ނަތަންޔާހޫގެ ކިބައިން އިސްރާއީލުގެ ރައްޔިތުން ސަލާމަތް ކުރުމަށްޓަކައި އިދިކޮޅު ޕާޓީތަކުން އެ ގައުމުގެ މަގުތަކަށް ނުކުމެއްޖެއެވެ.
ނަތަންޔާހޫއާއި ދެކޮޅަށް އެ ގައުމުގެ ރައްޔިތުން ނުކުންނަންޖެހުނީ ސަރުކާރެއް އެކުލަވާލުމަށް ނަތަންޔާހޫ ކުރަމުންދާ މަސައްކަތުގެ ތެރެއިން ހެދުމަށް މަސައްކަތް ކުރާ އެއްބަސްވުންތަކެއްގެ މައްސަލައިގައެވެ.
މި އެއްވުން ތެލްއަވީވުގައި ބާއްވާފައި ވާއިރު އެއްވުން އިސްވެ ރާވާފައިވަނީ އިސްރާއީލުގެ އަސްކަރިއްޔާގެ ކުރީގެ ވެރިޔާ ބެނީ ގަންޓްޒްގެ "ބުލޫ އެންޑް ވައިޓް" އިއްތިހާދުންނެވެ.
ފަސްވަނަ ދައުރަކަށް އިސްރާއީލުގެ ބޮޑުވަޒީރުކަމަށް ހުސްވި އެޕްރީލް މަހުގެ 10 ވަނަ ދުވަހު ވަޑައިގެންފައިވާ ބެންޖަމީން ނަތަންޔާހޫއަށް މިއަދާ ހަމައަށް އައިރުވެސް އަދިވެސް ވަނީ ސަރުކާރު އެކުލަވާލުމުގައި ނުކުޅެދިފައެވެ. އަދި މިކަމަށް އޮތް ފުރުސަތު އަންނަ ބުދަ ދުވަހަށް ހަމަވާނެއެވެ.
އިދކޮޅު އިއްތިހާދުގެ ލީޑަރު ބެނީ ގަންޓްޒް ބުނެފައިވަނީ އިސްރާއީލަކީ ރަސްކަމެއްގެ ޕްރައިވެޓް ކޯޓަކަށް ހެދުމުގެ ފުރުސަތު ނަތަންޔާހޫއަށް ނުދޭނެ ކަމަށެވެ. އަދި މަގުތަކަށް އެއްވި މީހުން ބުނެފައިވަނީ ބޮޑުވަޒީރު ނަތަންޔާހޫއަކީ ގާނޫނަށް ބޯލަނބާ މީހެއް ނޫން ކަމަށާއި ޑިކްޓޭޓަރަކަށް ވުމުގެ ފުރުސަތުވެސް ނުދޭކަމަށެވެ.
ބުދަ ދުވަސް އަންނަން ވާއިރަށް ކޯލިޝަން ސަރުކާރެއް އެކުލަވާ ނުލެވިއްޖެނަމަ އިސްރާއީލުގެ ރައީސް ރިއުވެން ރިވްލިން ޕާލިމެންޓްގެ އެހެން މެންބަރަކާއި އެ މަސައްކަތް ހަވާލުކުރާނެ ކަން ފާހަގަ ކޮށްލެވެއެވެ.
