އިންސާނުންނަށް ނުރައްކާތެރި ކެމިކަލް އެކުލެވޭ ޓްރާންސްފޯމަރުތައް އައްޑުއާ ފުވައްމުލަކުގައި
31 މެއި 2019 | ހުކުރު 17:30އެތަކެތި ނައްތާލުމުގެ މަސައްކަތް ވަނީ ފަށާފައި
އައްޑޫގެ މަރުކަޒީ އިންޖީނުގޭގައި ބޭނުން ކުރަމުން އަންނަ ޖަނަރޭޓަރުތައް
ތިމާވެއްޓަށާއި އިންސާނުންނަށް ނުރައްކާތެރި ކެމިކަލް އެކުލެވޭ ޓްރާންސްފޯމަރުތައް އައްޑޫއާއި ފުވައްމުލަކުގައި އެބަހުރި ކަމަށާއި، އެތަކެތި ނައްތާލުމުގެ މަސައްކަތް ފަށާފައިވާ ކަމަށް އައްޑޫ ސިޓީ ކައުންސިލުން ބުނެފިއެވެ.
އައްޑޫ ސިޓީ ކައުންސިލުން ބުނީ ތިމާވެއްޓަށާއި އިންސާނުންނަށް ނުރައްކާތެރި ކެމިކަލް 'ޕޮލީކްލޮރިނޭޓެޑް ބައިފީނައިލްސް (ޕީސީބީ)' އެކުލެވޭ ޓްރާންސްފޯމަރުތައް ނައްތާލުމަށް އެންވަޔަރަމެންޓް މިނިސްޓްރީއާއި ޔުނައިޓެޑް ނޭޝަންސް އިންޑަސްޓްރިއަލް ޑިވެލޮޕްމަންޓް އޯގަނައިޒޭޝަން (ޔުނީޑޯ) ގުޅިގެން ނެޝަނަލް މެނޭޖްމެންޓް ޕްލޭނެއް އެކުލަވާލުމުގެ މަސައްކަތް ފަށާފައިވާ ކަމަށެވެ.
ކައުންސިލުން ބުނީ މިޕްލޭން އެކުލަވާލުމުގައި ކައުންސިލާއެކު މަޝްވަރާކުރެއްވުމަށް އެންވަޔަރަމެންޓް މިނިސްޓްރީގެ ފަރާތުން ބުރާސްފަތި ދުވަހު ވަޑައިގެންނެވި ޓީމުން މައުލޫމާތު ދިންގޮތުގައި 1989 ވަނަ އަހަރުގެ ކުރިން ތައްޔާރުކޮށްފައިވާ ޓްރާންސްފޯމަރުތައް އައްޑޫއާއި ފުވައްމުލަކުގައި އެބަހުރި ކަމަށާއި އެތަކެތީގައި މިކެމިކަލް އެކުލެވޭ ކަމެށެވެ.
މިނިސްޓްރީގެ ޓީމާ ހަވާލާދީ ކައުންސިލުން ބުނީ ޕީސީބީ އެކުލެވޭކަމަށް ބެލެވޭ 6 ޓްރާންސްފޯމަރު އައްޑޫގައި އެބަހުރި ކަމަށާއި އޭގެ ތެރެއިން ބޭނުންކުރަނީ 3 ޓްރާސްފޯމަރުކަމަށެވެ.
ކައުންސިލުން ބުނީ މިޕްލޭނުގެ ބޭނުމަކީ އެތަކެތި ރާއްޖެއިން ބޭރަށް ގެންގޮސް ތިމާވެއްޓާއި ރައްޓެހިގޮތަކަށް ނައްތާލާނެ ގޮތުގެ ޕްލޭން އެކުލަވާލުން ކަމަށެވެ. އެހެންކަމުން އެތަކެތި ނަގައި ރީޕްލޭސް ކުރުމަށްޓަކައި ފެނަކާއާއިވެސް މިހާރު މަޝްވަރާކުރައްވާފައިވާ ކަމަށެވެ.
ޕީސީބީ އަކީ ކެންސަރާއި އަދި ތަފާތު ނުރައްކާތެރި ބަލިތަކަށް ކުރިމަތިކުރުވާ އެއްޗެކެވެ. މިހާރު ދުނިޔޭގެ ގައުމުތަކުގައި ޕީސީބީ ބޭނުންކުރުން ހުއްޓާލާފައިވީ ނަމަވެސް މިކެމިކަލަކީ އޭގެ އަސަރު ޒަމާންތަކަށް ދެމިގެންދާ އެއްޗެކެވެ.
މިހާރު ބޭނުން ކުރުން ވަރަށް ބޮޑަށް މަދުވެފައިވީ ނަމަވެސް އެފަދަ ކެމިކަލް ހުރި ނަމަ އެތަކެތި ވީހާވެސް އަވަހަކަށް ކައުންސިލްއާ ހަވާލުކުރުމަށް ވަނީ އިލްތިމާސްކޮށްފައެވެ.
