މޫސުން ގޯސްވެ ގިނަ ރަށްރަށުގައި ފެން ބޮޑުވާތީ ސަމާލުވުމަށް އިލްތިމާސްކޮށްފި

މިހާރު ރާއްޖެއަށް ކުރަމުންދާ ވިއްސާރައިގައި ރާއްޖޭގެ ބައެއް ރަށްރަށުގައި ފެންބޮޑުވަމުންދާތީ އެކަމަށް ސަމާލުވުމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެފިއެވެ.

ބުރާސްފަތި ދުވަހު ނޫސްވެރިންނާ ބައްދަލުކުރައްވައި އެ އޮތޯރިޓީގެ ޑެޕިއުޓީ ޗީފް އެގްޒެކިއުޓިވް އުމަރު ފިކުރީ ވިދާޅުވީ، ލ. މާމެންދޫގެ އިންޖީނުގެއަށް ފެނުގެ އަސަރުކޮށްފައިވާ ކަމުގެ މައުލޫމާތު ލިބިފައިވާ ކަމަށާއި، މިހާރު އެރަށުން ކަރަންޓު ކަނޑާލާފައިވާ ކަމަށެވެ. އަދި ރަށުގައި މިހާރު ސިފައިން ހަރަކާތްތެރިވަމުންދާ ކަމަށް ވެސް އޭނާ ވިދާޅުވިއެވެ. އޭގެ އިތުރުން، ގއ. ވިލިނގިލި ދާންދޫ، މާމެންދޫ، އަދި ތިނަދޫއަށް ވާރޭވެހި ފެންބޮޑުވެފައިވާ ކަމަށާއި އަދި އެ ރަށްރަށުގެ ހާލަތު ގާތުން ބަލަމުންދާ ކަމަށް ވެސް އެ އޮތޯރިޓީން މައުލޫމާތުދެއެވެ.

އޭގެ އިތުރުން ވެސް ގިނަ ރަށްރަށަށް ވާރޭވެހި ފެންބޮޑުވެފައިވާއިރު، މި ބައްދަލުވުމުގައި ވާހަކަދައްކަވަމުން ޑިޒާސްޓަރ މެނޭޖްމަންޓް އޮތޯރިޓީގެ ޗީފް އެގްޒެކެޓިވް އޮފިސަރ، ހިސާން ހަސަން ވިދާޅުވީ ގއ. ވިލިގިލީގައި ވެސް ވަރަށް ބޮޑަށް ފެން ބޮޑުވެފައިވާއިރު، ކަނޑު ގަދަވުމުގެ ސަބަބުން އެއްވެސް ވަރަކަށް އެރަށަށް ދަތުރުތައް ނުކުރެވޭ ކަމުގެ މައުލޫމާތު ލިބެމުންދާ ކަމަށާއި، ފެން ހިންދާ ޕަމްޕްތައް ރަށްރަށަށް މޮބަލައިޒް ކުރުމުގެ މަސައްކަތް ކުރަމުންދާ ކަމަށެވެ. ނަމަވެސް ބައެއް ސަރަހައްދުތަކަށް ލޯންޗުގައި ވެސް ދަތުރު ނުކުރެވޭހާ މޫސުން ގޯސް ކަމަށް ހިސާން ވިދާޅުވިއެވެ

އޭގެ އިތުރުން މިރެ އާއި މާދަމާ ވެސް މެދު ރާއްޖެތެރެއަށް ގުގުރުމާ އެކު ބޯކޮށް ވާރޭ ވެހޭނެ ކަމަށާއި، އެކަމަށް ސަމާލުވުމަށް އެ އޮތޯރިޓީން އެދިފައި ވެއެވެ. އެގޮތުން ކުރީބައިގައި ސަމާލުވުމަށް، ގޭގެއަށް ފެން ނުވަންނާނެހެން ދޮރުމަތީގައި ވެލި ބަސްތާ ޖެހުމާއި، ފެންބޮޑުވެއްޖެ ހާލަތެއްގައި ގެއްލުން ވެދާނެ ފަދަ މުދާތައް ރައްކާކޮށްފައި ބެހެއްޓުމާއި، ކަރަންޓް ސާމާނުތަކަށް ސަމާލުވުމާއި، ދަތުރު ފަތުރުކުރާ ފަރާތްތަކުން ވެސް ސަމާލުވުމަށް އެ އޮތޯރިޓީން އެދިފަައި ވެއެވެ.