވޭ ކުރުމަށް ފެނަކައިގެ ޓެކްނިކަލް ޓީމެއް އަންނަ މަހު ތެރޭގައި އެ ސިޓީއަށް ދާނެ ކަމަށެވެ.
އައްޑޫސިޓީގައި ސެންޓްރަލް ޕަވަރގްރިޑް ނިޒާމެއް ގާއިމްވެގެންދާއިރު އެ ސިޓީގައި ވަކިން އޮންނަ ހުޅުދޫ ސަބްމެރިން ކޭބަލްއަކުން ގުޅާލުމަށްޓަކައި، އެކަން ވިލަރެސް ކުރަމުންދާ ކަމަށް ސައީދު ވިދާޅުވިއެވެ.
ސައީދު ވިދާޅުވީ މިއީ އައްޑޫސިޓީއަށް ދިމާވެފައިވާ ކަރަންޓްގެ މައްސަލައަށް ރަނގަޅު ދާއިމީ ހައްލެއް ހޯދުމަށް ކުރަމުންދާ މަސައްކަތެއް ކަމަށެވެ.
އައްޑޫ ސިޓީގެ ކަރަންޓް ދޭތެރެ ދޭތެރެއިން ކެނޑެމުން އަންނާތީ، އެ ސިޓީގެ ގިނަ ރައްޔިތުން ދަނީ ކަންބޮޑުވުން ފާޅުކުރަމުންނެވެ. އަދި އެ ކަމަށް އަވަސް ހައްލެއް ބޭނުންވާ ކަމަށް، އެ ސިޓީގެ ރައްޔިތުން އަންނަނީ ބުނަމުންނެވެ.
